କନକ ବ୍ୟୁରୋ: ମହାରାଷ୍ଟ୍ରର ନାଗପୁର ଜିଲ୍ଲାରେ ଏକ ରୋଚକ ଘଟଣା ସାମ୍ନାକୁ ଆସିଛି । ଏଠାରେ ଥିବା ଏକ ଏଟିଏମରୁ ୫ ଗୁଣା ଟଙ୍କା ବାହାରୁଛି । ଅର୍ଥାତ ୫୦୦ ଟଙ୍କା ଉଠାଇଲେ ୫ଟା ୫୦୦ ଟଙ୍କା ବା ୨୫ ଶହ ଟଙ୍କା ବାହାରୁଛି । ଏହି ଖବର ଚାରିଆଡେ ବ୍ୟାପିବା ପରେ ଏଟିଏମରୁ ଟଙ୍କା ଉଠାଇବା ପାଇଁ ଲୋକମାନଙ୍କ ଭିଡ ଲାଗିଛି । ଟେକ୍ନିକାଲ ଖରାପ ଯୋଗୁଁ ଏଭଳି ହୋଇଛି ବୋଲି ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ନାଗପୁର ସହରଠାରୁ ୩୦ କିଲୋମିଟର ଦୂର ଖାପଖେଡା ଅଞ୍ଚଳରେ ଏକ ଘରୋଇ ବ୍ୟାଙ୍କର ଏଟିଏମରେ ଏମିତି ଯାନ୍ତ୍ରିକ ତ୍ରୁଟି ଦେଖାଯାଇଛି । ଏହି ଘଟଣା ସାମ୍ନାକୁ ଆସିବା ପରେ ଲୋକଙ୍କ ଭିଡ ଜମିଥିଲା । ଜଣେ ଗ୍ରାହକ ଏନେଇ ପୋଲିସକୁ ସୂଚନା ଦେଇଥିଲେ । ପରେ ପୋଲିସ ଘଟଣାସ୍ଥଳରେ ପହଞ୍ଚି ଏଟିଏମ ବନ୍ଦ କରିବା ସହ ବ୍ୟାଙ୍କ ଅଧିକାରୀଙ୍କୁ ସୂଚନା ଦେଇଥିଲେ ।
ବ୍ୟାଙ୍କ ଅଧିକାରୀଙ୍କ କହିବାନୁସାରେ, ଟେକ୍ନିକାଲ ଖରାପ ଯୋଗୁଁ ଏଟିଏମରୁ ଅତିରିକ୍ତ ଟଙ୍କା ବାହାରୁଥିଲା । ୫୦୦ ଟଙ୍କିଆ ନୋଟକୁ ୧୦୦ ଟଙ୍କିଆ ନୋଟର ଟ୍ରେରେ ରଖିଦିଆଯାଇଥିଲା । ଫଳରେ ୫୦୦ ଟଙ୍କା ମାରିଲେ ୫ଟି ୫୦୦ ଟଙ୍କିଆ ବାହାରୁଥିଲା ।