୨୧ ଜାନୁଆରୀରେ ଚାଷୀଙ୍କୁ ଭେଟିବ ସୁପ୍ରିମକୋର୍ଟଙ୍କ ଦ୍ୱାରା ଗଠିତ କମିଟି । ଏବେ ବଡ଼ ପ୍ରଶ୍ନ, କମିଟି ସହ ଆଲୋଚନା କରିବେ କି ନାହିଁ ଚାଷୀ?
କନକ ବ୍ୟୁରୋ : ଚାଷୀ ଆନ୍ଦୋଳନ ଜାରି ରହିଥିବା ବେଳେ ୨୧ ଜାନୁଆରୀରେ ଚାଷୀଙ୍କୁ ଭେଟିବ ସୁପ୍ରିମକୋର୍ଟଙ୍କ ଦ୍ୱାରା ଗଠିତ କମିଟି । ମଙ୍ଗଳବାର ଦିଲ୍ଲୀରେ କମିଟିର ପ୍ରଥମ ବୈଠକ ବସିଥିଲା । ଏଥିରେ କମିଟିର ୩ ଜଣ ଯାକ ସଦସ୍ୟ ଡକ୍ଟର ଅଶୋକ ଗୁଲାଟି, ପ୍ରମୋଦ ଯୋଶୀ ଓ ଅନୀଲ ଘନୱତ ଉପସ୍ଥିତ ଥିଲେ ।
Kanak News is now on WhatsApp
Join and get latest news updates delivered to you via WhatsApp
ବୈଠକ ପରେ କମିଟିର ସଦସ୍ୟ ଅନୀଲ ଘନୱତ କହିଛନ୍ତି ଯେ, କମିଟି ଚାଷୀଙ୍କ ସହ ଗୁରୁବାର ଆଲୋଚନା କରିବ । ଚାଷୀ ଯଦି ଚାହିଁବେ ବ୍ୟକ୍ତିଗତ ଭାବେ ଭେଟି କଥା ହେବେ, ନଚେତ୍ ଭିଡିଓ କନଫେରେନ୍ସିଂ ମାଧ୍ୟମରେ ମଧ୍ୟ ଏହି ଆଲୋଚନା ହୋଇପାରିବ । ଏହାସହ କମିଟି ସଦସ୍ୟ କହିଛନ୍ତି ଯେ, କେବଳ ଚାଷୀ ନୁହେଁ, ସରକାର ଚାହିଁଲେ ମଧ୍ୟ କମିଟି ଆଲୋଚନା କରିବ ।
ତେବେ କମିଟି ଆଗରେ ଏବେ ସବୁଠୁ ବଡ଼ ପ୍ରଶ୍ନ ହେଉଛି ଆନ୍ଦୋଳନକାରୀ ଚାଷୀ କଥା ହେବେ କି ନାହିଁ । କମିଟି ଆଗରେ ହାଜର ହେବେ ନାହିଁ ବୋଲି ପୂର୍ବରୁ ଚାଷୀନେତା ଏକାଧିକ ବାର କହିସାରିଛନ୍ତି । ଏହାସହ କମିଟିର ସଦସ୍ୟମାନେ ସରକାର ସପକ୍ଷବାଦୀ ବୋଲି ଚାଷୀନେତା ଅଭିଯୋଗ କରିସାରିଛନ୍ତି । ଏପରିକି ଏହି ଅଭିଯୋଗ ପରେ କମିଟିର ସଦସ୍ୟ ପଦରୁ ଚାଷୀ ନେତା ଭୂପିନ୍ଦର ସିଂ ମାନ ନିଜକୁ ଦୂରେଇ ନେଇଥିଲେ ।
ନୂଆ କୃଷି ଆଇନ ଲାଗୁ ଉପରେ ଏବେ ସୁପିମକୋର୍ଟ ସ୍ଥଗିତାଦେଶ ଲଗାଇଛନ୍ତି । ଏହାସହ କୃଷି ଆଇନ ଉପରେ ରିପୋର୍ଟ ଦେବାକୁ ଏକ ୪ ଜଣିଆ କମିଟି ଗଠନ କରିଥିଲେ ସର୍ବୋଚ୍ଚ ନ୍ୟାୟାଳୟ ।