ନେପାଳ ବିମାନ ଦୁର୍ଘଟଣା : ଉଦ୍ଧାର ହେଲାଣି ୧୪ଜଣଙ୍କ ମୃତଦେହ; ସର୍ଚ୍ଚ ଅପରେସନ ଜାରି
କନକ ବ୍ୟୁରୋ : ନେପାଳରେ ବିମାନ ଦୁର୍ଘଟଣାରେ ଉଦ୍ଧାର ହେଲାଣି ୧୪ଜଣଙ୍କ ମୃତଦେହ । ଅନ୍ୟ ମୃତଦେହ ଖୋଜିବାକୁ ଏବେବି ସ୍ଥଳସେନା ଓ ବାୟୁ ସେନା ପକ୍ଷରୁ ଚାଲିଛି ସର୍ଚ୍ଚ ଅପରେସନ । ଘଟଣାସ୍ଥଳରେ ପହଂଚିଛନ୍ତି ବରିଷ୍ଠ ଅଧିକାରୀ । ଆଜି ସକାଳେ ବିମାନ ଦୁର୍ଘଟଣାସ୍ଥଳରେ ପହଞ୍ଚି ସେନା ପକ୍ଷରୁ ସର୍ଚ୍ଚ ଅପରେସନ ଆରମ୍ଭ ହୋଇଛି । ଗତକାଲି ବରଫପାତ ଯୋଗୁ ଉଦ୍ଧାର କାର୍ଯ୍ୟ ବନ୍ଦ ରହିଥିଲା । ଆଜି ସକାଳଠାରୁ ଅପରେସନ୍ ଆରମ୍ଭ ହୋଇଥିବା ନେପାଳ ସେନାର ମୁଖପାତ୍ରଙ୍କ ପକ୍ଷରୁ ଟ୍ୱିଟ୍ କରି ସୂଚନା ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ନେପାଳର ପୋଖର ଅଭିମୁଖେ ବିମାନଟି ଉଡାଣ ଭରିବା ପରେ ମଝି ଆକାଶରେ ସକାଳ ୯ଟା ୫୫ରେ ବିମାନ କର୍ତ୍ତପକ୍ଷଙ୍କ ସହ ଯୋଗାଯୋଗ ହୋଇପାରି ନଥିଲା । ଶେଷଥର ପାଇଁ ବିମାନଟି ମୁସ୍ତାଙ୍ଗ ଜିଲ୍ଲାର ଜୋମସୋମ୍ ଆକାଶରେ ଦେଖିବାକୁ ମିଳିଥିଲା । ଏହାପରେ ବିମାନଟିକୁ ଏମଟି ଧଉଳିଗିରି ଅଭିମୁଖେ ଡାଇଭର୍ଟ କରାଯାଇଥିଲା । ଆଉ ତା’ପର ଠାରୁ ବିମାନ ସହ କୌଣସି ଯୋଗାଯୋଗ ହୋଇପାରି ନଥିଲା । ଖବର ପାଇ ନେପାଳ ଆର୍ମି ହେଲିକପ୍ଟର ବିମାନକୁ ଖୋଜିବା ପାଇଁ ଯାଇଥିଲେ ମଧ୍ୟ ପାଗ ଖରାପ ଯୋଗୁ ଖୋଜି ନପାରି ଫେରି ଆସିଥିଲା ।
ବିମାନରେ ୪ ଓଡ଼ିଆଙ୍କ ସମେତ ୨୨ ଜଣଙ୍କୁ ନେଇ ବିମାନଟି ଯାଉଥିଲା । ଚାରି ଓଡିଆ ହେଲେ ଅଶୋକ କୁମାର ତ୍ରିପାଠୀ, ପତ୍ନୀ ରିତିକା ତ୍ରିପାଠୀ, ପୁଅ ଧନୁଷ ତ୍ରିପାଠୀ ଏବଂ ଝିଅ ବୈଭବୀ ତ୍ରିପାଠୀ । ଏପର୍ଯ୍ୟନ୍ତ ଯାତ୍ରୀମାନଙ୍କର କୌଣସି ପତା ମିଳିପାରିନାହିଁ । ଅଶୋକଙ୍କ ଶ୍ୱଶୁର ଘର ମୁମ୍ବାଇରେ । ପୁଅ, ଝିଅଙ୍କ ସହ ପତ୍ନୀ ବାପ ଘର ମୁମ୍ବାଇରେ ରହୁଥିଲେ । ଅଶୋକ ଭୁବନେଶ୍ୱରରେ ରହି ଏକ ସଫ୍ଟୱେୟାର ସଂସ୍ଥାରେ କାମ କରୁଥିଲେ । ସେ ସୋନପୁରର ମୁଳ ବାସିନ୍ଦା ହୋଇଥିବା ବେଳେ ଭୁବନେଶ୍ୱରରେ ରହୁଥିଲେ । ଗତ ୨୬ ତାରିଖରେ ସେ ପରିବାର ସହ କାଠମାଣ୍ଡୁ ଗସ୍ତ କରିଥିଲେ । ଅଶୋକ ତାଙ୍କ ପରିବାର ସହ ଆସନ୍ତା ୬ ତାରିଖରେ ଫେରିବାର ଥିଲା ।