କନକ ବ୍ୟୁରୋ: ଦେହରେ ଧଳା କପଡା, ମୁଣ୍ଡରେ ଜଟା, ଛାତି ଯାଏଁ ଲମ୍ବିଛି ଲମ୍ବା ଦାଢି । ମୁହଁରେ ପଶ୍ଚାତାପର କୌଣସି ଛାପ ନାହିଁ । କୋର୍ଟ ପରିସରରେ ପୁଲିସ ସହ ଚାଲୁଥିବା ଏହି ବ୍ୟକ୍ତି ହେଉଛନ୍ତି ସୋନପୁର ଜିଲ୍ଲା ବାଘପାଲି ଜଙ୍ଗଲରେ ଥିବା ମଠର ମହନ୍ତ ଦାନବିହାରୀ ଶରଣମ୍ ଓରଫ ଦୟାସାଗର ଥାଟୀ । ଉଲ୍ଲୁଣ୍ଡା ବନାଂଚଳରେ କଲରାପତରିଆ ବାଘ ଶିକାର ଅଭିଯୋଗରେ ମହନ୍ତ ଦୟାସାଗର ଥାଟୀଙ୍କ ସହ ୬ ଜଣଙ୍କୁ ଗିରଫ କରିଛି ସୋନପୁର ପୁଲିସ । ବଡ କଥା ହେଉଛି ମଠ ଭିତରୁ ବାଘର ୪ଟି ପଂଝା ଜବତ ହୋଇଛି । ଅନ୍ୟ ଅଭିଯୁକ୍ତଙ୍କ ପାଖରୁ ବାଘ ନଖ ଓ ଦାନ୍ତ ସହ ବିଦ୍ୟୁତ୍ ଫାଶ ପାଇଁ ବ୍ୟବହାର ହୋଇଥିବା ୫୦୦ ଗ୍ରାମର ଜିଆଇ ତାର, ପ୍ଲାଷ୍ଟିକ୍ ରଶି ଜବତ କରାଯାଇଛି । ଗିରଫ ଅଭିଯୁକ୍ତଙ୍କୁ ବୀରମହାରାଜପୁର ଏସଡିଜେଏମ କୋର୍ଟରେ ହାଜର କରିଛି ପୁଲିସ ।
Kanak News is now on WhatsApp
Join and get latest news updates delivered to you via WhatsApp
ସୋନପୁର ଉଲ୍ଲୁଣ୍ଡା ବନାଂଚଳ ବାଘପାଲି ଜଙ୍ଗଲରେ କଲରପତରିଆ ବାଘ ଶିକାର ଘଟଣାରେ ଜଣେ ସନ୍ଥ ମୁଖ୍ୟ ଅଭିଯୁକ୍ତ ଭାବେ ଗିରଫ କରାଯିବା ଘଟଣା ଚର୍ଚ୍ଚା ସୃଷ୍ଟି କରିିଛି । କୁହାଯାଉଛି ମଠ ଭିତରେ ବାଘ ଶିକାର ପାଇଁ ଯୋଜନା ହୋଇଥିଲା ଓ ବାବାଙ୍କ ନିର୍ଦ୍ଦେଶରେ ବାଘ ଶିକାର କରାଯାଇଥିଲା ।
ଉଲ୍ଲୁଣ୍ଡା ବନାଂଚଳରୁ କଲରାପତରିଆ ବାଘ ଶିକାର ମାମଲାରେ ମହନ୍ତ ଦୟାସାଗାର ଥାଟୀଙ୍କ ସହ ୬ ଜଣ ଗିରଫ ହୋଇଛନ୍ତି । ଘଟଣାରେ ସଂପୃକ୍ତ ଅନ୍ୟଅଭିଯୁକ୍ତ ଫେରାର ହୋଇଯାଇଥିବା ଜଣାପଡିଛି । କୁହାଯାଉଛି ବିଦ୍ୟୁତ ଫାସ ବିଛାଇ ବାଘ ଶିକାର ପାଇଁ ମଠରେ ଯୋଜନା ହୋଇଥିଲା । ଆଉ ବିଦ୍ୟୁତ ତାର ସଂସ୍ପର୍ଶରେ ପଡି କଲରାପତରିଆ ବାଘର ମୃତ୍ୟୁ ପରେ ବାଘର ନଖ, ପଂଝା, ଦାନ୍ତ ନେଇ ଘଟଣା ସ୍ଥଳରୁ ଫେରାର ହୋଇଥିଲେ ଅଭିଯୁକ୍ତ । ସେପ୍ଟେମ୍ବର ୧୩ ତାରିଖରେ ଜଙ୍ଗଲକୁ ଛେଲି ଚରାଇବାକୁ ଯାଇଥିବା ଗ୍ରାମବାସୀ ବାଘର ଗଳିତ ମୃତଦେହକୁ ଦେଖି ବନବିଭାଗକୁ ଖବର ଦେଇଥିଲେ । ବନ ବିଭାଗ ଟିମ୍ ବାଘପାଲି ଜଙ୍ଗଲରେ ପହଂଚି ବାଘର ଗଳିତ ମୃତଦେହକୁ ଜବତ କରି ତଦନ୍ତ ଆରମ୍ଭ କରିଥିଲା । ଯାଂଚ ପରେ କଲରାପତରିଆ ବାଘ ଶିକାର ଘଟଣାରେ, ମହନ୍ତ ଦୟାସାଗର ଥାଟୀଙ୍କ ସଂପୃକ୍ତି ଜଣାପଡିଥିଲା । ଏହାପରେ ତତ୍ପରତା ଦେଖାଇ ମହନ୍ତଙ୍କ ସହ ୬ ଅଭିଯୁକ୍ତଙ୍କୁ ବାନ୍ଧିଛି ସୋନପୁର ପୁଲିସ ।