‘ଅପରେସନ୍ ଲୋଟସ୍’ ପାଇଁ ବିିଜେପି ଇସାରାରେ କାମ କରୁଛନ୍ତି ରାଜ୍ୟପାଳ । ପଞ୍ଜାବ ରାଜ୍ୟପାଳଙ୍କ ଉପରେ ବର୍ଷିଲେ ଆପ୍ ନେତା ।
କନକ ବ୍ୟୁରୋ: ପଞ୍ଜାବ ରାଜ୍ୟପାଳଙ୍କ ଉପରେ ବର୍ଷିଲେ ଆପ୍ ନେତା । ଅପରେସନ୍ ଲୋଟସକୁ ସଫଳ କରିବାକୁ ପଞ୍ଜାବର ରାଜ୍ୟପାଳ ବିଜେପିର ଇସାରାରେ କାମ କରୁଛନ୍ତି ବୋଲି ଅଭିଯୋଗ ହୋଇଛି । ଆପ୍ ସରକାରରେ କ୍ୟାବିନେଟ୍ ମନ୍ତ୍ରୀ ଥିବା ଅମନ ଅରୋଡା ପଞ୍ଜାବ ରାଜ୍ୟପାଳଙ୍କ ବିରୋଧରେ ଏମିତି ଅଭିଯୋଗ ଆଣିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେ କହିଛନ୍ତି ଗତ ୭୫ ବର୍ଷ ଭିତରେ ରାଜ୍ୟପାଳ କିମ୍ବା ରାଷ୍ଟ୍ରପତି ବିଧାନସଭା ଅଧିବେଶନ ଆରମ୍ଭ ହେବା ପୂର୍ବରୁ କୌଣସି ସୂଚୀ ମାଗନ୍ତି ନାହିଁ । ହେଲେ ପଞ୍ଜାବରେ ଏହା ପ୍ରଥମ କରି ହେଉଛି । ରାଜ୍ୟପାଳ, ବିଜେପି ଓ କଂଗ୍ରେସ ସହ ମିଶି ଏଠାରେ ଗଣତାନ୍ତ୍ରିକ ବ୍ୟବସ୍ଥାକୁ ଦୁର୍ବଳ କରିବାକୁ ଚାହୁଁଛନ୍ତି ବୋଲି ସେ କହିଛନ୍ତି । ବିଜେପି ଉପରେ ବର୍ଷିବା ସହିତ ଅରଡୋ କହିଛନ୍ତି, ଯେଉଁ ରାଜ୍ୟରେ ବିଜେପି ସରକାର ନାହିଁ, ସେଠାରେ ରାଜ୍ୟପାଳ ସରକାର ବିରୋଧୀ ଭାବେ କାମ କରୁଛନ୍ତି । ବିଜେପି ନିଜର ଶାସନକଳର ଦୂରୁପଯୋଗ କରୁଛନ୍ତି । ଏଥିପାଇଁ ରାଜ୍ୟପାଳ ଆପ ସରକାର ବିରୋଧରେ ବାରମ୍ବାର ନୋଟିସ୍ ପଠାଉଛନ୍ତି ।
ଆପ୍ ନେତା ଅରୋଡାଙ୍କ କହିବା ଅନୁସାରେ, ସେପ୍ଟେମ୍ବର ୨୭ ତାରିଖରେ ହେବାକୁ ଥିବା ବିଧାନସଭା କାର୍ଯ୍ୟ ପାଇଁ ରାଜ୍ୟପାଳ ବିବରଣୀ ମାଗିବା ଗଣତନ୍ତ୍ରର ହତ୍ୟା ପାଇଁ ଏକ ପ୍ରୟାସ ଅଟେ । ଏହା ପୂର୍ବରୁ ରାଜ୍ୟପାଳ ସେପ୍ଟେମ୍ବର ୨୨ ତାରିଖରେ ଆପ୍ ସରକାର ଡାକିଥିବା ବିଶେଷ ଅଧିବେଶନକୁ ମଧ୍ୟ ରଦ୍ଦ କରିଦେଇଥିଲେ । ତେଣୁ ଏହାକୁ ନେଇ ତାଙ୍କ ଉପରେ ବର୍ଷିଛନ୍ତି ଆପ୍ ନେତା ଅମନ ଅରୋଡା ।