ପାକିସ୍ତାନର ଭାବି ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଶପଥ ଗ୍ରହଣ ଉତ୍ସବକୁ ନେଇ ଆରମ୍ଭ ହୋଇଛି ଚର୍ଚ୍ଚା । ଅଗଷ୍ଟ ୧୧ରେ ପାକିସ୍ତାନର ନୂଆ ପ୍ରଧାନମନ୍ତ୍ରୀ ଭାବେ ଶପଥ ନେବେ କ୍ରିକେଟରରୁ ରାଜନେତା ପାଲଟିଥିବା ଇମ୍ରାନ ଖାନ୍ । କିନ୍ତୁ ଏହି ଶପଥ ଗ୍ରହଣ ଉତ୍ସବକୁ ନିରାଡମ୍ବର କରିବାକୁ କୌଣସି ବିଦେଶୀ ରାଷ୍ଟ୍ରମୁଖ୍ୟଙ୍କୁ ନିମନ୍ତ୍ରଣ କରାଯାଇନାହିଁ । ତେବେ ଏସବୁ ଭିତରେ ପାକିସ୍ତାନର ନୂଆ ପ୍ରଧାନମନ୍ତ୍ରୀ ଭାବେ ଶପଥ ନେବାକୁ ଯାଉଥିବା ଇମ୍ରାନଙ୍କ ଭାରତ ପ୍ରତି କଣ ଆଭିମୁଖ୍ୟ ରହିବ ତାହା ଏବେ ସବୁଠୁ ବଡ ପ୍ରଶ୍ନ । କାରଣ ଇମ୍ରାନଙ୍କ ବିଜୟ ପଛରେ ସେନା ଓ ଆଇଏସଆଇର ହାତ ଥିବା ଅଭିଯୋଗ ସାମ୍ନାକୁ ଆସୁଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଏସବୁ ଭିତରେ ପାକିସ୍ତାନର ଭାବି ପ୍ରଧାନମନ୍ତ୍ରୀଙ୍କୁ ନେଇ ମୁହଁ ଖୋଲିଛନ୍ତି ରାଜ୍ୟସଭା ସାଂସଦ ତଥା ଓଲିଉଡ ସୁପରଷ୍ଟାର ଅନୁଭବ ମହାନ୍ତି । ଯେଉଁ ଇମ୍ରାନ ଖାନ୍ ନିର୍ବାଚନ ପୂର୍ବରୁ ଭାରତ ବିରୋଧରେ ବିଷ ଓଗାଳୁଥିଲେ ଏବେ ସେ ନିଜର ଆଭିମୁଖ୍ୟରେ ପରିବର୍ତ୍ତନ ଆଣିଛନ୍ତି । ସାଧାରଣ ନିର୍ବାଚନରେ ଇମ୍ରାନଙ୍କ ଦଳ ବିଜୟୀ ହେବା ସହ ଭାରତ ସହ ବନ୍ଧୁତାର ହାତ ବଢାଇବାକୁ ଉଦ୍ୟମ କରିଛନ୍ତି । ଯାହା ଉଭୟ ଦେଶ ପାଇଁ ଶୁଭ ସଂକେତ । କିନ୍ତୁ ଭାରତ ସହ ଇମ୍ରାନ ଯେଉଁ ବନ୍ଧୁତ୍ୱର ହାତ ବଢାଇଛନ୍ତି ତାହାକୁ ବଜାୟ ରଖିଲେ ହିଁ ବନ୍ଧୁତ୍ୱର ମର୍ଯ୍ୟାଦା ରହିବ । ଏବଂ ଏହାର ପ୍ରଭାବ ଦୁଇ ଦେଶର ସର୍ମ୍ପକ ଉପରେ ପଡିବ । ଏହାଛଡା ପାକିସ୍ତାନ ସେନା ଯେଉଁଭଳି ଭାବେ ଆତଙ୍କବାଦକୁ ପୋତ୍ସାହିତ କରୁଛି ତାହାକୁ ଯେତେଶୀଘ୍ର ବନ୍ଦ କରାଯିବ ସେଥିପ୍ରତି ଇମ୍ରାନ ସରକାର ଧ୍ୟାନ ଦେବା ଆବଶ୍ୟକ । ଏପରିକି ଆତଙ୍କବାଦ ଉପରେ ଯେପରି ପୂର୍ଣ୍ଣଛେଦ ଲଗାଯାଇପାରିବ ତାହା ଉପରେ ନବ ନିର୍ବାଚିତ ସରକାର କାମ କରିବା ଆବଶ୍ୟକ ବୋଲି କହିଛନ୍ତି ଅନୁଭବ । ଏହାଦ୍ୱାରା ଦୁଇ ଦେଶ ମଧ୍ୟରେ ସର୍ମ୍ପକ ସୁଦୃଢ ହେବ ।
ଏହା ପୂର୍ବରୁ ସାମ୍ବାଦିକ ସମ୍ମିଳନୀରେ ଇମ୍ରାନ କହିଥିଲେ ଯେ, ଭାରତ ଏବଂ ପାକିସ୍ତାନ ମଧ୍ୟରେ ସବୁଠାରୁ ମୁଖ୍ୟ ପ୍ରସଙ୍ଗ ହେଉଛି କାଶ୍ମୀର । ଯାହାକୁ ନେଇ ଭାରତ ଭାବୁଛି କାଶ୍ମୀରରେ ପାକିସ୍ତାନ ବିଶୃଙ୍ଖଳା କରୁଛି ତ ଅନ୍ୟପଟେ ବଲୁଚିସ୍ତାନରେ ବିଶୃଙ୍ଖଳା ଭାରତ କରୁଛି ବୋଲି ଆମେ ଭାବୁଛୁ ଇମ୍ରାନ ଖାନ କହିଛନ୍ତି । ତେଣୁ ଏଭଳି ସମସ୍ୟାର ସମାଧାନ ପାଇଁ ଦ୍ୱିପାକ୍ଷିକ ଆଲୋଚନା ହେବା ଦରକାର । ଭାରତ-ପାକିସ୍ତାନ ମଧ୍ୟରେ ସୁଃ ସମ୍ପର୍କ ଯୋଡିବା ପାଇଁ ଆପୋଷ ଆଲୋଚନାରେ ହିଁ ସମ୍ଭବ ହୋଇ ପାରିବ । ଯେଉଁଥି ପାଇଁ ଭାରତ ଯଦି ଏକ ପାଦ ଆଗକୁ ବଢ଼ାଏ , ଆମେ ୨ ପାଦ ଆଗକୁ ବଢ଼ାଇବୁ ବୋଲି ଇମ୍ରାନ ଖାନ କହିଛନ୍ତି । ଆମେ ସମ୍ପର୍କ ସ୍ଥାପନ କରିବା ପାଇଁ ଚାହୁଁଛୁ ବୋଲି କହିଥିଲେ ଇମ୍ରାନ।