ଚୀନରେ ଅଣାୟତ ହୋଇପଡ଼ିଛି କରୋନା ସଂକ୍ରମଣ । ମାସକରେ ୬୦ହଜାର କରୋନାଜନିତ ମୃତ୍ୟୁ ହୋଇଥିବା ସୂଚନା ଦେଲେ ଚୀନ୍ ସରକାର
କନକ ବ୍ୟୁରୋ : ଚୀନରେ କରୋନା ଭାଇରସ ଆତଙ୍କ ଖେଳାଇଛି । ପ୍ରତିଦିନ ଲକ୍ଷାଧିକ ଲୋକେ ସଂକ୍ରମିତ ହେଉଥିବା ନେଇ ସୂଚନା ମିଳିଛି । ତେବେ କରୋନାରେ ଦେଶରେ କେତେ ଲୋକଙ୍କ ମୃତ୍ୟୁ ହୋଇଛି, ତା’ର ତଥ୍ୟ ପ୍ରଥମଥର ପ୍ରକାଶ କରିଛି ଚୀନ୍ । ଗତବର୍ଷ ଡିସେମ୍ବରରୁ ଏପର୍ଯ୍ୟନ୍ତ ୫୯ହଜାର ୯୩୮ ଲୋକଙ୍କର କୋଭିଡଜନିତ ମୃତ୍ୟୁ ହୋଇଥିବା ସ୍ପଷ୍ଟ କରିଛି । ଏହା ପୂର୍ବରୁ ଚୀନ୍ ଦାବି କରିଆସୁଥିଲା ଯେ ଦେଶରେ ମହାମାରୀ ନିୟନ୍ତ୍ରଣରେ ରହିଛି । କିନ୍ତୁ ଗତ ଦେଢ଼ମାସରେ କରୋନାଜନିତ ମୃତ୍ୟୁ ଦର୍ଶାଉଛି ଯେ ଚୀନରେ ଏହି ମହାମାରୀ କେତେ ବ୍ୟାପକ କ୍ଷତି ପହଂଚାଇଛି । ଚୀନରେ କରୋନାରେ କେତେ ଲୋକଙ୍କ ଜୀବନ ଯାଇଛି, ସେନେଇ ସମ୍ପୂର୍ଣ୍ଣ ତଥ୍ୟ ପ୍ରକାଶ ନକରିବା ନେଇ ବିଶ୍ୱ ସ୍ୱାସ୍ଥ୍ୟ ସଂଗଠନ ସମାଲୋଚନା କରିଥିଲା । ଯାହା ପରେ ଚୀନ୍ ମୃତ୍ୟୁ ସଂଖ୍ୟା ସାର୍ବଜନୀନ କରିଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ସ୍ୱାସ୍ଥ୍ୟ ଆୟୋଗ ରିପୋର୍ଟ ଅନୁସାରେ, ଗତବର୍ଷ ଡିସେମ୍ବର ୮ରୁ ଜାନୁଆରୀ ୧୨ ତାରିଖ ସୁଦ୍ଧା ଦେଶରେ ୫୯ହଜାର ୩୩୮ ଜଣଙ୍କର ମୃତ୍ୟୁ ହୋଇଛି । କରୋନା ଭାଇରସ ଯୋଗୁଁ ଶ୍ୱାସକ୍ରିୟାରେ ସମସ୍ୟା ହୋଇ ୫ହଜାର ୫୫୦୩ ଜଣଙ୍କ ମୃତ୍ୟୁ ହୋଇଥିବା ବେଳେ ୫୪ହଜାର ୪୩୫ ଜଣଙ୍କର କରୋନା ସହ ଅନ୍ୟ ସ୍ୱାସ୍ଥ୍ୟ ସମସ୍ୟା ପାଇଁ ମୃତ୍ୟୁ ହୋଇଛି । କରୋନାରେ ମୃତ୍ୟୁ ହୋଇଥିବା ୯୦ ପ୍ରତିଶତରୁ ଅଧିକ ଲୋକଙ୍କର ବୟସ ୬୫ ବର୍ଷରୁ ଅଧିକ ବୋଲି ଚୀନର ସ୍ୱାସ୍ଥ୍ୟ ଅଧିକାରୀମାନେ କହିଛନ୍ତି । ସେପଟେ ଚୀନ୍ ରାଜଧାନୀ ବେଜିଂର ପ୍ରାୟ ସମସ୍ତ ୨୨ ନିୟୂତ ଲୋକ ଜାନୁଆରୀ ସୁଦ୍ଧା କୋଭିଡ୍ ସଂକ୍ରମିତ ହେବା ନେଇ ଏକ ନୂଆ ଅଧ୍ୟୟନରୁ ଜଣାପଡ଼ିଛି । ବେଜିଂର ପ୍ରାୟ ୭୬ ପ୍ରତିଶତ ଲୋକ ୨୦୨୨ ଡିସେମ୍ବର ସୁଦ୍ଧା ସଂକ୍ରମିତ ହୋଇଥିବା ବେଳେ ଜାନୁଆରୀ ଶେଷ ସୁଦ୍ଧା ଏହି ସଂଖ୍ୟା ୯୨ ପ୍ରତିଶତରେ ପହଂଚିବ ବୋଲି ରିପୋର୍ଟରେ କୁହାଯାଇଛି