ଭିଣୋଇ ସହ ସାନ ଝିଅକୁ ବିବାହ କରିବା ପାଇଁ ପରିବାର ଲୋକଙ୍କ ଜିଦ୍ । ଅରାଜି ହେବାରୁ ମାଆ-ଝିଅଙ୍କୁ ଘରୁ ତଡିିଦେଲେ ପରିବାରଲୋକେ ।
ରାଉରକେଲାରୁ ଆସିଲା ଘରୋଇ ହିଂସାର ବିକୃତ ରୂପ ।
କନକ ବ୍ୟୁରୋ: ରାଉରକେଲାରୁ ଘରୋଇ ହିଂସାର ଏଭଳି ଏକ ଅଭିଯୋଗ ଆସିଛି, ଯାହା ସଭ୍ୟ ସମାଜର ବିବେକକୁ ଦୋହଲାଇ ଦେବ । ବଡ ଜ୍ୱାଇଁ ସହ ସାନ ଝିଅକୁ ବିବାହ କରିବା ପାଇଁ ଜିଦ୍ କରିଛନ୍ତି ଜଣେ ବାପା । ଆଉ ଏଥିରେ ସାନ ଝିଅ ଓ ମା’ ରାଜି ନହେବାରୁ ଅକଥନୀୟ ଅତ୍ୟାଚାର କରିବା ସହ ଘରୁ ବାହାର କରିଦେଇଛନ୍ତି ପରିବାର ଲୋକ ।
Kanak News is now on WhatsApp
Join and get latest news updates delivered to you via WhatsApp
ରାଉରକେଲା ଆରଏସପି କାମ କରି ଅବସର ନେଇଥିବା କୃପାସିନ୍ଧୁ ସେଠୀଙ୍କ ନାଁରେ ଏଭଳି ଅଭିଯୋଗ କରିଛନ୍ତି, ତାଙ୍କ ପତ୍ନୀ ବାସନ୍ତୀ ସେଠୀ ଏବଂ ସାନ ଝିଅ । କେନ୍ଦ୍ରାପଡ଼ାର ମୂଳବାସିନ୍ଦା କୃପାସିନ୍ଧୁ ୧୯୭୧ ମସିହାରେ ବିବାହ କରିଥିଲେ । କୃପାସିନ୍ଧୁଙ୍କ ୩ଟି ପୁଅ ଏବଂ ୨ ଦୁଇଟି ଝିଅ ଅଛନ୍ତି । ବଡ଼ ଝିଅ ବାହା ହେବା ପରେ ତାଙ୍କର ଜ୍ୱାଇଁଙ୍କ ୨ଟି ଝିଅ ହୋଇଛନ୍ତି । ହେଲେ ଜ୍ୱାଇଁକୁ ପୁଅ ପସନ୍ଦ ଥିବାରୁ ଦ୍ୱିତୀୟ ବିବାହ କରିବାକୁ ନିଜ ଶ୍ୱଶୁର କୃପାସିନ୍ଧୁଙ୍କୁ ପ୍ରସ୍ତାବ ଦେଇଥିଲେ ।
ଏଥିପାଇଁ ନିଜ ପତ୍ନୀଙ୍କ ସାନ ଭଉଣୀକୁ ବିବାହ କରିବାକୁ କୌଶଳ କ୍ରମେ କୃପାସିନ୍ଧୁଙ୍କୁ ରାଜି ମଧ୍ୟ କରାଇନେଇଥିଲେ । ଆଉ ସାନ ଝିଅ ଓ ମାଙ୍କୁ ଛାଡ଼ି ଯେତେବେଳେ ପୁରା ପରିବାର ରାଜି ହୋଇଯାଇଥିଲା, ବଳପୂର୍ବରୁ ବିବାହ କରିବାକୁ ଉଦ୍ୟମ କରିଥିଲେ । ହେଲେ ଏଥିରେ ରାଜି ନହେବାରୁ ସାନ ଝିଅ ଓ ମାଙ୍କୁ ଘରୁ ବାହାର କରିଦେଇଛନ୍ତି ପରିବାର ଲୋକ । ବିବାହ ପ୍ରସ୍ତାବରେ ରାଜି ହେବାକୁ ସାନ ଝିଅ ଉପରେ ୫ ବର୍ଷ ହେଲା ଚାପ ପକାଇ ଆସୁଛନ୍ତି ମାଆକୁ ଛାଡି ପୁରା ପରିବାର । ହେଲେ ବାରମ୍ବାର କହିବା ସତ୍ୱେ ରାଜି ନହେବାରୁ ସାନ ଝିଅ ଓ ମାଙ୍କୁ ଘରୁ ବାହାର କରିଦେଇଛନ୍ତି ।
୨୦୧୬ ମସିହାରୁ ଏନେଇ ଥାନାରେ ମାମଲା ହୋଇଥିଲେ ବି, ସ୍ଥାନୀୟ ପୁଲିସର ଅସହଯୋଗ ଯୋଗୁଁ କୌଣସି ସମାଧାନ ବାହାରି ପାରିନାହିଁ । ଏମିତି କି ପୂର୍ବରୁ କୋର୍ଟ ମା ଓ ଝିଅଙ୍କୁ କ୍ଷତିପୂରଣ ଦେବା ପାଇଁ ମଧ୍ୟ ନିର୍ଦ୍ଦେଶ ଦେଇଥିଲେ । ହେଲେ କୌଣସି ଫଳ ହେଲା ନାହିଁ । ଏବେ ଏଡିଜେ କୋର୍ଟରେ ମାମଲା ଚାଲିଛି । ଏହି ମାମଲାର ପରବର୍ତୀ ଶୁଣାଣି ଆସନ୍ତା ୨୦ତାରିଖ ହେବ । ଆଉ ଏହାରି ଭିତରେ ମୁଣ୍ଡ ଗୁଞ୍ଜିବାକୁ ସଂଘର୍ଷ କରୁଛନ୍ତି କୃପାସିନ୍ଧୁ ସେଠିଙ୍କ ସାନ ଝିଅ ଓ ତାଙ୍କ ପତ୍ନୀ । ବଡ଼ କଥା ହେଉଛି, ଏହି ପୁରା କାହାଣୀରେ ଆଉ ଜଣେ ବ୍ୟକ୍ତିଙ୍କ ଭୂମିକା ସମସ୍ତଙ୍କୁ ଆଶ୍ଚର୍ଯ୍ୟ କରି ଦେଇଛି । ଭିଣୋଇ ଯାହାଙ୍କର ୨ଟି ଝିଅ ଅଛନ୍ତି, ସେଭଳି ଜଣେ ବ୍ୟକ୍ତି ଆଉ ଥରେ ବିବାହ କରିବା ପାଇଁ ଜିଦ୍ ଧରି ବସିବା ସମସ୍ୟାକୁ ବଢ଼ାଇ ଦେଇଛି ।