କେନ୍ଦ୍ର ସରକାରଙ୍କ ଅଧ୍ୟାଦେଶ ବିରୋଧରେ ଏକାଠି ହେଉଛନ୍ତି ବିରୋଧୀ । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଭେଟି ଆଲୋଚନା କଲେ ବିହାର ମୁଖ୍ୟମନ୍ତ୍ରୀ
କନକ ବ୍ୟୁରୋ : ଦିଲ୍ଲୀ ସରକାର ଓ କେନ୍ଦ୍ର ସରକାର ମଧ୍ୟରେ କ୍ଷମତା ଲଢ଼େଇ ଲାଗି ରହିଥିବାବେଳେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ମିଳୁଛି ବିରୋଧୀଙ୍କ ସମର୍ଥନ । ଏହି କ୍ରମରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଦିଲ୍ଲୀରେ ପହଁଚି କେଜ୍ରିୱାଲଙ୍କୁ ସାକ୍ଷାତ କରିଛନ୍ତି । ନୀତିଶଙ୍କ ସହ ବିହାର ଉପମୁଖ୍ୟମନ୍ତ୍ରୀ ତେଜସ୍ୱୀ ଯାଦବ ମଧ୍ୟ କେଜ୍ରିୱାଲଙ୍କୁ ଭେଟିବା ସହ କେନ୍ଦ୍ର ଅଧ୍ୟାଦେଶ ଉପରେ ଆଲୋଚନା କରିଛନ୍ତି । ବିହାର ମୁଖ୍ୟମନ୍ତ୍ରୀ ସ୍ପଷ୍ଟ କରିଛନ୍ତି କେନ୍ଦ୍ର ସହ କ୍ଷମତା ଲଢେଇରେ ଜେଡିୟୁୁ, ଦିଲ୍ଲୀ ସରକାରଙ୍କ ସହ ରହିଛି । ଏଥିସହ ସେ କହିଛନ୍ତି ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ଅକାମୀ କରିବା ପାଇଁ କେନ୍ଦ୍ର ଯେଉଁ ଅଧ୍ୟାଦେଶ ଆଣିଛି ତାହା ନିନ୍ଦନୀୟ । ଏହି ଘଟଣାରେ ସମସ୍ତ ବିରୋଧୀଙ୍କୁ ଏକଜୁଟ ହେବାକୁ ଆହ୍ୱାନ ଦେବା ସହ ସେ ଏହି ଦିଗରେ କାମ କରିବେ । କେନ୍ଦ୍ରର ଅଧ୍ୟାଦେଶ ବିରୋଧରେ ସାରା ଦେଶରେ ଅଭିଯାନ କରିବେ ବୋଲି ନୀତୀଶ ଆହ୍ୱାନ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ କେନ୍ଦ୍ର ଅଧ୍ୟାଦେଶକୁ ଘୋର ବିରୋଧ କରି କେଜ୍ରିୱାଲ କହିଛନ୍ତି ସେ ଏହି ଘଟଣାରେ ଜଣଙ୍କ ପରେ ଜଣେ ବିରୋଧୀ ନେତାଙ୍କୁ ଭେଟିବେ ଓ ଗୁରୁତ୍ୱପୂର୍ଣ୍ଣ ଆଲୋଚନା କରିବେ । ସରକାରଙ୍କ ଅଧ୍ୟାଦେଶ ଯେପରି ରାଜ୍ୟସଭାରେ ଗୃହିତ ନହୋଇପାରିବ ସେ ଦିଗରେ ସମର୍ଥନ ଲୋଡିବେ । କାରଣ ସରକାର ଆଣିଥିବା ଅଧ୍ୟାଦେଶ ୬ମାସ ମଧ୍ୟରେ ସଂସଦରେ ଗୃହୀତ ହେବା ଜରୁରୀ । ନହେଲେ ଏହା ନାକଚ ହୋଇଯିବ ।
ଆଗକୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାର୍ନାଜୀ ଓ ଅନ୍ୟ ବିରୋଧୀଦଳମାନଙ୍କୁ ଭେଟିବାକୁ କେଜ୍ରିୱାଲ ଯୋଜନା କରୁଛନ୍ତି । ଦିଲ୍ଲୀ ଓ କେନ୍ଦ୍ର ସରକାର କ୍ଷମତା ଲଢେଇ ଚାଲିଥିବାବେଳେ ମେ ୧୧ରେ ସୁପ୍ରିମକୋର୍ଟ ଏକ ନିଷ୍ପତି ଶୁଣାଇଥିଲେ । ସୁପ୍ରିମକୋର୍ଟ କହିଥିଲେ କର୍ମଚାରୀଙ୍କ ନିଯୁକ୍ତି ଓ ବଦଳି କ୍ଷମତା ଦିଲ୍ଲୀ ସରକାରଙ୍କ ପାଖରେ ରହିବ । ତେବେ ୧୯ ତାରିଖରେ କେନ୍ଦ୍ର ସରକାର ଅଧ୍ୟାଦେଶ ଜାରି କରି ଏହି କ୍ଷମତା ଉପରାଜ୍ୟପାଳଙ୍କୁ ହାତକୁ ଦେବାକୁ ନିଷ୍ପତି ନେଇଥିଲେ । ଅଧ୍ୟାଦେଶ ବଳରେ ସରକାର ଏକ ନ୍ୟାସନାଲ କ୍ୟାପିଟାଲ ସର୍ଭିସ ଅଥରିଟି ଗଠନ କରିଛନ୍ତି । ଏହି ଅଥରିଟି ଦିଲ୍ଲୀ ସରକାରଙ୍କ କର୍ମଚାରୀ ନିଯୁକ୍ତ ଓ ବଦଳି ଭଳି କାର୍ଯ୍ୟପାଳିକା ନିଷ୍ପତି ନେଇପାରିବେ । ସେପଟେ ସୁପ୍ରିମକୋର୍ଟରେ ଉଭୟ ଦିଲ୍ଲୀ ସରକାର ଓ କେନ୍ଦ୍ର ସରକାର ପିଟିସନ ଦାଖଲ କରିଛନ୍ତି । ସୁପ୍ରିମକୋର୍ଟ ନିଷ୍ପତିର ପୁନଃବିଚାର କରନ୍ତୁ ଦାବି ଜଣାଇ କେନ୍ଦ୍ର ସରକାର ଆବେଦନ ଦାୟର କରିଛନ୍ତି ।