କନକ ବ୍ୟୁରୋ : ହୋହାଲ୍ଲା ହଙ୍ଗାମା, ପ୍ରତିବାଦ, ବିରୋଧ ପ୍ରଦର୍ଶନ । କେଉଁଠି ରାସ୍ତା ଉପରେ ପ୍ରଦର୍ଶର୍ନକାରୀ ତ ପୁଣି କେଉଠି ରାସ୍ତା ରୋକ କରୁଛନ୍ତି ବିକ୍ଷୋଭକାରୀ । ଟାୟାର ଜାଳି, ନିଆଁ ଲଗାଇ ନିଜ ଦାବି ଜଣାଉଛନ୍ତି । କେବଳ ସେତିକି ନୁହେଁ ଭାରତ ବନ୍ଦ ନାଁରେ କେଉଁଠି ରେଳ ରୋକ କରାଯାଇଛି ତ ପୁଣି କେଉଁଠି ଚକାଜାମ କରିଛନ୍ତି ବିକ୍ଷୋଭାକାରୀ । ଏହି ସବୁ ଥିଲା ଦେଶର ବିଭିନ୍ନ ରାଜ୍ୟରୁ ଆସିଥିବା ଭିନ୍ନ ଭିନ୍ନ ଦୃଶ୍ୟ । କେନ୍ଦ୍ର ସରକାରଙ୍କ ଅଗ୍ନିପଥ ଯୋଜନାକୁ ବିରୋଧ କରି ବିଭିନ୍ନ ରାଜନୈତିକ ଦଳ ଓ ଛାତ୍ର ସହ ବିଭିନ୍ନ ସଂଗଠନ ଆଜି ଦେଇଥିଲେ ୧୨ଘଣ୍ଟିଆ ବନ୍ଦ ଡାକରା
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ସରକାରଙ୍କ ଏହି ଯୋଜନା ବିରୋଧରେ ଦେଶର ଅଧାରୁ ଅଧିକ ରାଜ୍ୟରେ ବିରୋଧ ପ୍ରଦର୍ଶନ ଜାରି ରହିଛି । ଆନ୍ଦୋଳନ ଭିତରେ ଆଜି ବିଭିନ୍ନ ସଂଗଠନ ଭାରତ ବନ୍ଦ ଡାକରା ଦେଇଥିଲେ । ସ୍ଥିତିକୁ ଦୃଷ୍ଟିରେ ରଖି ସମ୍ବେଦନଶୀଳ ସ୍ଥାନରେ କଡ଼ାସୁରକ୍ଷା ବନ୍ଦୋବସ୍ତ କରାଯାଇଛି । ସେପଟେ ଉପଦ୍ରବକାରୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ସ୍ଥାନୀୟ ପ୍ରଶାସନ ନିର୍ଦ୍ଦେଶ ଦେଇଛି । ଏଥିସହ ହିଂସା ସୃଷ୍ଟି କରୁଥିବା ଲୋକଙ୍କୁ ଚିହ୍ନଟ ପାଇଁ ମୋବାଇଲ, ସିସିଟିଭି, କ୍ୟାମେରାରେ କଏଦ ହୋଇଥିବା ଫଟୋକୁ ଡିଜିଟାଲ ସାକ୍ଷୀଭାବେ ସଂଗ୍ରହ କରିବାକୁ ନିର୍ଦ୍ଦେଶ ଦିଆଯାଇଛି ।
ଦିଲ୍ଲୀ, ଚେନ୍ନାଇ, କୋଲକାତା ପରି କିଛି ସହରରେ ଭାରତ ବନ୍ଦର ବିଶେଷ ପ୍ରଭାବ ଦେଖିବାକୁ ମିଳିଛି । ସେପଟେ ଆଉ କିଛି ରାଜ୍ୟରେ ସ୍ଥିତି ନିୟନ୍ତ୍ରଣ ଭିତରେ ରହିଛି । ସେପେଟ ଅଗ୍ନିପଥ ଯୋଜନା ବିରୋଧରେ ମିଥ୍ୟା ଖବର ପ୍ରଚାର ଉପରେ ରୋକ ଲଗାଇବା ପାଇଁ କଡ଼ା ଆଭିମୁଖ୍ୟ ଗ୍ରହଣ କରିଛି କେନ୍ଦ୍ର ଗୃହମନ୍ତ୍ରାଳୟ । ୩୫ଟି ହ୍ୱାଟସଅପ ଗ୍ରୁପକୁ ନିଷିଦ୍ଧ କରାଯାଇଛି ।
ଭାରତ ବନ୍ଦ ଭିତରେ ଯାତାୟତ ବେଶ ବାଧାପ୍ରାପ୍ତ ହୋଇଛି । ବିଶେଷ କରି ରେଳ ଓ ବସ ସେବା ସବୁଠୁ ଅଧିକ ପ୍ରଭାବିତ ହେବା ଯୋଗୁଁ ଯାତ୍ରୀ ନାହିଁ ନଥିବା ସମସ୍ୟାରେରେ ପଡିଛନ୍ତି । ପାଖାପାଖି ୬ଶହ ଟ୍ରେନ ବାତିଲ ହେବା ସହ କିଛି ଟ୍ରେନର ରୁଟ ବଦଳାଯାଇଛି । ରେଳଷ୍ଟେସନରେ ଘଣ୍ଟା ଘଣ୍ଟା ଧରି ଅପେକ୍ଷା କରି ବସିଥିବା ଯାତ୍ରୀଙ୍କ ସମସ୍ୟା ଦେଖିବାକୁ ମିଳିଛି ।
ମେ ୧୪ରେ କେନ୍ଦ୍ର ସରକାର ସେନାରେ ନୂଆ ଭର୍ତ୍ତି ପ୍ରକିୟା ଆରମ୍ଭ କରି ଅଗ୍ନିପଥ ଯୋଜନା ଆରମ୍ଭ କରିଥିଲେ । ଯାହାକୁ ଯୁବବର୍ଗ, ପୂର୍ବତନ ସେନାଅଧିକାରୀ ଓ କିଛି ରାଜନୈତିକ ଦଳ ଘୋର ବିରୋଧ କରୁଛନ୍ତି । ସ୍ଥିତିକୁ ଦେଖି ସରକାର ଯୋଜନାରେ କିଛି ପରିବର୍ତ୍ତନ ମଧ୍ୟ କଲେ. ହେଲେ ସ୍ଥିତି ଶାନ୍ତ ହେବା ବଦଳରେ ଦିନକୁ ଦିନ ଉଗ୍ର ହେଉଛି । କୌଣସି ପରିସ୍ଥିିତିରେ ଅଗ୍ନିପଥ ଯୋଜନା ପ୍ରତ୍ୟାହାର କରାଯିବନି ବୋଲି ସଫା ସଫା କହିଛନ୍ତି ଉଭୟ ସରକାର ଓ ସେନା । ଗୋଟେ ପଟେ ବିରୋଧାଭାସ ଓ ଅନ୍ୟପଟେ ସରକାରଙ୍କ ନିଷ୍ପତି । ଏହା ଭିତରେ ଦେଶର କୋଟି କୋଟି ସମ୍ପତି ନଷ୍ଟ ହେଉଛି । ଏବେ ପ୍ରଶ୍ନ ଉଠୁଛିି ସରକାରଙ୍କ ଏହି ଯୋଜନାରେ ପ୍ରକୃତରେ କିଛି ବ୍ୟତିକ୍ରମ ରହିଛି ନାଁ ଏହାକୁ ଜାଣିଶୁଣି ରାଜନୈତିକ ପ୍ରସଙ୍ଗ ଭାବେ ଛିଡା କରି ଯୋଜନାରେ ନିଆଁ ଲଗାଯାଉଛି ।