ଗୁଜରାଟରେ ଦୁର୍ଘଟଣା ପରେ ଓଡିଶା ସତର୍କ: ଯାଞ୍ଚ ହେବ ଧବଳେଶ୍ୱର ଝୁଲାପୋଲ
କନକ ବ୍ୟୁରୋ: ଗୁଜରାଟରେ ଝୁଲାପୋଲ ଦୁର୍ଘଟଣା ସାରା ଦେଶକୁ ସ୍ତବ୍ଧ କରିଦେଇଛି । ୨୪ ଘଂଟା ପରେ ବି ମଚ୍ଛୁ ନଦୀରେ ଉଦ୍ଧାରକାରୀ ଦଳର ବୋଟ ଘୁରି ବୁଲୁଛି । ଭାରତୀୟ ସେନା ସହ ଏନଡିଆରଏଫ, ଏସଡିଆରଏଫ ଓ ଅଗ୍ନିଶମ ବାହିନୀ ବୋଟରେ ପଇଁତରା ମାରି ପାଣି ଭିତରେ ମୃତଦେହକୁ ଖୋଜୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମୋରବୀର ମଚ୍ଛୁ ନଦୀରୁ ୧୩୪ ଜଣଙ୍କ ମୃତଦେହ ଉଦ୍ଧାର ହୋଇଥିବା ବେଳେ ଆହୁରି ମୃତଦେହ ପାଣିରେ ଥିବା ସନ୍ଦେହ କରାଯାଉଛି । ଉଦ୍ଧାର ପରେ ହସ୍ପିଟାଲରେ ଭର୍ତି ୧୭୭ ଆହତଙ୍କ ମଧ୍ୟରୁ ଅଧିକାଂଶଙ୍କ ସ୍ୱାସ୍ଥ୍ୟବସ୍ଥା ସଂକଟାପନ୍ନ ରହିଛି । ତେଣୁ ମୃତ୍ୟୁ ସଂଖ୍ୟା ବଢିବା ଆଶଙ୍କା ରହିଛି । ଏବେ ବି ୫୦ରୁ ଅଧିକ ଲୋକଙ୍କ ପତା ମିଳୁନାହିଁ । ଡ୍ରୋନ ଉଡାଇ ନିଖୋଜଙ୍କୁ ଖୋଜାଖୋଜି ଚାଲିଛି ।
ରବିବାର ସନ୍ଧ୍ୟାରେ ମଚ୍ଛୁ ନଦୀ କୂଳରେ ଛଟ ପୂଜା ପାଇଁ ଭିଡ ଜମିଥିଲା । ଝୁଲାପୋଲରେ ଅତ୍ୟଧିକ ଲୋକ ଚଢିଯିବାରୁ ଦୁର୍ଘଟଣା ଘଟିଥିବା କୁହାଯାଉଛି । ପୋଲର ଧାରଣ କ୍ଷମତା ଶହେ ବ୍ୟକ୍ତି ଥିବା ବେଳେ ପ୍ରାୟ ୪ଶହରୁ ଅଧିକ ଚଢିଯାଇଥିଲେ । ଅତ୍ୟଧିକ ଓଜନରେ ପୋଲର ଗୋଟିଏ ମୁଣ୍ଡ ଛିଣ୍ଡିଯିବାରୁ ଲୋକେ ନଦୀ ଭିତରେ ପଡି ଯାଇଥିଲେ । କେତେ ଭୟାନକ ଥିଲା ସେହି ସମୟ, ତାହା ବର୍ଣ୍ଣନା କରିଛନ୍ତି ମୃତ୍ୟୁକୁ ଅତି ନିକଟରୁ ଦେଖିଥିବା ବ୍ୟକ୍ତି ।
ଆଉ ଏକ ସାଂଘାତିକ କଥା ହେଲା ୭ ମାସ ପରେ ଝୁଲା ପୋଲ ଖୋଲିଥିଲେ ମଧ୍ୟ ବିନା ଫିଟନେସ ସାର୍ଟିଫିକେଟରେ ଯାତ୍ରା ପାଇଁ ଅନୁମତି ଦିଆଯାଇଥିଲା । ଏବେ ସଂପୃକ୍ତ ରକ୍ଷଣାବେକ୍ଷଣା ଦାୟିତ୍ୱରେ ଥିବା ସଂସ୍ଥା ବିରୋଧରେ ହତ୍ୟା ମାମଲା ରୁଜୁ କରାଯାଇଛି । ମୃତକଙ୍କ ପରିବାରକୁ ଗୁଜୁରାଟ ସରକାର ଓ ପ୍ରଧାନମନ୍ତ୍ରୀ ରିଲିଫ ପାଣ୍ଠିରୁ ଅନୁକମ୍ପା ମୂଳକ ସହାୟତା ମଧ୍ୟ ଘୋଷଣା କରାଯାଇଛି ।
ଗୁଜରାଟରେ ଝୁଲାପୋଲ ଦୁର୍ଘଟଣା ପରେ ସତର୍କ ହୋଇଛନ୍ତି କଟକ ଜିଲ୍ଲା ପ୍ରଶାସନ । ଧବଳେଶ୍ୱର ପୀଠକୁ ଯିବା ପାଇଁ ଥିବା ଝୁଲାପୋଲର ନିରାପତା ଯାଂଚ ପାଇଁ ଝୁଲାପୋଲରେ ଯାତାୟତକୁ ଦିନକ ପାଇଁ ବନ୍ଦ ରଖାଯାଇଛି । ବୈଷୟିକ ଟିମ୍ ଧବଳେଶ୍ୱରରେ ପହଁଚି ଝୁଲାପୋଲର ଯାଂଚ କରୁଥିବା ସୂଚନା ଦେଇଛନ୍ତି କଟକ ଜିଲ୍ଲାପାଳ । ଏବେ ଡଙ୍ଗା ବା ମୋଟର ବୋଟ୍ ସାହାଯ୍ୟରେ ଧବଳେଶ୍ୱର ପୀଠକୁ ଯିବେ ଶ୍ରଦ୍ଧାଳୁ ।
ଯଦି ଧବଳେଶ୍ୱର ଝୁଲାପୋଲର ମରାମତି ସଠିକ୍ ଭାବେ ହୋଇନପାରିଲେ ଝୁଲାପୋଲ ଯାତ୍ରାକୁ ବନ୍ଦ କରାଯାଇପାରେ ବୋଲି କଟକ ଜିଲ୍ଲାପାଳ ସୂଚନା ଦେଇଛନ୍ତି ।