କନକ ବ୍ୟୁରୋ: ରେଳ ଦୁର୍ଘଟଣାରେ ମୟୁରଭଞ୍ଜର ଦୁଃଖ । କରମଣ୍ଡଳ ଦୁର୍ଘଟଣାକୁ ୫ ଦିନ ବିତିଯାଇଛି । କୁଢ଼ କୁଢ଼ ଶବ ମଧ୍ୟରେ ହଜିଯାଇଛି ଶହଶହ ପରିବାରର ହସ ଖୁସି ଓ ଭବିଷ୍ୟତ । ତେବେ ସରକାରୀ ତଥ୍ୟ ଅନୁସାରେ ଏହି ଦୁର୍ଘଟଣା ଓଡ଼ିଶାରୁ ୩୯ ଜଣଙ୍କ ଜୀବନ ନେଇଛି କରମଣ୍ଡଳ । ସେମାନଙ୍କ ମଧ୍ୟରେ ମୟୂରଭଂଜରୁ ୯ ଜଣ ରହିଛନ୍ତି । ସେହିଭଳି ଜିଲ୍ଲାର ୨୦ରୁ ଅଧିକ ଯାତ୍ରୀ ଗୁରୁତର ଅବସ୍ଥାରେ ବିଭିନ୍ନ ଡାକ୍ତରଖାନାରେ ଭର୍ତି ହୋଇଛନ୍ତି । ମୃତକଙ୍କ ମଧ୍ୟରେ ଅଛନ୍ତି ମୋରଡ଼ା ବ୍ଲକ୍ ଅନ୍ତର୍ଗତ ପୁଟକିଶୋଳ ଗାଁର ୪ ଜଣ ସାଙ୍ଗ । ୪ ଜଣ ଯୁବକ ସାଙ୍ଗ ରୋଜଗାର ଆଶାରେ ଚେନ୍ନାଇ ଯାଉଥିଲେ । ବାଲେଶ୍ୱରରୁ କରମଣ୍ଡଳ ଟ୍ରେନରେ ଚଢିଥିଲେ । ମାତ୍ର କେଇ ମିନିଟ୍ ରେଳ ଯାତ୍ରା କରିବା ପରେ ସବୁ ସ୍ୱପ୍ନ ଧୂଳିସାତ ହୋଇଗଲା । ଶୁକ୍ରବାର ସଂଧ୍ୟାର ସେଇ ଦୁର୍ଘଟଣାରେ ୩ ଜଣ ସାଙ୍ଗଙ୍କ ମୃତ୍ୟୁ ହୋଇଥିବା ବେଳେ ଏବେ ବି ଆଉ ଜଣଙ୍କ ପତା ମିଳୁନାହିଁ । ତେବେ ମୃତକ ତିନି ଜଣ ହେଉଛନ୍ତି – ଭାରତ ଦାସ, କୀର୍ତନ ସି ଓ ସତ୍ୟନାଥ ପାଟବନ୍ଧା । ଏବଂ ନିଖୋଜ ଯୁବକ ଜଣକ ହେଉଛନ୍ତି ବ୍ରହ୍ମାକାନ୍ତ ଦାସ ।
Kanak News is now on WhatsApp
Join and get latest news updates delivered to you via WhatsApp
ରୋଜଗାରର ସ୍ୱପ୍ନ ନେଇ ଚେନ୍ନାଇ ଯାଉଥିବା ପୁଅ ଶବ ହୋଇଯିବା ପରେ ପରିବାର ଦୁଃଖ ଆଖିରେ ନଦେଖିଲେ ବିଶ୍ୱାସ କରି ହେବ ନାହିଁ । ସେହିଭଳି ବାଙ୍ଗିରିପୋଷି ବ୍ଲକ୍ ସୋରିଷପାଳ ଗାଁର ଶଙ୍କର ମାର୍ଣ୍ଡି ଚେନ୍ନାଇ ଯାଉଥିବା ବେଳେ ତାଙ୍କର ମୃତ୍ୟୁ ହୋଇଛି । ଆନ୍ଦୋଳା ଗାଁର କୃଷ୍ଣଚନ୍ଦ୍ର ସାହୁଙ୍କ ଇଂଜିନିୟରିଂ ପଢ଼ୁଥିବା ପୁଅ ଜଗଦୀଶ ସାହୁ କଟକ ଯାଉଥିଲେ । ହେଲେ ତାଙ୍କୁ ଜଣାନଥିଲା ଶୁକ୍ରବାରର କରମଣ୍ଡଳ ଟ୍ରେନ ତାଙ୍କୁ କଟକରେ ପହଂଚାଇବା ବଦଳରେ ମଶାଣିରେ ପହଂଚାଇ ଦେବ । ଏହାସହ କପ୍ତିପଦା ବ୍ଲକ୍ ସୌଭାଗ୍ୟପୁରର ରଜନୀକାନ୍ତ ବେହେରା, ଜିବି ନଗର ବ୍ଲକ୍ କୁଶଳଦାର ଗଣେଶ୍ୱର ସିଂ, କୁଳିଅଣା ବ୍ଲକ୍ ଗେଣ୍ଡାପୋଖରୀ ଗାଁର ସୁନାରାମ ହାଁସଦାଙ୍କ ଜୀବନ କରମଣ୍ଡଳ ନେଇଛି । ରାସଗୋବିନ୍ଦପୁର ବ୍ଲକ୍ ମଙ୍ଗଳପୁର ଗାଁର ମୃତୁଞ୍ଜୟ ଦାସଙ୍କ ଦୁଇ ପୁଅ ଅନୁରାଗ ଓ ଦିବୈନ୍ଦୁ ଖୋର୍ଦ୍ଧାରେ ସିଟି ପରୀକ୍ଷା ଦେଇ ଜୋଶବନ୍ତପୁର- ହାୱଡା ଏକ୍ସପ୍ରେସରେ ଘରକୁ ଫେରୁଥିଲେ । ଆଉ ମାତ୍ର ୮ ରୁ ୧୦ ମିନିଟ୍ ମଧ୍ୟରେ ବାଲେଶ୍ୱର ଷ୍ଟେସନରେ ପହଂଚି ଘରକୁ ଯାଇଥାନ୍ତେ । ହେଲେ ବାହାନଗା ଦୁର୍ଘଟଣାରେ ସବୁ ଓଲଟପାଲଟ ହୋଇଗଲା । ଟ୍ରେନ ଦୁର୍ଘଟଣାରେ ବଡ଼ଭାଇ ଅନୁରାଗଙ୍କର ମୃତ୍ୟୁ ହୋଇଥିବା ବେଳେ ସାନ ଭାଇ ଦିବୈନ୍ଦୁ ଏବେ ହସ୍ପିଟାଲ ବେଡ଼ରେ ମୃତ୍ୟୁ ସହ ସଂଗ୍ରାମ କରୁଛି । ତେବେ ଲୌହ ଦାନବର ରକ୍ତଭୋଜିର ସେଇ କାଳ ରାତ୍ରୀକୁ ଦେଶବାସୀ ଚାହିଁଲେ ମଧ୍ୟ କେବେ ଭୁଲି ପରିବେନି । ମୃତକଙ୍କ ପରିବାରକୁ ଏବେ ସରକାର ସହାୟତାରାଶି ପ୍ରଦାନ କରୁଛନ୍ତି, ହେଲେ ଏତେ ବଡବଡ ମୂଲ୍ୟବାନ ଜୀବନ ବିନିମୟରେ କେଇଟା ଟଙ୍କା କେବେବି ଗୋଟିଏ ଅସଯୋଡ଼ା ପରିବାରକୁ ସଜାଡି ପାରିବ ନାହିଁ ।