ଓଡ଼ିଶାରେ ଗାଁରେ ପଡୋଶୀ କଲା ନିର୍ବାଚନ । ସୁପ୍ରିମକୋର୍ଟରେ ମାମଲା, ହେଲେ ନିର୍ବାଚନ ପାଇଁ ଅଟଳ ରହିଲା ଆନ୍ଧ୍ର । ପ୍ରତିବାଦରେ ରାସ୍ତାରୋକ କଲେ ସ୍ଥାନୀୟ ନେତା ଓ ଜନତା ।
କନକ ବ୍ୟୁରୋ: କୋଟିଆର ନିର୍ବାଚନ କାହାଣୀ ସତେ ଯେମିତି କଟା ଘା’ରେ ଚୂନ ସଦୃଶ ସାମ୍ନାକୁ ଆସିଛି । ଷଢ଼େଇକଳା ଓ ଖରସୁଆଁର ଦୁଃଖ ମନରୁ ଲିଭି ନଥିବା ବେଳେ ପଡ଼ୋଶୀ ଆନ୍ଧ୍ର, ଓଡ଼ିଶା ମାଟିରେ କରିଛି ପଂଚାୟତ ନିର୍ବାଚନ । ଆନ୍ଧ୍ର ପ୍ରଦେଶ ଯୋଜନାର ବୁଢ଼ିଆଣୀ ଜାଲରେ ଓଡ଼ିଶାର ସୀମାନ୍ତ ଲୋକଙ୍କୁ ଏମିତି ଛନ୍ଦି ଦେଇଛି ଯେ, ସକାଳୁ ସକାଳୁ ଲୋକ ମତଦାନ କେନ୍ଦ୍ରରେ ପହଂଚିଯାଇଛନ୍ତି । କୋରାପୁଟ ଜିଲ୍ଲା କୋଟିଆ ଫାଟୁସିନେରି ପଂଚାୟତରେ ଶହ ଶହ ଓଡ଼ିଶା ଭୋଟର ଆନ୍ଧ୍ର ନିର୍ବାଚନ ପାଇଁ ଭୋଟ୍ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଓଡ଼ିଶାର ଫାଟୁସିନେରି ଅଂଳଚକୁ ମାଡ଼ି ବସିବା ପାଇଁ କେବଳ ନିର୍ବାଚନ କରିନି ଆନ୍ଧ୍ର ବରଂ ନିର୍ବାଚନକୁ ସଫଳ କରିବା ପାଇଁ ଓଡ଼ିଶା ଲୋକଙ୍କ ଜୀବନକୁ ବାଜି ଲଗାଇବାକୁ ପଛାଇ ନାହିଁ ଆନ୍ଧ୍ର ପ୍ରଶାସନ । ଘାଟି ରାସ୍ତାରେ ଅତି ବିପଦପୂର୍ଣ୍ଣ ଭାବେ ଗାଡିରେ ଭୋଟରଙ୍କୁ ସାମଗ୍ରୀ ଭଳି ବୋହି, ମତଦାନ କେନ୍ଦ୍ରକୁ ନେଇଛି ଆନ୍ଧ୍ର ପ୍ରଶାସନ । ଗୋଟିଏ ଗାଡିରେ ଲୋକ ଠିଆ ହୋଇଯାଉଥିବା ବେଳେ ଆଉ କିଛି ଲୋକ ବିପଦସଂକୁଳ ଭାବେ ଓହଳି ରହିଥିଲେ ।
କୋରାପୁଟ ଜିଲ୍ଲା କୋଟିଆର ୩ଟି ପଂଚାୟତ ତଳଗଞ୍ଜେଇପଦର, ଫଗୁଣସିନେରି ଓ ଫାଟୁସିନେରିରେ ନିର୍ବାଚନ କରିଛି ଆନ୍ଧ୍ର । ତଳଗଂଜେଇପଦର ଓ ଫଗୁଣସିନେରିରେ ପ୍ରାର୍ଥୀ ନିଦ୍ୱର୍ନ୍ଦରେ ନିର୍ବାଚିତ ହୋଇଥିବା ବେଳେ ଫାଟୁସିନେରି ନିର୍ବାଚନ ସରିଛି । ଫାଟୁସିନେରି ପଂଚାୟତରେ ଆନ୍ଧ୍ରର ମାତ୍ର ଦୁଇଟି ଗାଁ ରହିଥିବାବେଳେ ଓଡିଶାରୁ ରହିଛି ୬ଟି ଗାଁ । ଓଡିଶାର ଗାଁଗୁଡିକ ହେଉଛି କନାଦୋରା, ବର୍ଣ୍ଣାପାଡୁ, ଫାଟୁସିନେରି, ମାଡକା, ଡୋଲିଆମ, ଚିକାପାରୁ । ଏହି ପଂଚାୟତରେ ମୋଟ ୧୦୨୫ ଭୋଟର ଥିବାବେଳେ ୬୧୫ ଜଣ ଭୋଟ୍ ଦେଇଛନ୍ତି ।
ଓଡ଼ିଶାରେ ଆନ୍ଧ୍ରର ନିର୍ବାଚନ ମାମଲା କୋର୍ଟରେ ବିଚାରାଧୀନ ଥିବାରୁ ନିର୍ବାଚନ ନକରିବାକୁ ଶୁକ୍ରବାର ବିଜୟନଗରମ ଜିଲ୍ଲାପାଳଙ୍କୁ ଚିଠି ଲେଖିଥିଲେ କୋରାପୁଟ ଜିଲ୍ଲାପାଳ । ହେଲେ, ବିଜୟନଗରମ ଜିଲ୍ଲାପାଳ ଏହି ଚିଠିକୁ ଖାତିର୍ ନକରି ପୂର୍ବ ଘୋଷଣା ଅନୁଯାୟୀ ନିର୍ବାଚନ କରିଛନ୍ତି । ନିର୍ବାଚନରେ ଭାଗ ନେବା ପାଇଁ ଓଡିଶାର ଲୋକଙ୍କୁ ଆନ୍ଧ୍ର ବିଭିନ୍ନ ଲୋଭ ଦେଖାଇ ଟାଣିବାକୁ ଉଦ୍ୟମ କରିଥିବାବେଳେ ଏହାକୁ ରୋକିବାରେ କିଛି ମାତ୍ରାରେ ସଫଳ ହୋଇଛି କୋରାପୁଟ ଜିଲ୍ଲାପ୍ରଶାସନ । ନିର୍ବାଚନ ହେଉଥିବା ଗାଁଠାରୁ ଅଳ୍ପଦୂରରେ ବିଭିନ୍ନ ପ୍ରକାରର ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରିବା ସହ ଭତ୍ତା ଓ ଚାଉଳ ବାଂଟିଛି କୋରାପୁଟ ପ୍ରଶାସନ । ଫଳରେ ବହୁ ସଂଖ୍ୟାରେ ଲୋକ ଭୋଟ ଦେବାକୁ ଯାଇନଥିବା ଜଣାପଡିଛି ।