ଖୋଲିବ ଶିଖ୍ ବିରୋଧୀ ଦଙ୍ଗାର ଫାଇଲ ! ପୁଣି ତଦନ୍ତ ପାଇଁ ନୂଆ ଏସଆଇଟି ଗଠିତ
କନକ ବ୍ୟୁରୋ : ପୁଣିଥରେ ଖୋଲିବ ଶିଖ୍ ଦଙ୍ଗାର ଫାଇଲ୍ । ୧୯୮୪ ମସିହା ଶିଖ ବିରୋଧୀ ଦଙ୍ଗାର ୧୮୬ଟି ବନ୍ଦ ହୋଇଥିବା ଫାଇଲ୍ ପୁଣିଥରେ ଖୋଲିବାକୁ ନିର୍ଦ୍ଦେଶ ଦେଲେ ସର୍ବୋଚ୍ଚ ଅଦାଲତ୍ । ଏନେଇ ପୁଣିଥରେ ଯାଂଚ କରାଯିବା ସହ ତିନି ସଦସ୍ୟ ବିଶିଷ୍ଟ କମିଟି ଗଠନ ପାଇଁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । ପୂର୍ବରୁ ଏହି ଫାଇଲ୍ ଗୁଡ଼ିକୁ ସ୍ୱତନ୍ତ୍ର ତଦନ୍ତକାରୀ ଦଳ ବନ୍ଦ କରିଥିଲା । ସୁପ୍ରିମକୋର୍ଟ ଏସଆଇଟି ବିରୁଦ୍ଧରେ ମାମଲାକୁ ଗ୍ରହଣ କରିବା ସହ ପୁନଃତଦନ୍ତର ନିର୍ଦ୍ଦେଶ ଦେଇଛନ୍ତି । ୧୯୮୪ରେ ଇନ୍ଦିରା ଗାନ୍ଧୀଙ୍କ ହତ୍ୟା ପରେ ଦଙ୍ଗା ହୋଇଥିଲା । କେବଳ ଦିଲ୍ଲୀରେ ହିଁ ହଜାର ହଜାର ଲୋକ ପ୍ରାଣ ହରାଇଥିଲେ । ପୁନଃ ଯାଂଚ ବିଭିନ୍ନ ନେତାଙ୍କ ସମସ୍ୟା ବଢ଼ାଇବା କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
୧୯୮୪ ମସିହାରେ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ହତ୍ୟା ପରେ ହୋଇଥିବା ଶିଖ୍ ବିରୋଧୀ ଦଙ୍ଗା ମାମଲାଗୁଡ଼ିକ ମଧ୍ୟରୁ ୧୮୬ଟି ମାମଲାର ପୁନଃ ତଦନ୍ତ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । କୋର୍ଟ ଏହି ମାମଲାଗୁଡ଼ିକର ପୁନଃ ତଦନ୍ତ ପାଇଁ ନିର୍ଦ୍ଦେଶ ଦେଇଥିବାରୁ ଦଙ୍ଗା ପୀଡ଼ିତଙ୍କ ମଧ୍ୟରେ ନୂତନ ଆଶା ସଂଚାର ହୋଇଛି । ପୂର୍ବରୁ କେନ୍ଦ୍ର ସରକାରଙ୍କ ଦ୍ୱାରା ନିଯୁକ୍ତ ଏସଆଇଟି ୧୯୮୪ ମସିହାର ଶିଖ୍ ବିରୋଧୀ ଦଙ୍ଗା ମାମଲାଗୁଡ଼ିକର ତଦନ୍ତ କରୁଥିଲେ । କିନ୍ତୁ ଉକ୍ତ ଏସଆଇଟି ମାମଲାଗୁଡ଼ିକଣ ସଠିକ୍ ତଦନ୍ତ ନକରି ଏହାକୁ ବନ୍ଦ କରିଦେବା ଫଳରେ ସଙ୍କଟ ଉପୁଜିଥିଲା । ଏବେ ସୁପ୍ରିମ୍ କୋର୍ଟ ନିଜସ୍ୱ ଏସଆଇଟି ତଦନ୍ତଭାର ନେବ ବୋଲି ଘୋଷଣା କରିବା ପରେ ଏ ବାବଦ ତଦନ୍ତ ଓ ଶୁଣାଣି ତ୍ୱରାନ୍ଵିତ ହେବ ବୋଲି ଆଶା କରାଯାଉଛି ।
ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କୁ ତାଙ୍କର ଜଣେ ଶିଖ୍ ସୁରକ୍ଷା କର୍ମୀଙ୍କ ଦ୍ୱାରା ହତ୍ୟା ପରେ ଏହାକୁ ନେଇ ଦେଖା ଦେଇଥିବା ଶିଖ୍ ବିରୋଧୀ ଦଙ୍ଗା ମାମଲାରେ ପାଖାପାଖି ୩,୦୦୦ ଜଣ ପ୍ରାଣ ହରାଇଥିଲେ । ଏହି ଶିଖ୍ ବିରୋଧୀ ଦଙ୍ଗା ମାମଲାର ତଦନ୍ତ ପାଇଁ ଫେବୃଆରୀ ୨୦୧୫ରେ କେନ୍ଦ୍ର ଗୃହ ମନ୍ତ୍ରାଳୟ ଦ୍ୱାରା ଏକ ତିନି ଜଣିଆ ସଦସ୍ୟ ବିଶିଷ୍ଟ ଏସଆଇଟି ଗଠନ କରାଯାଇଥିଲା । କିନ୍ତୁ ଦୁଇବର୍ଷ ବିତିଯିବା ପରେ ଏସଆଇଟି ୨୦୧୭ ମସିହାରେ ଦର୍ଶାଇଥିଲେ ଯେ ଏହା ୧୨ଟି ମାମଲାରେ ଚାର୍ଜ ଫାଇଲ୍ କରିଛନ୍ତି ଏବଂ ୨୪୧ଟି ମାମଲା ବନ୍ଦ କରିଦେଉଛନ୍ତି । ତେବେ ଏସଆଇଟିର ଉକ୍ତ ୨୪୧ ମାମଲା ବନ୍ଦ କରିବା ନିଷ୍ପତ୍ତିକୁ ତର୍ଜମା କରିବାପାଇଁ ସୁପ୍ରିମକୋର୍ଟ ଗତ ଅଗଷ୍ଟ ୨୦୧୬ ତାରିଖରେ ଏକ ପ୍ୟାନେଲ ଗଠନ କରିଥିଲେ ଏବଂ ତିନି ମାସ ମଧ୍ୟରେ ଏ ସଂକ୍ରାନ୍ତ ରିପୋର୍ଟ ଦେବାପାଇଁ କହିଥିଲେ । ସୁପ୍ରିମକୋର୍ଟର ଦୁଇଜଣ ଅବସରପ୍ରାପ୍ତ ବିଚାରପତିଙ୍କୁ ନେଇ ଗଠିତ ହୋଇଥିବା ଉକ୍ତ ପ୍ୟାନେଲ ୧୮୬ଟି ଶିଖ୍ ବିରୋଧୀ ମାମଲାର ପୁନଃତଦନ୍ତ ପାଇଁ ସୁପ୍ରିମକୋର୍ଟଙ୍କୁ ରିପୋର୍ଟ ଦେବାପରେ କୋର୍ଟ ଉକ୍ତ ମାମଲାଗୁଡ଼ିକର ପୁନଃତଦନ୍ତ ନିର୍ଦ୍ଦେଶ ଦେଇଛନ୍ତି ।