କନକ ବ୍ୟୁରୋ: ଚର୍ଚ୍ଚାରେ ପାକିସ୍ତାନ ଦମ୍ପତ୍ତିଙ୍କ ପ୍ରେମ କାହାଣୀ । ସଫେଇ କର୍ମଚାରୀଙ୍କ ବିବାହ କଲେ ଏମବିବିଏସ୍ ମହିଳା ଡାକ୍ତର । ହସ୍ପିଟାଲରୁ ମନ ଦିଆନିଆ ତା ପରେ ବିବାହ । କୁହାଯାଏ ପ୍ରେମର ସଂଜ୍ଞା ନାହିଁ । ଏଥିରେ ନଥାଏ ଉଚ୍ଚନିଚ୍ଚର ବିଚାର । ନା ଧନଦୌଲତର ବାହାସ୍ପୋଟ । ଇଏ ତ ହୃଦୟ ସହ ହୃଦୟର ବନ୍ଧନ । କିଏ କାହାକୁ କେଉଁ ପରିସ୍ଥିତିରେ ହୃଦୟ ଦେଇ ବସେ କହିହୁଏନା ।
Kanak News is now on WhatsApp
Join and get latest news updates delivered to you via WhatsApp
ଅନେକ ସମୟରେ ଭିନ୍ନ ଭିନ୍ନ ପ୍ରେମ କାହାଣୀ ଆପଣ ହୁଏତ ଶୁଣିଥିବେ ।ହେଲେ ଇଏ ଆଉ ଏକ ନିଆରା ପ୍ରେମ କାହାଣୀ । ଯେଉଁଠି ପ୍ରେମିକା ଉଚ୍ଚ ଶିକ୍ଷିତା ହେଲେ ପ୍ରେମିକ ଜଣେ ସଫେଇ କର୍ମଚାରୀ, ଯାହା ସୋସିଆଲ ମିଡିଆରେ ଏବେ ବେଶ୍ ପ୍ରଶଂସା ସାଉଁଟୁଛି । ଚାରିଆଡୁ ଏହି ଦମ୍ପତ୍ତିଙ୍କୁ ଛୁଟୁଛି ଶୁଭେଚ୍ଛାର ସୁଅ । ଏହି ପ୍ରେମୀ ଯୁଗଳ ହେଉଛନ୍ତି ପାକିସ୍ତାନର, ଯିଏ ଏବେ ସୋସିଆଲ ମିଡିଆରେ ବେଶ୍ ସକ୍ରିୟ ।
ଜୀବନର ଗୋଟିଏ ବଡ ନିଷ୍ପତ୍ତି ମାତ୍ର କେଇ ଘଣ୍ଟାରେ ନେଇଗଲେ ଯୁବତୀ । ଆମେ କହୁଛୁ ପାକିସ୍ତାନର ମହିଳା ଡାକ୍ତର କିଶ୍ୱର ସାହିବାଙ୍କ କଥା । କିଶ୍ୱର ପେଶାରେ ଜଣେ ଡାକ୍ତର, ଯିଏ ଜଣେ ସଫେଇ କର୍ମଚାରୀ ସହଜାଦଙ୍କୁ ବିବାହ କରି ଚର୍ଚ୍ଚାର ପରିସରକୁ ଆସିଛନ୍ତି । ଦୁହିଁଙ୍କ ପ୍ରେମ କାହାଣୀ ଭାରି ମଜାଦାର ।
ଗଣମାଧ୍ୟମର ଜଣେ ସଦସ୍ୟ ଏହି ଦମ୍ପତ୍ତିଙ୍କୁ ଭେଟିଥିଲେ । ତାଙ୍କ କହିବା ଅନୁସାରେ । କିଶ୍ୱର ଯେଉଁ ହସ୍ପିଟାଲରେ ଡାକ୍ତର ଥିଲେ, ସେହିଠାରେ ସଫେଇ କର୍ମଚାରୀ ଭାବେ କାମ କରୁଥିଲେ ଶହଜାଦ୍ । ଶହଜାଦ୍ ସେଠାରେ ୩ଜଣ ଡାକ୍ତରଙ୍କ ପାଖରେ ଡ୍ୟୁଟି କରୁଥିଲେ । ସେମାନଙ୍କ ରୁମ ସଫା କରିବା ସହ ସେମାନଙ୍କୁ ଚା’ ନେଇ ଦେଉଥିଲେ । ତଳିଆ କର୍ମଚାରୀ ହେଲେ ବି ନିଜ କାମରେ କିନ୍ତୁ ପୁରା ପକ୍କା ଥିଲେ ଶହଜାଦ୍ । ଅତି ନିଷ୍ଠାର ସହ ନିଜ କାମକୁ ତୁଲାଉଥିଲେ । ତାଙ୍କର ନିଷ୍ଠାପରତା ଦେଖି ଶହଜାଦଙ୍କୁ ମନ ଦେଇବସିଲେ ଡାକ୍ତର କିଶ୍ୱର । ଦିନେ ଶହଜାଦଙ୍କୁ ଫୋନ ନମ୍ବର ମାଗିଥିଲେ । ଆଉ ପରେ ପରେ ତାଙ୍କର ଏକ ଷ୍ଟାଟସକୁ ଲାଇକ୍ ବି କରିଥିଲେ । ହେଲେ ଏସବୁକୁ ହାଲକା ଭାବେ ନେଇଥିଲେ ଶହବାଜ୍ ।
କିଛି ଦିନ ଯିବା ପରେ କୌଣସି କାରଣରୁ ଶହବାଜ୍ ଛୁଟିରେ ଥିଲେ ବି ତାଙ୍କୁ ଫୋନ କରି ଡାକିଥିଲେ କିଶ୍ୱର ଆଉ ମନ କଥା କହିଦେଇଥିଲେ । ଏହାକୁ ଆଦୌ ବିଶ୍ୱାସ କରିପାରୁନଥିଲେ ଶହବାଜ୍ । ଏହାପରେ ଅନେକ ଦିନ ଛୁଟିରେ ଘରେ ରହିଲେ । କାରଣ ସେ ଜଣେ ସଫେଇ ର୍କଚାରୀ ହୋଇ ଜଣେ ଡାକ୍ତର ତାଙ୍କୁ ପ୍ରପୋଜ୍ କରିବା ଘଟଣା ତାଙ୍କର ହଜମ ହେଉନଥିଲା । ଏହି ଘଟଣାକୁ ନେଇ ତାଙ୍କ ଦେହ ବି ଖରାପ ହୋଇଯାଇଥିଲା । କିଛି ମାସ ଛୁଟିରେ ରହି ସୁସ୍ଥ ହେବା ପରେ ହସ୍ପିଟାଲରେ କାମରେ ଯୋଗ ଦେଇଥିଲେ ଏବଂ ଡାକ୍ତର ମାଡାମଙ୍କ ରୁମକୁ ଯାଇଥିଲେ । ଅବଶ୍ୟ ପରେ ଡାକ୍ତରାଣୀଙ୍କ ପ୍ରେମକୁ ଗ୍ରୀନ୍ ସିଗନାଲ ଦେଇଥିଲେ ଶହନାଜ୍ । ଆଉ ସହଯୋଗୀଙ୍କ ଅନେକ ଟାହିଟାପରା ପରେ ବି ଦୁହେଁ ଦୁହିଁଙ୍କୁ ଜୀବନସାଥୀ ଭାବେ ଗ୍ରହଣ କରି ବିବାହ ବନ୍ଧନରେ ବାନ୍ଧି ହୋଇଥିଲେ ।
ଏବେ ଡାକ୍ତର କିଶ୍ୱର ନିଜ ପରିବାରକୁ ନେଇ ବ୍ୟସ୍ତ । ସହକର୍ମୀଙ୍କ ଟାହିଟାପରା ଯୋଗୁଁ ଚାକିରି ଛାଡିବା ପରେ ଏବେ ଏକ କ୍ଲିନିକ୍ ଖୋଲି ରୋଗୀ ସେବା କରିବାକୁ ଚେଷ୍ଟା କରୁଛନ୍ତି ଡାକ୍ତର କିଶ୍ୱର ।