ରାଜ୍ୟରେ ବର୍ଷକୁ ୯୨.୫% ଇଞ୍ଜିନିୟର୍‌ ବେକାର : ଦକ୍ଷତା ବିକାଶରୁ ଲାଭ କେତେ?

ରାଜ୍ୟ ଦକ୍ଷତା ବିକାଶ କତ୍ତୃର୍ପକ୍ଷଙ୍କ ଅଧୀନରେ ନିଯୁକ୍ତିଭିତ୍ତିକ ତାଲିମ କାର୍ଯ୍ୟକ୍ରମ ପାଇଁ ରାଜ୍ୟ ସରକାର ଗତ ୫ ବର୍ଷ (୨୦୧୪-୧୫ରୁ ୨୦୧୮-୧୯) ମଧ୍ୟରେ ନିଜସ୍ୱ ପାଣ୍ଠିରୁ ୪୧ କୋଟି ୨୮ ଲକ୍ଷ ୧,୦୫୫ ଟଙ୍କା ଓ ପ୍ରଧାନମନ୍ତ୍ରୀ କୌଶଳ ବିକାଶ ଯୋଜନା ଅନୁଦାନରୁ ୨୭ କୋଟି ୭୧ ଲକ୍ଷ ୪୯ ହଜାର ୧୮୪ ଟଙ୍କା (ମୋଟ ୬୮ କୋଟି ୯୯ ଲକ୍ଷ ୫୦ ହଜାର ଟଙ୍କା) ବ୍ୟୟ କରି ୫୫ ହଜାର ୬୭୦ ଜଣ ଯୁବକ-ଯୁବତୀଙ୍କୁ ତାଲିମ ପ୍ରଦାନ କରିଥିଲେ। ସେମାନଙ୍କ ମଧ୍ୟରୁ ମାତ୍ର ୧୩, ୪୮୩ ଜଣ ଅର୍ଥାତ ୨୪% ନିଯୁକ୍ତି ପାଇଛନ୍ତି। ସୁତରାଂ ନିଯୁକ୍ତି ଲକ୍ଷ୍ୟରେ ଦକ୍ଷତା ବିକାଶ ତାଲିମ ନେଉଥିବା ପ୍ରାର୍ଥୀଙ୍କ ମଧ୍ୟରେ ୭୬% ବେକାର ବୋଲି ଦକ୍ଷତା ବିକାଶ ମନ୍ତ୍ରୀ ପ୍ରେମାନନ୍ଦ ନାୟକ ପରୋକ୍ଷରେ ସ୍ୱୀକାର କରିଛନ୍ତି। ବିଧାୟକ ସୌମ୍ୟ ରଂଜନ ପଟ୍ଟନାୟକଙ୍କ ନିର୍ଦ୍ଦିଷ୍ଟ ପ୍ରଶ୍ନର ଉତ୍ତରରେ ମନ୍ତ୍ରୀ ବିଧାନସଭାରେ ଉପରୋକ୍ତ ତଥ୍ୟ ଦେଇଥିବାବେଳେ ଶିଳ୍ପ ସମୃଦ୍ଧ ଜିଲ୍ଲାଗୁଡ଼ିକରେ ନଗଣ୍ୟ ସଂଖ୍ୟକ ଯୁବକ-ଯୁବତୀ ଦକ୍ଷତା ବିକାଶ ତାଲିମରେ ସାମିଲ ହେବା ଭଳି ଆଉ ଏକ ବିଘଟଣ ବିସ୍ମୟ ସୃଷ୍ଟି କରିଛି।

ମନ୍ତ୍ରୀଙ୍କ ତଥ୍ୟ ଅନୁସାରେ, ଏହି ୫ ବର୍ଷ ମଧ୍ୟରେ ରାଜ୍ୟରେ ମୋଟ ୫୫,୬୭୦ ଜଣଙ୍କୁ ଦକ୍ଷତା ବିକାଶ ତାଲିମ ଦିଆଯାଇଥିବାବେଳେ ଶିଳ୍ପସମୃଦ୍ଧ ଝାରସୁଗୁଡ଼ା ଜିଲ୍ଲାର ମାତ୍ର ୨୮୮ ଜଣ (୦.୫୧%), ଅନୁଗୁଳ ଜିଲ୍ଲାର ୧୨୨୦ ଜଣ (୨.୧%), ଢେଙ୍କାନାଳ ଜିଲ୍ଲାର ୧୭୭୩ ଜଣ (୩.୧%), ଦେଶର ଇସ୍ପାତ ରାଜଧାନୀ ଯାଜପୁର ଜିଲ୍ଲାରୁ ୧୧୭୬ ଜଣ (୨.୧%) ଏବଂ ରାଜ୍ୟ ତଥା ଦେଶର ଖଣିଜ ଶିଳ୍ପଗୁଡ଼ିକୁ କଞ୍ଚାମାଲ ଯୋଗାଉଥିବା କେନ୍ଦୁଝର ଜିଲ୍ଲାର ମାତ୍ର ୧୬୯୦ ଜଣ (୩%) ଯୁବକ-ଯୁବତୀ ଏହି ୫ ବର୍ଷରେ ଦକ୍ଷତା ତାଲିମ ପାଇଛନ୍ତି। ତେବେ କେଉଁ କାରଣରୁ ରାଜ୍ୟର ଖଣି ତଥା ଶିଳ୍ପସମୃଦ୍ଧ ଅଞ୍ଚଳର ଯୁବକ-ଯୁବତୀମାନେ ଦକ୍ଷତା ବିକାଶ ତାଲିମ ସୁଯୋଗରୁ ବଞ୍ଚିତ, ତାହା ଜଣାପଡୁନାହିଁ।