କନକ ବ୍ୟୁରୋ : ଚୀନରେ କରୋନା ସଂକ୍ରମଣ ମାମଲା ବଢ଼ିବାରେ ଲାଗିଛି । ଏହାସହିତ ଭାରତ, ଜାପାନ ଓ ଆମେରିକା ଭଳି ଦେଶରେ ମଧ୍ୟ ନୂଆ ଲହରର ବିପଦ ଦେଖା ଦେଇଛି । ଏହାରି ଭିତରେ ଚୀନର ପେକିଂ ୟୁନିଭର୍ସିଟିର ସର୍ଭେ ରିପୋର୍ଟ ଚକିତ କରିଛି । ରିପୋର୍ଟ ଅନୁସାରେ, ଜାନୁଆରୀ ୧୧ ତାରିଖ ସୁଦ୍ଧା ଦେଶରେ ୬୪ ପ୍ରତିଶତ ଅର୍ଥାତ୍ ୯୦ କୋଟି ଲୋକେ କରୋନାରେ ସଂକ୍ରମିତ ହୋଇସାରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରିପୋର୍ଟରେ ଆହୁରି କୁହାଯାଇଛି, ଗାଂସୁ ପ୍ରଦେଶର ୯୧ ପ୍ରତିଶତ ଜନସଂଖ୍ୟା, ହେନାନ ପ୍ରଦେଶର ୮୯ ପ୍ରତିଶତ, ୟୁନାନର ୮୪ ପ୍ରତିଶତ ଏବଂ କିଂଘାଇର ୮୦ ପ୍ରତିଶତ ଲୋକେ ସଂକ୍ରମିତ ହୋଇଛନ୍ତି । ସେପଟେ ଆଗାମୀ ଦୁଇରୁ ତିନି ମାସ ମଧ୍ୟରେ ଚୀନରେ କୋଭିଡ୍ ସଂକ୍ରମଣ ଶୀର୍ଷରେ ପହଂଚିବା ସହ ଗ୍ରାମାଂଚଳରେ ଅଧିକ ସଂକ୍ରମିତ ହେବା ନେଇ ଚୀନର ସ୍ୱାସ୍ଥ୍ୟ ବିଶେଷଜ୍ଞ ଜେଙ୍ଗ ଗୁଆଙ୍ଗ ଦାବି କରିଛନ୍ତି । ଗ୍ରାମାଂଚଳରେ କରୋନା ସଂକ୍ରମଣ ବ୍ୟାପିବା ପଛରେ ଜାନୁଆରୀ ୨୧ ତାରିଖରୁ ଆରମ୍ଭ ହୋଇଥିବା ଲୁନାର ନ୍ୟୁଇୟର ଛୁଟିକୁ ଦାୟୀ କରାଯାଇଛି । ଚୀନରେ ନୂଆବର୍ଷରେ ସଂକ୍ରମଣ ଦ୍ରୁତ ଗତିରେ ବ୍ୟାପିବାରେ ବୋଲି ଡବ୍ଲ୍ୟୁଏଚଓ ମଧ୍ୟ ଚେତାବନୀ ଦେଇଥିଲା । ସୂଚନା ଅନୁସାରେ, ଜନତାଙ୍କ ବିରୋଧ ପ୍ରଦର୍ଶନ ପରେ ଚୀନରେ ଗତବର୍ଷ ନଭେମ୍ବରରେ କୋଭିଡ୍ ସମ୍ବନ୍ଧିତ ସମସ୍ତ କଟକଣା ହଟାଯାଇଥିଲା ଏବଂ ଗତ ସପ୍ତାହରୁ ସୀମାଗୁଡ଼ିକୁ ମଧ୍ୟ ଖୋଲିଦିଆଯାଇଥିଲା । କଟକଣା କୋହଳ ହେବା ଦ୍ୱାରା ଚୀନରେ ସଂକ୍ରମଣ ଅଧିକ ବ୍ୟାପିଥିଲା ।