କନକ ବ୍ୟୁରୋ : କନ୍ଧମାଳ ଜିଲ୍ଲା ଗୁମୁଡୁମାହା ଗୁଳିକାଣ୍ଡ ଘଟଣାକୁ ୨ ବର୍ଷ ପୂରିବାକୁ ବସିଥିବାବେଳେ ବଦଳି ନାହିଁ ଗୁମୁଡୁମାହାର ଚିତ୍ର । ଏବେ ବି ପାଳନ ହୋଇନାହିଁ ସରକାର ଦେଇଥବା ପ୍ରତିଶ୍ରୁତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି । ମୃତକଙ୍କ ପରିବାର ଓ ଆହତ ଗ୍ରାମବାସୀଙ୍କ ମଧ୍ୟରେ ଦେଖାଦେଇଛି ଅସନ୍ତୋଷର ନିଆଁ । ୨୦୧୬ ଜୁଲାଇ ୮ ତାରିଖ ଦିନ ପୋଲିସ ଅତର୍କିତ ଗୁଳିଚାଳନାରେ ଜଣେ ୧୩ ମାସର ଶିଶୁ ଏବଂ ୫ ଜଣଙ୍କର ଜୀବନ ଯାଇଥିବାବେଳେ ଲୋମହର୍ଷଣକାରୀ ଘଟଣା ଦେଶବାସୀଙ୍କୁ ସ୍ତବ୍ଧ କରିଦେଇଥିଲା । ତେବେ ଏହି ଘଟଣାକୁ ନେଇ ଗୁମୁଡୁମାହାର ଚିତ୍ର ବଦଳାଇବା ପାଇଁ ସରକାର ଦେଇଥିଲେ ଅନେକ ପ୍ରତିଶ୍ରୁତି । କିନ୍ତୁ ଯେଉଁଥି ପାଇଁ ଦୁଇ ବର୍ଷ ତଳେ ଗୁମୁଡୁମାହାରେ ବଳି ପଡିଗଲା ଅନେକ ଲୋକଙ୍କ ଜୀବନ, ସେହି ସ୍ୱପ୍ନ ଏବେ ଅଧୁରା ହୋଇ ରହିଛି ବୋଲି ଗ୍ରାମବାସୀଙ୍କ ଅଭିଯୋଗ ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟ ସରକାର ଦୁଇ ବର୍ଷ ତଳେ ଦେଇଥିବା ସମସ୍ତ ପ୍ରତିଶ୍ରୁତି କେବଳ ତାଙ୍କ ଫାଇଲ ଭିତରେ ରଖିଦେଇଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି । କୃର୍ତ୍ତମଗଡ ଠାରୁ ଗୁମୁଡୁମାହା ପାଖାପାଖି ୧୧ କିଲୋମିଟର ରାସ୍ତା ଏବେ ବି ଅଧପନ୍ତରିଆ ହୋଇ ପଡିଛି ଯାହାକୁ ନେଇ ସ୍ଥାନୀୟ ଲୋକମାନେ ଅସନ୍ତୋଷ ପ୍ରକାଶ କରିଛନ୍ତି । ଗାଁରେ ବିଜୁଳି ଖୁଣ୍ଟ ପଡିଲା କିନ୍ତୁ ବିଦ୍ୟୁତ ସରବରାହ ଉପଯୁକ୍ତ ପରିମାଣରେ ନଥିବାରୁ ପିଲାମାନଙ୍କ ପାଠ ପଢ଼ା ବାଧାପ୍ରାପ୍ତ ହେଉଛି ବୋଲି ଅଭିଯୋଗ ହୋଇଛି । ଗୁଳିକାଣ୍ଡରେ ମୃତ ପରିବାର ଏବଂ ଅକର୍ମଣ୍ୟ ହୋଇଯାଇଥିବା ପରିବାରଙ୍କୁ ନିଯୁକ୍ତି ପାଇଁ ମଧ୍ୟ ସରକାରଙ୍କ ଆନ୍ତରିକତା ନାହିଁ ବୋଲି କହିଛନ୍ତି ପୀଡିତଙ୍କ ପରିବାର ।
ଏସଆଇଟି ତଦନ୍ତ କେବଳ ପ୍ରହଶନ । ତଦନ୍ତ କମିଶନଙ୍କ ରିପୋର୍ଟ ତୁରନ୍ତ ସାର୍ବଜନୀନ କରିବା ପାଇଁ ଗୁମୁଡୁମାହା ଗୁଳିକାଣ୍ଡ ସମିତିର ସଂଯୋଜକ ନେତ୍ର ମାନସେଠ୍ ଦାବି କରିଛନ୍ତି । ଏହାସହ ତଦନ୍ତ କମିଶନଙ୍କ ରିପୋର୍ଟ ଆଧାରରେ ଏଭଳି ଗଣହତ୍ୟା କରିଥିବା ହତ୍ୟାକରୀଙ୍କୁ ଚିହ୍ନଟ କରି କାର୍ଯ୍ୟାନୁଷ୍ଠାନ ନେବା ପାଇଁ ମୃତକଙ୍କ ପରିବାର ଲୋକ ଓ ଗ୍ରାମବାସୀ ଦାବି କରିଛନ୍ତି ।