ମୋଦୀ ଷ୍ଟାଡିୟମରେ ଚମକିଲେ କୋହଲି । ଦୀର୍ଘ ୩ ବର୍ଷ ପରେ କୋହଲିଙ୍କ ବ୍ୟାଟରୁ ଆସିଲା ଶତକ ।
କନକ ବ୍ୟୁରୋ : ଦୀର୍ଘ ୩ ବର୍ଷ ଅପେକ୍ଷାର ହେଲା ଅନ୍ତ । ମୋଦୀ ଷ୍ଟାଡିୟମରେ କୋହଲିଙ୍କ ଶତକ । ଅଷ୍ଟ୍ରେଲିଆ ବିପକ୍ଷ ଟେଷ୍ଟ ମ୍ୟାଚରେ କୋହିଲଙ୍କ ‘ବିରାଟ’ ଶତକ । ଏହାସହ ଅନ୍ତର୍ଜାତୀୟ କ୍ରିକେଟରେ କୋହଲି ୭୫ ତମ ଶତକ ହାସଲ କରିଛନ୍ତି । ଟେଷ୍ଟରେ ଏହା କୋହଲିଙ୍କର ୨୮ତମ ଶତକ । ସେହିଭଳି ଅଷ୍ଟ୍ରେଲିଆ ବିପକ୍ଷ ଟେଷ୍ଟ ମ୍ୟାଚରେ ଏହା କୋହଲିଙ୍କର ୮ମ ଶତକ । ଅଷ୍ଟ୍ରେଲିଆ ବିପକ୍ଷରେ ଶତକ ସହ କୋହଲି ସୁନୀଲ ଗାଭାସ୍କରଙ୍କ ରେକର୍ଡର ସମକକ୍ଷ ହୋଇଛନ୍ତି । ଗାଭାସ୍କର ମଧ୍ୟ ଅଷ୍ଟ୍ରେଲିଆ ବିପକ୍ଷ ଟେଷ୍ଟ ମ୍ୟାଚରେ ୮ଟି ଶତକ ହାସଲ କରିଛନ୍ତି । କୋହଲିଙ୍କ ଉପରେ କେବଳ ସଚିନ୍ ରହିଛନ୍ତି, ଯିଏ ଅଷ୍ଟ୍ରେଲିଆ ବିପକ୍ଷରେ ୧୧ଟି ଶତକ ହାସଲ କରିଛନ୍ତି । ଟେଷ୍ଟ ମ୍ୟାଚରେ ବିରାଟଙ୍କ ବ୍ୟାଟରୁ ଶେଷଥର ପାଇଁ ୨୨ ନଭେମ୍ବର ୨୦୧୯ରେ ଶତକ ଆସିଥିଲା । ୪୧ଟି ଇନିଂସ ପରେ ବିରାଟ ଏହି ବହୁ ପ୍ରତିକ୍ଷିତ ଶତକ ହାସଲ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ଅନ୍ତର୍ଜାତୀୟ କ୍ରିକେଟରେ ଭାରତ ପାଇଁ ସର୍ବାଧିକ ଟେଷ୍ଟ ଶତକ ହାସଲ କରିବାର ଚତୁର୍ଥ ସ୍ଥାନରେ ରହିଛନ୍ତି କୋହଲି । ଭାରତ ପକ୍ଷରୁ ସଚିନ ସର୍ବାଧିକ ୫୧ଟି ଟେଷ୍ଟ ଶତକ ହାସଲ କରିଥିବା ବେଳେ କୋହଲି ୧୦୮ଟି ମ୍ୟାଚରୁ ୨୮ଟି ଶତକ ହାସଲ କରିଛନ୍ତି । କଙ୍ଗାରୁ ଟିମ ବିପକ୍ଷରେ ଶତକ ସହ ଅନ୍ତର୍ଜାତୀୟ କ୍ରିକେଟରେ ୭୫ଟି ଶତକ ହାସଲ କରିବା ସହ ବିଶ୍ୱର ସର୍ବାଧିକ ଶତକ ହାସଲକାରୀ ଖେଳାଳୀଙ୍କ ତାଲିକାରେ ସଚିନଙ୍କ ପରେ ଦ୍ୱିତୀୟ ସ୍ଥାନରେ ରହିଛନ୍ତି କୋହଲି । ଏହାସହ ପୁଣିଥରେ ଫର୍ମକୁ ଫେରିଛନ୍ତି ଭରସାଯୋଗ୍ୟ ବିରାଟ । କଙ୍ଗାରୁ ଟିମ ବିପକ୍ଷରେ ଶତକ କୋହଲିଙ୍କ ପାଇଁ ଯେତିକି ଗୁରୁତ୍ୱପୂର୍ଣ୍ଣ ଭାରତୀୟ ଟିମ ପାଇଁ ମଧ୍ୟ ସେତିକି ମହତ୍ତ୍ୱପୂର୍ଣ୍ଣ । କାରଣ ଅହମ୍ମଦାବାଦ ଟେଷ୍ଟରେ ବିଜୟୀ ହୋଇ ବିଶ୍ୱ ଟେଷ୍ଟ ଚାମ୍ପିୟନସିପରେ ଫାଇନାଲରେ ସ୍ଥାନ ପକ୍କା କରିବାକୁ ଚାହୁଁଛି ଟିମ୍ ଇଣ୍ଡିଆ । ଆଉ ଏଭଳି ଏକ ଗୁରୁତ୍ୱପୂର୍ଣ୍ଣ ମ୍ୟାଚରେ କୋହଲିଙ୍କ ଶତକ ଟିମ୍ ଇଣ୍ଡିଆକୁ ଦୃଢ ସ୍ଥିତିରେ ପହଞ୍ଚାଇଛି ।