ମକର ସଂକ୍ରାନ୍ତିରେ ସିଂହନାଥ ପୀଠ ନିକଟ ଟି-ବ୍ରିଜ୍ ଉପରେ ଅଘଟଣ । ଅସମ୍ଭାଳ ଭିଡ଼ ଯୋଗୁଁ ଦଳାଚକଟାରେ ଜଣେ ମହିଳା ମୃତ, ଏକାଧିକ ଆହତ
କନକ ବ୍ୟୁରୋ : ସିଂହନାଥ ପୀଠରେ ଦଳାଚକଟାରେ ମୃତ୍ୟୁ ଘଟିଥିବା ମହିଳାଙ୍କ ପରିବାରକୁ ୫ ଲକ୍ଷ ଟଙ୍କାର ଅନୁକମ୍ପା ସହାୟତା ଘୋଷଣା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଅନୁକମ୍ପା ସହାୟତା ଘୋଷଣା କରିଛନ୍ତି । ଏଥିସହ ଦୁଇ ଦିନ ପାଇଁ ୧୪୪ ଧାରା ଜାରି କରାଯାଇଛି । ସିଂହନାଥ ପୀଠରେ ଯେଉଁସବୁ କାର୍ଯ୍ୟକ୍ରମ ରହିଛି ତାକୁ ବାତିଲ କରାଯାଇଛି । ଘଟଣାରେ ୯ ଜଣ ଆହତ ହୋଇଛନ୍ତି । ମକର ସଂକ୍ରାନ୍ତିରେ ସିିଂହନାଥ ପୀଠ ନିକଟ ଟି-ବ୍ରିଜ୍ ଉପରେ ଆଜି ସନ୍ଧ୍ୟାରେ ଦଳଚକଟା ହୋଇଥିଲା । ଏଥିରେ ଜଣଙ୍କର ଜୀବନ ଯାଇଛି । ମୃତକଙ୍କ ନାଁ ଅଂଜନା ସ୍ୱାଇଁ । ବୟସ ପ୍ରାୟ ୪୫ ହେବ ।
Kanak News is now on WhatsApp
Join and get latest news updates delivered to you via WhatsApp
ମୃତକଙ୍କ ଘର ବାଙ୍କୀ ପାଥପୁରରେ ହୋଇଥିବା ଜଣାପଡ଼ିଛି । ଆହତଙ୍କୁ ବଡ଼ମ୍ବା ହସ୍ପିଟାଲକୁ ସ୍ଥାନାନ୍ତର କରାଯାଇଛି । ୨ ଜଣ ଶିଶୁଙ୍କୁ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି । ଦୁଇ ଶିଶୁଙ୍କୁ ଆଇସିୟୁରେ ଚିକିତ୍ସା ଚାଲିଛି । ଅନ୍ୟ ୩ ଜଣଙ୍କର ବି ଏସସିବିରେ ଚିକିତ୍ସା ଚାଲିଛି । କଟକ ଜିଲ୍ଲାପାଳ ଭାବନୀ ଶଙ୍କର ଚଇନି କହିଛନ୍ତି, ପୁଲିସ ଯେତିକି ଆକଳନ କରିଥିଲା, ତାଠାରୁ ଅଧିକ ଲୋକ ଥିଲେ । ତେଣୁ ଦଳାଚକଟା ହେଲା । ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ପୋଲ ଉପରେ ୫୦ ହଜାର ଲୋକଙ୍କ ଭିଡ ଜମିଥିଲା ।