ଅନ୍ଧବିଶ୍ୱାସର ହେଲା ଅନ୍ତ । ଆଠମଲ୍ଲିକ ବେଲଦୁଳା ଗାଁରେ ପ୍ରଥମଥର ପାଇଁ ନିର୍ମାଣ ହେଲା କୋଠାଘର ।
କନକ ବ୍ୟୁରୋ: ଘରେ ଛାତ ପଡିଲେ ଠାକୁରାଣୀ ରାଗିବେ , ଗାଁରେ ଅନିଷ୍ଟ ହେବ । ଛାତଘର ଗାଁକୁ ବିପଦ ଏମିତି ଏକ ଅନ୍ଧବିଶ୍ୱାସରେ ଆବାହମାନ କାଳରୁ ବୁଡି ରହିଥିବା ଅନୁଗୁଳ ଜିଲ୍ଲା ଆଠମଲ୍ଲିକ ବ୍ଲକ୍ ବେଲାଦୁଲା ଗାଁରେ ଆଜି ପ୍ରଥମଥର ଲାଗି ଛାତଘର ନିର୍ମାଣ ହୋଇଛି । ପ୍ରଶାସନ ସହଯୋଗରେ କୋଠାଘର ଛାତ ପକାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଅନୁଗୁଳ ଜିଲ୍ଲା ଆଠମଲ୍ଲିକ ବ୍ଲକ କନ୍ଧପଡ଼ା ଗ୍ରାମପଞ୍ଚାୟତର ବେଲାଦୁଲା ଗାଁରେ ଆଜି ପର୍ଯ୍ୟନ୍ତ ଗୋଟିଏ ହେଲେ ବି ଛାତ ଘର ନ ଥିଲା । ଘରେ ଛାତ ପକାଇଲେ ଗାଁକୁ ବିପଦ ବୋଲି ଶହଶହ ବର୍ଷ ଧରି ଏକ ଅନ୍ଧବିଶ୍ୱାସ ରହି ଆସିଛି । କନ୍ଧପଡ଼ା ନାଳ ଓ ମହାନଦୀର ମିଶ୍ରଣ ସ୍ଥଳରେ ଥିବା ମା ମାଉଳି ଠାକୁରାଣୀଙ୍କ ଭୟରେ ବେଲାଦୁଲାର ବଡ଼ସାହି, ସାନସାହି ଓ ସୁଦସାହିର ଲୋକମାନେ ଘରେ ଛାତ ପକାଉ ନ ଥିଲେ । ଏପରିକି କୌଣସି ସରକାରୀ ସ୍କୁଲ, ଅଙ୍ଗନବାଡି କେନ୍ଦ୍ର, କୋଠାଘର, ଆବାସ ଗୃହର ମଧ୍ୟ ଛାତ ପଡି ପାରୁ ନ ଥିଲା। ଫଳରେ ସମସ୍ତ ସରକାରୀ ଯୋଜନାରୁ ଗ୍ରାମବାସୀ ବାଦ ପଡୁଥିଲେ । ଗ୍ରାମବାସୀଙ୍କ ମନରୁ ଏଭଳି ଅନ୍ଧବିଶ୍ୱାସ ହଟାଇବା ପାଇଁ ବିଡିଓ ସଞ୍ଜୟ କୁମାର ଆଚାର୍ଯ୍ୟ ବହୁବାର ଗାଁକୁ ଯାଇ ଲୋକମାନଙ୍କୁ ବୁଝାସୁଝା କରିଥିଲେ । ଶେଷରେ କନ୍ଧପଡ଼ା ପଞ୍ଚାୟତ ଅନୁଦାନ ଅର୍ଥରୁ ବେଲାଦୁଲା ଗାଁର ବଡ଼ସାହିରେ ଏକ କୋଠଘର ନିର୍ମାଣ ପାଇଁ ଗ୍ରାମବାସୀଙ୍କୁ ରାଜି କରାଇଥିଲେ। ୩ ଲକ୍ଷ ଟଙ୍କାରେ ଏହି ଘର ନିର୍ମାଣ ପାଇଁ ବ୍ଲକ ପ୍ରଶାସନ ନିଷ୍ପତ୍ତି ନେଇଥିଲା। ଆଉ ଆଜି ଗାଁରେ ଗ୍ରାମବାସୀଙ୍କ ସହଯୋଗରେ ଛାତ ପକାଯାଇଛି ।
ବିଡିଓ ଆଚାର୍ଯ୍ୟ ଓ କନିଷ୍ଠ ଯନ୍ତ୍ରୀ ଉପସ୍ଥିତ ରହି ଛାତପକା କାର୍ଯ୍ୟ ତଦାରଖ କରିଥିଲେ। ଗ୍ରାମ ଗୋଷ୍ଠୀ ସହାୟିକା ସୁନିତା ମେହେରଙ୍କ ନେତୃତ୍ୱରେ ଗାଁର ମହିଳାମାନେ ସିମେଣ୍ଟ କଂକ୍ରିଟ ମୁଣ୍ଡରେ ବୋହି ଛାତ ଉପରକୁ ନେଉଥିବା ଦେଖାଯାଇଥିଲା । ଏହି ବେଲାଦୁଲା ଗାଁର ୯୦ ବର୍ଷୀୟ ଧରଣୀ ମେହେର କହନ୍ତି ଯେ କେବଳ ଚାଳ କୁଡ଼ିଆକୁ ନେଇ ଏହି ଗାଁ ବସ୍ତି ବସିଥିଲା । ସେଦିନୁ ମା ମାଉଳିଙ୍କ ଭୟରେ କେହି ପକ୍କାଘର ନିର୍ମାଣ କରୁନଥିଲେ l ପ୍ରଶାସନ ପକ୍ଷରୁ ଗାଁରେ ଆଜି କୋଠାଘର ଛାତ ପଡୁଥିବାରୁ ଖୁସି ଲାଗୁଛି ବୋଲି ସେ କହିଛନ୍ତି। ଗାଁର ୮୫ ବର୍ଷ ବୟସ୍କ ଖଗେଶ୍ୱର ମେହେର କହିଛନ୍ତି, ଗାଁରେ ଯିଏ ଛାତ ଘର ନିର୍ମାଣ କରିବ, ତାର ମୃତ୍ୟୁ ହେବ ବୋଲି ଅନ୍ଧବିଶ୍ୱାସ ରହିଥିଲା। ଆଜି ଗାଁକୁ ଏହି ଅନ୍ଧବିଶ୍ୱାସରୁ ପ୍ରଶାସନ ମୁକ୍ତ କରିଛି । ଏଥିରେ ଗାଁ ଲୋକେ ସହଯୋଗ କରିଥିଲାବେଳେ ଆଗକୁ ଏହି ଗାଁରେ ବିଭିନ୍ନ ସରକାରୀ ଯୋଜନାରେ ଛାତଘର ନିର୍ମାଣ କରିବାର ବାଟ ଫିଟିଛି ।