ଘର, ମଠ ଓ ମନ୍ଦିର ମୁକ୍ତ ହେଲା ଶ୍ରୀମନ୍ଦିରର ମେଘନାଦ ପାଚେରୀ । ହଟିଲା ଜବରଦଖଲ, ବେଆଇନ କୋଠାବାଡ଼ିରେ ଚାଲିଲା ବୁଲଡୋଜର ।
କନକ ବ୍ୟୁରୋ : ମୁକ୍ତ ହେଲା ଶ୍ରୀମନ୍ଦିରର ମେଘନାଦ ପାଚେରୀ । ପାଚେରୀକୁ ଲାଗି ରହିଥିବା ସମସ୍ତ ନିର୍ମାଣକୁ ଉଚ୍ଛେଦ କରିଛି ପୁରୀ ପ୍ରଶାସନ । ପତ୍ନତତ୍ତ୍ୱ ବିଭାଗର ସୁପାରିଶ ଏବଂ ହାଇକୋର୍ଟଙ୍କ ନିର୍ଦ୍ଦେଶ ପରେ ଦୁଇ ଦିନ ଧରି ଜବରଦଖଲ ଉଚ୍ଛେଦ କରାଯାଇଛି । ଏହି ଉଚ୍ଛେଦ ପ୍ରକିୟା ଭିତରେ ବଡ଼ ଧରଣର ପ୍ରତିବାଦ ହୋଇନଥିଲେ ବି ଆଗକୁ କ’ଣ ହେବ ତାକୁ ନେଇ ଏକ ବଡ ପ୍ରଶ୍ନ ସୃଷ୍ଟି ହୋଇଛି । କାରଣ ମେଘନାଦ ପାଚେରୀଠାରୁ ୭୫ ମିଟର ଭିତରେ ଜବରଦଖଲ ଉଚ୍ଛେଦ କରିବାକୁ ବି.ପି ଦାସ କମିଶନ କରିଥିବା ସୁପାରିଶକୁ ଅନୁମୋଦନ ଦେଇଛନ୍ତି ରାଜ୍ୟ କ୍ୟାବିନେଟ୍ ।
Kanak News is now on WhatsApp
Join and get latest news updates delivered to you via WhatsApp
ଆପଣ ଏବେ ପୁରୀ ଆସିଲେ ଶ୍ରୀମନ୍ଦିରର ଦୃଶ୍ୟ ଆପଣଙ୍କୁ ଭିନ୍ନ ଲାଗିବ ।କାରଣ ମେଘନାଦ ପାଚେରୀକୁ ଲାଗି ରହିଥିବା କୋଠାବାଡି ଓ ଅନ୍ୟାନ୍ୟ ବିଲଡିଂ ଗୁଡିକ, ସରକାରୀ ଡ୍ରୋଜର ମାଡରେ ମାଟିରେ ମିଶିଯାଇଛି । ୨ ଦିନ ଭିତରେ ପୁରୀ ପ୍ରଶାସନ, ମେଘନାଦ ପାଚେରୀକୁ ଜବରଦଖଲ ମୁକ୍ତ କରିବାରେ ସକ୍ଷମ ହୋଇଛି ।
ହାଇକୋର୍ଟଙ୍କ ନିର୍ଦ୍ଦେଶ ଓ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା, ଏଏସଆଇର ସୁପାରିଶକୁ ଆଧାର କରି, ୨ଦିନ ଭିତରେ ଶ୍ରୀମନ୍ଦିରର ପଶ୍ଚିମ ଦ୍ୱାର, ଦକ୍ଷିଣ ଦ୍ୱାର ଓ ସିଂହଦ୍ୱାର ନିକଟରେ ଥିବା କୋଠା ଓ ଘର ଗୁଡିକୁ ଭାଙ୍ଗି ଦିଆଯାଇଛି । ସିଂହଦ୍ୱାର ନିକଟସ୍ଥ ଉତ୍କଳମଣୀ ଗୋପବନ୍ଧୁଙ୍କ ମୂର୍ତ୍ତିକୁ ବାଦ୍ ଦେଇ ସୂଚନା କେନ୍ଦ୍ର ସମେତ ଅନ୍ୟ ବିଲଡିଂ ମଧ୍ୟ ଭାଙ୍ଗିଦିଆଯାଇଛି ।
ମେଘନାଦ ପାଚେରୀ ଜବରଦଖଲ ମୁକ୍ତ ହେବା ପରେ ଏବେ ବିପି ଦାସ କମିଶନ ସୁପାରିଶ ଉପରେ ସମସ୍ତଙ୍କ ନଜର ରହିଛି । ଏଥିରେ କୁହାଯାଇଛି ମେଘନାଦ ପାଚେରୀରୁ ୭୫ ମିଟର ପର୍ଯ୍ୟନ୍ତ ସ୍ଥାନକୁ ଜବରଦଖଲ ମୁକ୍ତ କରାଯିବ । ରାଜ୍ୟ କ୍ୟାବିନେଟ୍ ମଧ୍ୟ ଏହାକୁ ମଞ୍ଜୁରୀ ଦେଇଛି । ଏହା କାର୍ଯ୍ୟକାରୀ ହେଲେ ୭୦୦ରୁ ଅଧିକ ଘର, ୭ଟି ହୋଟେଲ ଓ ୩୦୦ ରୁ ୪୦୦ଟି ଦୋକାନ ଘର ଭଙ୍ଗାଯାଇପାରେ । ସିଂହଦ୍ୱାର ନିକଟରେ ଥିବା ରାଧାବଲ୍ଲଭ ମଠ, ବାଗିଡିଆ ଧର୍ମଶାଳା ଓ କିଛି ସେବାୟତଙ୍କ ଘର ବି ଭାଙ୍ଗିପାରେ ।