ମନେ ପଡନ୍ତି ସାମ୍ବାଦିକ ଅରିନ୍ଦମ ଦାସ: ପ୍ରଥମ ଶ୍ରାଦ୍ଧବାର୍ଷିକୀରେ କେନ୍ଦୁଝର ଜନ୍ମମାଟିରେ ଉନ୍ମୋଚିତ ହେଲା ପ୍ରତିମୂର୍ତି
କନକ ବ୍ୟୁରୋ: ଠିକ ବର୍ଷକ ତଳେ ଖବର କରିବାକୁ ଯାଇ ଖବରର ଶିରୋନାମା ପାଲଟିଯାଇଥିଲେ ଯୁବ ସାମ୍ବାଦିକ ଅରିନ୍ଦମ ଦାସ । ମୁଣ୍ଡୁଳି ବ୍ୟାରେଜରେ ଫସିରହିଥିବା ହାତୀ ଉଦ୍ଧାର ଖବର ସଂଗ୍ରହ କରିବାକୁ ଯାଇ ନିଜ ଜୀବନକୁ ବାଜି ଲଗାଇଦେଇଥିଲେ ଓଟିଭିର ଏହି ସାମ୍ବାଦିକ । ଏକ ବୋଟରେ କ୍ୟାମେରାମ୍ୟାନକୁ ଧରି ଖବର ସଂଗ୍ରହ ପାଇଁ ମଝି ନଈକୁ ଯାଇଥିବାବେଳେ ଦୁର୍ଘଟଣାର ସମ୍ମୁଖୀନ ହୋଇଥିଲେ । ପ୍ରଖର ସୁଅରେ ବୋଟଟି ଭାସିଯାଇଥିଲା । ଏଥିରେ ଥିବା ଅରିନ୍ଦମ ଦାସଙ୍କ ସହ ଅନ୍ୟମାନେ ବୁଡିଯାଇଥିଲେ । ଅନ୍ୟମାନଙ୍କୁ ଉଦ୍ଧାର କରାଯାଇଥିବାବେଲେ ଅରିନ୍ଦମଙ୍କ ହୋଇଥିଲା ସଲିଳ ସମାଧି । ଆଉ ଜଣେ ଯୁବ, ନିର୍ଭୀକ ଓ ଦୁଃସାହସିକ ସାମ୍ବାଦିକଙ୍କ ଅକାଳ ବିୟୋଗରେ ସାରା ରାଜ୍ୟ ସ୍ତବ୍ଧ ହୋଇଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ମାତ୍ର ୩୯ ବର୍ଷ ବୟସରେ ଅରିନ୍ଦମ ଦାସଙ୍କ ଆକସ୍ମିକ ମୃତ୍ୟୁ ଓଡିଆ ସାମ୍ବାଦିକ ଜଗତ ପାଇଁ ଅପୂରଣୀୟ କ୍ଷତି ଥିଲା । ରିପୋର୍ଟିଂରେ ସେ ସବୁବେଳେ କିଛି ଅଲଗା କରିବାକୁ ଉଦ୍ୟମ କରୁଥିଲେ । ବିଶେଷକରି ୨୦୦୮ ନୟାଗଡ ମାଓବାଦୀ ଆକ୍ରମଣ ଓ ୨୦୧୩ରେ ଫାଇଲିନି ବାତ୍ୟା ଖବର ସଂଗ୍ରହ ସମୟରେ ଅରିନ୍ଦମଙ୍କ ରିପୋର୍ଟିଂକୁ ସମସ୍ତେ ପ୍ରଂଶସା କରିଥିଲେ ।
ତିଥି ଅନୁସାରେ ଅରିନ୍ଦମଙ୍କ ମୃତ୍ୟୁକୁ ଆଜି ପୂରିଛି ଏକବର୍ଷ । ଆଉ ଆଜି ତାଙ୍କୁ ସାମ୍ବାଦିକ ମହଲ ସହ ମନେପକାଇଛି ସାରା ରାଜ୍ୟ । ଅରିନ୍ଦମଙ୍କ ନିଜ ଗାଁ କେନ୍ଦୁଝର ଜିଲ୍ଲା ପାଟଣା ବ୍ଲକର ରାଇକଳାରେ ପାଳିତ ହୋଇଛି ପ୍ରଥମ ଶ୍ରାଦ୍ଧବାର୍ଷିକୀ । ଆଉ ପ୍ରଥମ ଶ୍ରାଦ୍ଧବାର୍ଷିକୀରେ ତାଙ୍କର ଏକ ପ୍ରତିମୂର୍ତ୍ତିର ଉନ୍ମୋଚିତ ହୋଇଛି । ଏଥିରେ ଓଟିଭିର ଏମଡି ଜଗି ମଙ୍ଗତ ପଣ୍ଡା ଓ ଅନ୍ୟ ପ୍ରମୁଖ ବ୍ୟକ୍ତି ଯୋଗଦେଇ ଶ୍ରଦ୍ଧାଂଜଳି ଦେଇଥିଲେ । ଶ୍ରଦ୍ଧାଂଜଳି ସଭାରେ ଅରିନ୍ଦମ ଦାସଙ୍କ ମା କୁନି ଦାସ. ତାଙ୍କ ପତ୍ନୀ ଓ ପରିବାରର ଅନ୍ୟ ସଦସ୍ୟ ବି ଉପସ୍ଥିତ ଥିଲେ । ଜଣେ ନିର୍ଭୀକ ଓ ସାହସିକ ସାମ୍ବାଦିକଙ୍କୁ ମନେପକାଇ ଅତିଥିମାନେ ଶ୍ରଦ୍ଧାଞ୍ଜଳି ବି ଦେଇଥିଲେ ।
ଜୀବନଠାରୁ ନିଜ ପେଶାକୁ ସବୁବେଳେ ପ୍ରାଥମିକତା ଦେଇଆସିଥିଲେ ଅରିନ୍ଦମ । ଯଦିଓ ସେ ଆଉ ଆମ ଗହଣରେ ନାହାନ୍ତି, ମାତ୍ର ତାଙ୍କର ରିପୋର୍ଟିଂ ଶୈଳୀ, କହିବାର ଦକ୍ଷତା ଓ ଦର୍ଶକଙ୍କୁ ବାନ୍ଧିରଖିବାର କଳା ନିଆରା ଥିଲା । ଯେଉଁଥିପାଇଁ ସେ ସାମ୍ବାଦିକ ମହଲରେ ସ୍ମରଣୀୟ ହୋଇ ରହିବେ ।