ଚାଲିଛି ରାହୁଲଙ୍କୁ ଉଦ୍ଧାର, ଭାରତୀୟ ସେନା, ଏନଡିଆରଏଫ ଓ ଛତିଶଗଡ ପୁଲିସର ସ୍ୱତନ୍ତ୍ର ଟିମ୍ ଉଦ୍ଧାର କାର୍ଯ୍ୟରେ ସାମିଲ
କନକ ବ୍ୟୁରୋ : ବୋରୱେଲ ଭିତରେ ୬୦ଫୁଟ ତଳେ, ଫସି ଥିବା ୧୦ବର୍ଷର ଭିନ୍ନକ୍ଷମ ନାବାଳକ ରାହୁଲଙ୍କୁ ଉଦ୍ଧାର କରିବା ପାଇଁ ଦିନରାତି ଏକ କରିଦେଇଛନ୍ତି ଉଦ୍ଧାରକାରୀ ଟିମ୍ । ଭାରତୀୟ ସେନା, ଏନଡିଆରଏଫ ଓ ଛତିଶଗଡ ପୁଲିସର ସ୍ୱତନ୍ତ୍ର ଟିମ୍ ଉଦ୍ଧାର କାର୍ଯ୍ୟରେ ସାମିଲ ହୋଇଛନ୍ତି । ଉଦ୍ଧାର ସମୟରେ ଯେମିତି ରାହୁଲଙ୍କୁ କୌଣସି ଆଘାତ ନପହଁଚେ ତା ଉପରେ ଗୁରୁତ୍ୱ ଦିଆଯାଇଛି । ଏଥିପାଇଁ ସ୍ୱତନ୍ତ୍ର ରଣନୀତି କରି ଯୋଜନା ବଦ୍ଧ ଭାବରେ ଉଦ୍ଧାରକାର୍ଯ୍ୟ ଚାଲିଛି ।
Kanak News is now on WhatsApp
Join and get latest news updates delivered to you via WhatsApp
ରାହୁଲକୁ ସୁରକ୍ଷିତ ଉଦ୍ଧାର ପାଇଁ ସେ ଫସିଥିବା ସ୍ଥାନଠାରୁ ଅଳ୍ପ କିଛି ଦୂରରେ ସୁଡଂଗ କରି ତା ନିକଟରେ ପହଁଚିବା ପାଇଁ ଉଦ୍ୟମ ଜାରି ରଖିଛନ୍ତି ଉଦ୍ଧାରକାରୀ ଟିମ୍ । ମାଟିକୁ କାଟି କାଟି ଉଦ୍ଧାର କାରୀ ଟିମ୍ ଆଗକୁ ବଢ଼ୁଥିବାବେଳେ. ଉଦ୍ଧାର କାର୍ଯ୍ୟରେ ବାଧକ ସାଜିଛି ବିରାଟ ପଥର ଚଟାଣ । ସ୍ୱତନ୍ତ୍ର ମେସିନ ସହାୟତାରେ ପଥର କଟା ଯାଉଥିଲେ ବି ପଥର ଅତି ଶକ୍ତ ଥିବାରୁ କାଟିବା କଷ୍ଟକର ହେଉଛି । ପଥର ଚଟାଣଟି ଗ୍ରାନାଇଟ୍ ଓ ସେମି ଗ୍ରାନାଇଟ୍ ଜାତୀୟ ହୋଇଥିବା କୁହାଯାଉଛି । ଯାହାକୁ କାଟିବାରେ ସମସ୍ୟା ଉପୁଜୁଛି ।
ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଯେଉଁ ପଥର ଚଟାଣ କାଟିବା କଷ୍ଟକର ହେଉଛି, ସେହି ପଥର ଚଟାଣର ଏକ ଅଂଶରେ ରାହୁଲ ବସିଛି । ତେଣୁ ପଥରକୁ କାଟିବାବେଳେ ଯେମିତି ତାର ଯେମିତି କୌଣସି କ୍ଷତି ନହୁଏ ତା ଉଦ୍ଧାରକାରୀ ଟିମ୍ ପାଇଁ ବଡ ଚ୍ୟାଲେଞ୍ଜ ହୋଇଛି । ଏଥିପାଇଁ ଚଟାଣକୁ ଧିରେ ଧିରେ କଟାଯାଉଛି । ସୁଡଙ୍ଗ ଭିତରୁ ମାଟି ଓ ପଥର ଖଣ୍ଡ ଗୁଡିକୁ ଅତି ସତର୍କତାର ସହିତ କଢ଼ା ଯାଉଛି । ପିଲାଟି ଅତି ଗଭୀରରେ ଥିବାରୁ ସେଠାରେ ଯେମିତି ପାଣିର ସ୍ତରକୁ ସ୍ଥିର ରଖିବା ପାଇଁ ମଧ୍ୟ ପଦକ୍ଷେପ ନିଆଯାଇଛି ।
ସକାଳେ ଟିକେ ନିସ୍ତେଜ ହୋଇପଡିଥିବା ରାହୁଲ ଅପରାହ୍ଣରେ ପୁଣି ଥରେ ଇସାରା ଦେଇଛି ।ତାକୁ ଭୋକ ଲାଗୁଥିବାର ସଂକେତ ଦେଇଛିି । ଖାଇବା ପାଇଁ ସଂକେତ ଦେବା ପରେ ତା ନିକଟରେ ଖାଦ୍ୟ ପହଁଚାଇବା ପାଇଁ ଉଦ୍ଧାରକାରୀ ଟିମ୍ ପକ୍ଷରୁ ଉଦ୍ୟମ କରାଯାଉଛି । ସ୍ୱତନ୍ତ୍ର ଜ୍ଞାନ କୌଶଳ ରୋବେଟିକ୍ ଇନକ୍ୟୁବେଟର ସହାୟତାରେ ତାର ଗତିବିଧି ଉପରେ ନଜର ରଖାଯାଉଛି । ପିଲାଟିର ଶାରୀରିକ, ମାନସିକ ସ୍ଥିତି ଅନୁଧ୍ୟାନ କରାଯାଉଛି । ବୋରୱେଲର ଉପରମୁଣ୍ଡ ଦେଇ ରାହୁଲଙ୍କୁ ପାଇପ ଯୋଗେ ଖାଦ୍ୟ, ପାଣି ଓ ଅକ୍ସିଜେନ ଯୋଗାଇ ଦିଆଯାଉଛି ।
ଶୁକ୍ରବାର ଅପରାହ୍ନରେ ଖେଳୁଥିବା ବେଳେ ୧୧ ବର୍ଷ ବୟସ୍କ ରାହୁଲ ବୋରୱେଲ ଗାତରେ ଖସି ପଡିଥିଲେ । ପ୍ରାୟ ଶହେ ଘଂଟା ହେବ ନଳକୂପ ପାଇଁ ଖୋଲାଯାଇଥିବା ଗାତରେ ଜୀବନ ସହ ସଂଗ୍ରାମ କରୁଛନ୍ତି ରାହୁଲ ।