ନବୀନଙ୍କ ମନ୍ତ୍ରିମଣ୍ଡଳରେ ମହିଳାଙ୍କ ଦବଦବା । ୫ ମହିଳା ବିଧାୟିକାଙ୍କୁ ମନ୍ତ୍ରୀ ପଦ ଭେଟି ଦେଲେ ନବୀନ ।
କନକ ବ୍ୟୁରୋ : ନବୀନଙ୍କ ମନ୍ତ୍ରିମଣ୍ଡଳରେ ମହିଳାଙ୍କ ଦବଦବା । ୫ ମହିଳା ବିଧାୟକଙ୍କୁ ନବୀନ କରାଇଲେ ମନ୍ତ୍ରୀ । ସେମାନଙ୍କୁ ଗୁରୁତ୍ୱପୂର୍ଣ୍ଣ ବିଭାଗର ଦାୟିତ୍ୱ ମଧ୍ୟ ଦେଇଛନ୍ତି ନବୀନ । ଏପରି କରି ନବୀନ ମହିଳା ସଶକ୍ତିକରଣ ଉପରେ ଦେଇଛନ୍ତି ବଡ ବାର୍ତା ।
Kanak News is now on WhatsApp
Join and get latest news updates delivered to you via WhatsApp
ମହିଳା ସଶକ୍ତିକରଣକୁ ମୁଖ୍ୟ ନାରା ବନାଇଥିବା ନବୀନ ସରକାର ଏଥର ମନ୍ତ୍ରିମଣ୍ଡଳରେ ବି ସେହି ଆଭିମୁଖ୍ୟ ପ୍ରଦର୍ଶନ କରିଛନ୍ତି । ନୂଆ ମନ୍ତ୍ରିମଣ୍ଡଳରେ ୫ଜଣ ମହିଳାଙ୍କୁ ମନ୍ତ୍ରୀ ପଦ ଦିଆଯାଇଛି । ପ୍ରମିଳା ମଲ୍ଲିକ, ଉଷା ଦେବୀ ଓ ଟୁକୁନି ସାହୁ କ୍ୟାବିନେଟ୍ ମନ୍ତ୍ରୀ ହୋଇଛନ୍ତି । ସେହିପରି ରୀତା ସାହୁ ଓ ବାସନ୍ତୀ ହେମ୍ବ୍ରମ୍ ମଧ୍ୟ ରାଷ୍ଟ୍ରମନ୍ତ୍ରୀ ହୋଇଛନ୍ତି । ୨୦୨୪ ପାଇଁ ଟିମ ପ୍ରସ୍ତୁତ କରୁଛନ୍ତି ନବୀନ । ୫ ଥର ଶାସନ ଗାଦିରେ ବସିବା ପରେ ସବୁ ରେକର୍ଡ ଭାଙ୍ଗିବାକୁ ୨୦୨୪ ପାଇଁ ପ୍ରସ୍ତୁତି ଆରମ୍ଭ ହୋଇଛି । ଏବଂ ନବୀନ ଭଲ ଭାବେ ଜାଣିଛନ୍ତି, ମହିଳାଙ୍କ ସମର୍ଥନ ହିଁ ତାଙ୍କ ରଥରେ ବିଜୟବାନା ଲଗାଇ ପାରିବ ।
ନୂଆ ମନ୍ତ୍ରିମଣ୍ଡଳରେ ପ୍ରମିଳା ମଲ୍ଲିକକଙ୍କୁ ରାଜସ୍ୱ ଭଳି ଗୁରୁତ୍ୱପୂର୍ଣ୍ଣ ବିଭାଗ ଦିଆଯାଇଛି । ବିଞ୍ଝାରପୁର ଆସନରୁ ୫ଥର ନିର୍ବାଚିତ ବିଧାୟିକା ପ୍ରମିଳା ମଲ୍ଲିକଙ୍କ ଉପରେ ଦଳର ମୁଖିଆ ପୁଣି ଆସ୍ଥା ପ୍ରକଟ କରିଛନ୍ତି । ସରକାରୀ ଦଳ ମୁଖ୍ୟ ସଚେତକ ଦାୟିତ୍ୱରେ ରହି ଦଳ ପ୍ରତି ତାଙ୍କ ନିଷ୍ଠା ତାଙ୍କୁ ଏହି ସଫଳତା ଆଣି ଦେଇଛି । ଟିଟିଲାଗଡରୁ ଦୁଇ ଥର ନିର୍ବାଚିତ ହୋଇ ବିଧାନସଭା ଆସନକୁ ଆସିଥିବା ଟୁକୁନି ସାହୁଙ୍କୁ ଜଳସଂପଦ, ବାଣିଜ୍ୟ ଓ ପରିବହନ ବିଭାଗର ଦାୟିତ୍ୱ ମିଳିଛି । ପୂର୍ବରୁ ସେ ମହିଳା ଓ ଶିଶୁ କଲ୍ୟାଣ ମନ୍ତ୍ରୀ ଥିଲେ । ସେହିପରି ଗଂଜାମ ଚିକିଟର ବିଧାୟିକା ଉଷାଦେବୀଙ୍କୁ ଗୃହନିର୍ମାଣ ଓ ସହରାଂଚଳ ବିକାଶ ମନ୍ତ୍ରୀ ଦାୟିତ୍ୱ ମିଳିଛି ।
ପ୍ରଥମ ଥର ପାଇଁ କରଞ୍ଜିଆ ଆସନରୁ ବିଧାନସଭା ଆସିଥିବା ବାସନ୍ତୀ ହେମ୍ବ୍ରମଙ୍କ ଉପରେ ଭରସା କରିଛନ୍ତି ନବୀନ ପଟ୍ଟନାୟକ । ମହିଳା ଓ ଶିଶୁ ବିକାଶ, ମିଶନ ଶକ୍ତି ଭଳି ଗୁରୁ ଦାୟିତ୍ୱ ତାଙ୍କୁ ଦିଆଯାଇଛି । ସେହିପରି ବିଜେପୁର ବିଧାୟିକା ରୀତା ସାହୁଙ୍କୁ ହସ୍ତତନ୍ତ, ବୟନ ଓ ହସ୍ତଶିଳ୍ପ ରାଷ୍ଟ୍ରମନ୍ତ୍ରୀ ଦାୟିତ୍ୱ ଦେଇଛନ୍ତି ମୁଖ୍ୟମନ୍ତ୍ରୀ କୁହାଯାଉଛି ୨୦୨୪ ନିର୍ବାଚନକୁ ଆଖିରେ ରଖି ଟିମ ପ୍ରସ୍ତୁତ କରିଛନ୍ତି ନବୀନ ପଟ୍ଟନାୟକ । ଏହାଛଡା ମହିଳାଙ୍କୁ ଗୁରୁତ୍ୂପୂର୍ଣ୍ଣ ବିଭାଗ ବଂଟନ କରି ମହିଳାଙ୍କ ରାଜନୈତିକ ସଶକ୍ତିକରଣ ସହ ମହିଳା ଭୋଟ ବ୍ୟାଙ୍କକୁ ଆହୁରି ସୁଦୃଢ କରିବାକୁ ଉଦ୍ୟମ କରିଛନ୍ତି ବିଜେଡି ସୁପ୍ରିମୋ ।