କନକ ବ୍ୟୁରୋ : ଗୋଟାଏ ସାପ ମୋ ଫାର୍ମହାଉସ୍ରେ ପଶିଲା । ଖଣ୍ଡେ ବାଡ଼ିରେ ସାପକୁ ମୁଁ ବାହାରେ ଛାଡିବାକୁ ନେଉଥିଲି । ଆଉ ସେତିକିବେଳେ ସେ ମୋ ହାତ ପର୍ଯ୍ୟନ୍ତ ଚାଲି ଆସିଲା । ବାହାରେ ଛାଡ଼ିବାକୁ ତାକୁ ନେବା ବେଳେ ସେ ମୋତେ ୩ ଚୋଟ ମାରିଲା । ସେଇଟା ଗୋଟାଏ ଧରଣର ବିଷଧର ସାପ । ତେଣୁ, ମୋତେ ୬ ଘଣ୍ଟା କାଳ ଡାକ୍ତରଖାନାରେ ରହିବାକୁ ପଡ଼ିଲା । ଏବେ ମୁଁ ଭଲ ଅଛି ବୋଲି ସମ୍ବାଦ ସରବରାହ ସଂସ୍ଥାନ ‘ଏଏନ୍ଆଇ’କୁ ଅଭିନେତା ସଲ୍ମନ୍ ଖାଁ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତାଙ୍କୁ ଚିକିତ୍ସା କରୁଥିବା କାମୋଥ ହସ୍ପିଟାଲ୍ର ଡାକ୍ତର କୁଳଦୀପ ସଲଗୋତ୍ର ପୂର୍ବରୁ ଗଣମାଧ୍ୟମକୁ କହିଥିଲେ ଯେ, ଦୁଇଟି ଡାକ୍ତରୀ ଟିମ୍ ସଲ୍ମନ୍ ଖାଁଙ୍କର ଚିକିତ୍ସା କରୁଛନ୍ତି । ତାଙ୍କର ସ୍ବାସ୍ଥ୍ୟାବସ୍ଥା ଭଲ ଅଛି । ବିପଦମୁକ୍ତ ହେବା ପରେ ୫୬ତମ ଜନ୍ମଦିନ ପାଳନ ପାଇଁ ସଲ୍ମନ୍ ଡାକ୍ତରଖାନାରୁ ପନ୍ୱେଲ୍ସ୍ଥିତ ଫାର୍ମହାଉସ୍କୁ ଯାଇଥିଲେ । ମୁମ୍ବାଇ ଉପକଣ୍ଠରେ ଥିବା ଉକ୍ତ ଫାର୍ମହାଉସ୍ରେ ପରିବାର ଓ ଘନିଷ୍ଠ ବନ୍ଧୁବାନ୍ଧବଙ୍କ ସହ ସାଧାରଣତଃ ସଲ୍ମନ୍ ତାଙ୍କର ଜନ୍ମଦିନ ପାଳନ କରିଥାଆନ୍ତି ।
ଅନ୍ଲାଇନ୍ରେ ସେୟାର୍ ହୋଇଥିବା କେତେକ ଫଟୋ ଏବଂ ଭିଡିଓରେ ସଲ୍ମାନ୍ ଜନ୍ମଦିନ କେକ୍ କାଟୁଥିବାର ଦୃଶ୍ୟ ରହିଛି । ବାହାରେ ପ୍ରତୀକ୍ଷାରତ ଫଟୋଗ୍ରାଫର୍ମାନଙ୍କ ସହ ଆଳପ କରିବା ଲାଗି ସଲ୍ମନ୍ ଫାର୍ମହାଉସ୍ ବାହାରକୁ ଆସି ସହାସ୍ୟ ବଦନରେ ପୋଜ୍ ଦେଇଥିଲେ । ସେମାନେ ମଧ୍ୟ ତାଙ୍କ ପାଇଁ ଗୀତଟିଏ ବୋଲିଥିଲେ। ସଲ୍ମନ୍ ସେମାନଙ୍କୁ ସର୍ପାଘାତ କଥା କହି ହସି ପକାଇଥିଲେ ।
ତାଙ୍କ ବାପା ସଲିମ୍ ଖାଁ ମଧ୍ୟ ଗଣମାଧ୍ୟମକୁ କହିଥିଲେ, ସଲ୍ମନ୍ ଭଲ ଅଛି । ବିବ୍ରତ ହେବାର କୌଣସି କାରଣ ନାହିଁ। ବଡ଼ି ସକାଳୁ ସାପ କାମୁଡ଼ି ଥିଲା, ଏବେ ସେ ଭଲ ଅଛି । ସାପଟି ଥିଲା ବିଷହୀନ । ଜଙ୍ଗଲିଆ ଅଞ୍ଚଳରେ ଏଭଳି ଜନ୍ତୁ ଦେଖାଯିବା ସ୍ବାଭାବିକ କଥା । ଡାକ୍ତରମାନେ ତା’ ପାଇଁ କିଛି ଔଷଧ ଲେଖି ଦେଇଛନ୍ତି । ସେ କିନ୍ତୁ, ସମ୍ପୂର୍ଣ୍ଣ ସୁସ୍ଥ ଅଛି । ଜନ୍ମଦିନ ଉପଲକ୍ଷେ ଅଭିନେତା ସଲମନ୍ କଳା ଟି-ସାର୍ଟ, କଳା ଜ୍ୟାକେଟ୍ ଏବଂ ବାଦାମୀ ରଙ୍ଗର ପ୍ୟାଣ୍ଟ୍ ପିନ୍ଧିବା ସହ ବେକରେ ଚେନ୍ ପକାଇଛନ୍ତି ।