ଲୋକସେବା ଭବନରେ ‘ବୁଲବୁଲ୍’ ସମୀକ୍ଷା । ବାତ୍ୟାରେ ବେହାଲ ହୋଇଛି ୬ଟି ଜିଲ୍ଲା, ମଙ୍ଗଳବାର ସନ୍ଧ୍ୟା ସୁଦ୍ଧା ବିଦ୍ୟୁତ୍ ସେବା ଯୋଗାଇବାକୁ ନିର୍ଦ୍ଦେଶ ।
କନକ ବ୍ୟୁରୋ: ସାମୁଦ୍ରିକ ବାତ୍ୟା ‘ବୁଲବୁଲ’ର ପରବର୍ତ୍ତୀ ସ୍ଥିତି ନେଇ ଲୋକସେବା ଭବନରେ ସମୀକ୍ଷା କରିଛନ୍ତି ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ । ରାଜ୍ୟର ୬ଟି ଜିଲ୍ଲା ବାତ୍ୟା ‘ବୁଲବୁଲ୍’ରେ ପ୍ରଭାବିତ ହୋଇଛି । ଏହି ଜିଲ୍ଲା ଗୁଡ଼ିକରେ ରହିଛି- ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଜଗତସିଂହ, ଯାଜପୁର ଓ ମୟୂରଭଞ୍ଜ । ତେଣୁ ଏହି ୬ଟି ପ୍ରଭାବିତ ଜିଲ୍ଲାର ଜିଲ୍ଲାପାଳଙ୍କ ସହ ଭିଡ଼ିଓ କନଫରେସିଂ ଜରିଆରେ ଆଲୋଚନା କରିଛନ୍ତି ମୁଖ୍ୟ ଶାସନ ସଚିବ ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ପ୍ରଭାବିତ ଏହି ୬ଟି ଜିଲ୍ଲାର ପ୍ରାୟ ୧୬ ଲକ୍ଷ ବିଦ୍ୟୁତ୍ ଉପଭୋକ୍ତାଙ୍କର ବିଦ୍ୟୁତ୍ ଯୋଗାଯୋଗ ବଛିନ୍ନ ହୋଇଯାଇଥିଲା । ହେଲେ ପ୍ରଶାସନର ତତ୍ପରତା ଯୋଗୁଁ ବର୍ତ୍ତମାନ ସୁଦ୍ଧା ୧୫ ଲକ୍ଷ ଉପଭୋକ୍ତାଙ୍କର ବିଦ୍ୟୁତ୍ ଯୋଗାଣ ପୁନଃରୁଦ୍ଧାର କରାଯାଇଛି ବୋଲି ସ୍ୱତନ୍ତ୍ର ରିଲିଫ୍ କମିଶନର ପ୍ରଦୀପ୍ତ କୁମାର ଜେନା କହିଛନ୍ତି । ଅନ୍ୟପଟେ ପ୍ରଭାବିତ ଅଞ୍ଚଳର ଅବଶିଷ୍ଟ ବିଦ୍ୟୁତ୍ କାର୍ଯ୍ୟର ପୁନଃରୁଦ୍ଧାର ପାଇଁ ମଙ୍ଗବାର ସୁଦ୍ଧା ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟ ଶାସନ ସଚିବ ।
ଅନ୍ୟପଟେ ପ୍ରାଥମିକ ଆକଳନ ଅନୁସାରେ ବୁଲବୁଲ ଯୋଗୁଁ ପାଖାପାଖି ୩ ଲକ୍ଷ ହେକ୍ଟର ଜମିରେ ଫସଲ କ୍ଷତିଗ୍ରସ୍ତ ହୋଇଥିବା ସରକାରୀ ରିପୋର୍ଟ ହସ୍ତଗତ ହୋଇଛି । ସେଥିମଧ୍ୟରୁ ୨ଲକ୍ଷ ହେକ୍ଟର ଜମିରେ ଶତକ’ା ୩୩ଭାଗରୁ ଅଧିକ ଫସଲ ନଷ୍ଟ ହୋଇଛି । ତେଣୁ ଫସଲ ନଷ୍ଟର ସଠିକ୍ ଆକଳନ ଆସନ୍ତା ୫ ଦିନ ମଧ୍ୟରେ ଶେଷ କରିବାକୁ କୃଷି ଓ ରାଜସ୍ୱ ବିଭାଗର ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ । ଠିକ୍ ସେହିଭଳି ସ୍ୱତନ୍ତ୍ର ରିଲିଫ୍ କମିଶନରଙ୍କ କହିବା ମୁତାବକ, ପ୍ରଭାବିତ ଜିଲ୍ଲାର ପ୍ରାୟ ୫ ହଜାର ୫୦୦ ଘର କ୍ଷତିଗ୍ରସ୍ତ ହୋଇଛି । ତେଣୁ ଏଗୁଡ଼ିକର ସଠିକ୍ ପ୍ରମାଣ ଭିତ୍ତିକ ତନଖି କରି ରିପୋର୍ଟ ଦେବାକୁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଛନ୍ତି ମୁଖ୍ୟ ଶାସନ ସଚିବ ।
ବର୍ତ୍ତମାନ ସୁଦ୍ଧା ଓଡ୍ରାଫ୍, ଏନ.ଡି.ଆର.ଏଫ୍ ଏବଂ ଅଗ୍ନିଶମ ସଂସ୍ଥା ଟିମ୍ ମାନଙ୍କ ଦ୍ୱାରା ପ୍ରାୟ ୪୬ଟି ବ୍ଲକ ଏବଂ ୧୨ଟି ସହରାଞ୍ଚଳରେ ରାସ୍ତାଘାଟ ସଫା କରାଯାଇ ଗମନାଗମନ ବ୍ୟବସ୍ଥାକୁ ପୁନଃ ସ୍ଥାପନ କରାଯାଇଛି । ତେବେ ବାତ୍ୟାରେ ମାତ୍ର ଜଣକର ମୃତ୍ୟୁ ହୋଇଥିବା ପ୍ରାଥମିକ ରିପୋର୍ଟରୁ ଜଣାପଡ଼ିଛି । ବାତ୍ୟାରେ ବିଶେଷ ପ୍ରଭାବିତ ହେବାକୁଥିବା ତଳିଆ ଅଞ୍ଚଳରୁ ୮,୬୬୦ ଲୋକଙ୍କୁ ସ୍ଥାନାନ୍ତରିତ କରାଯାଇ ୯୧ଟି ବାତ୍ୟା ଆଶ୍ରୟସ୍ଥଳୀରେ ରଖାଯାଇ ରନ୍ଧାଖାଦ୍ୟ ଯୋଗାଇ ଦିଆଯାଉଛି । ସ୍ଥିତି ସୁଧୁରିବା ପରେ ସେମାନେ ନିଜନିଜ ଘରକୁ ଫେରିଯାଇଥିବା ପ୍ରଶାସନ ତରଫରୁ ଦୃଢ଼ୋକ୍ତି ପ୍ରକାଶ କରିଛନ୍ତି ।