ଖାଲି ରହିବନି ପଶୁଙ୍କ ପେଟ । ଖୋଲା ରହିବ ପଶୁ ଖାଦ୍ୟ ଦୋକାନ ସହ ପଶୁ ଚିକିତ୍ସାଳୟ । ବୁଲା କୁକୁର ଓ ଗୋରୁଙ୍କ ପାଇଁ କାଲି ସରକାର ଦେଇଥିଲେ ୫୪ ଲକ୍ଷ
କନକ ବ୍ୟୁରୋ: ପଶୁଙ୍କ ପେଟ କଥା ବୁଝିଲେ ସରକାର । ସଙ୍କଟ ସମୟରେ ମଣିଷଙ୍କ ଭଳି ପଶୁଙ୍କ ଉପରେ ଫୋକସ ଦେଲେ ରାଜ୍ୟ ସରକାର । ଖୋଲା ରହିବ ପଶୁ ଖାଦ୍ୟ ଦୋକାନ । ପଶୁଙ୍କ ଖାଇବା ସାମଗ୍ରୀ ରଖୁଥିବା ସମସ୍ତ ଦୋକାନ ତାଲାବନ୍ଦ ବେଳେ ବି ଖୋଲା ରହିବ । ଏଥିସହ ଚିକିତ୍ସା ପାଇଁ ପଶୁ ଚିକିତ୍ସାଳୟ ଖୋଲା ରଖିବାକୁ ନିର୍ଦ୍ଦେଶ ଦେଇଛନ୍ତି ସରକାର ।
Kanak News is now on WhatsApp
Join and get latest news updates delivered to you via WhatsApp
ତେବେ ଲକଡାଉନ ସମୟରେ ଦୋକାନ ବଜାର, ହୋଟେଲ, ରେସ୍ତୋରାଁ ଏବଂ ହଷ୍ଟେଲ ଆଦି ବନ୍ଦ ରହୁଥିବାରୁ ବାହାରେ ବୁଲୁଥିବା ପଶୁ, ବୁଲା କୁକୁରଙ୍କ ଖାଇବା ପାଇଁ ୫୪ ଲକ୍ଷ ଟଙ୍କା ଦେଇଥିଲେ ରାଜ୍ୟ ସରକାର । ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ଏହି ଟଙ୍କା ଯୋଗାଇ ଦିଆଯାଇଥିଲା । ତାଲାବନ୍ଦ ପାଇଁ ଖାଇବାକୁ ନପାଇବାରୁ ଭୋକରେ ଆଉଟୁ ପାଉଟୁ ହେଉଛନ୍ତି ବୁଲା କୁକୁର । ଏମିତି କି ଅନେକ କୁକୁର ଖାଦ୍ୟାଭାବ ପାଇଁ ପାଗଳ ହୋଇଯାଉଥିବା ନଜିର ରହିଛି ।
ସେପଟେ ଅନେକ ପଶୁଙ୍କ ପେଟରେ ଖାଦ୍ୟ ପଡୁନଥିବାରୁ ଦିନକୁ ଦିନ ହିଂସ୍ର ହୋଇଯାଉଛନ୍ତି । ତେଣୁ ସେସବୁ ଦୃଷ୍ଟିରୁ ଗତକାଲି ରାଜ୍ୟ ସରକାର ଭୁବନେଶ୍ୱର, କଟକ, ବ୍ରହ୍ମପୁର, ରାଉରକେଲା, ସମ୍ବଲପୁର ମହାନଗର ସମେତ ୪୮ଟି ମୁନିସିପାଲଟିରେ ବୁଲୁଥିବା ୧ ଲକ୍ଷ ୨୦ ହଜାର କୁକୁର ଏବଂ ପଶୁଙ୍କ ପାଇଁ ଖାଦ୍ୟର ବନ୍ଦୋବସ୍ତ କରିଛନ୍ତି । ଆଉ ଆଜି ସମସ୍ତ ପଶୁ ଖାଦ୍ୟ ଦୋକାନକୁ ଖୋଲା ରଖିବାକୁ ନିର୍ଦ୍ଦେଶ ଦେଇଛନ୍ତି ।