ମାଆ ବିରଜାଙ୍କୁ ଦର୍ଶନ କରି ଫେରୁଥିଲେ ବାପା, ମା’, ଝିଅ ଆଉ ପୁଅ : ଉପରେ ଭାଙ୍ଗିପଡିଲା ଗଛ, ଚାଲିଗଲା କୁନି ପୁଅର ଜୀବନ
କନକ ବ୍ୟୁରୋ : ମାଆ ବିରଜାଙ୍କ ଦର୍ଶନ କରି ଫେରିବା ବେଳେ ଅଘଟଣ । ଚଳନ୍ତା ବାଇକ ଉପରେ ଗଛ ପଡିଯିବାରୁ ଜଣେ ନାବାଳକର ମୃତ ଓ ୩ ଜଣ ଗୁରୁତର ଆହତ ହୋଇଛନ୍ତି । ଆହତଙ୍କୁ ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଯାଜପୁର ଟାଉନ ଥାନା ଅଧିନ ଯୋଡିକୁଅ ଛକରେ ଏହି ଦୁଃଖଦ ଘଟଣା ଘଟିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ଭଦ୍ରକ ଅଂଚଳର ବାପା, ମାଆ, ଭାଇ, ଭଉଣୀ ଏକ ବାଇକରେ ମାଆ ବିରଜାଙ୍କ ଦର୍ଶନ ସାରି ଫେରୁଥିଲେ । ରାସ୍ତା ଉପରେ ଏକ ଗଛକୁ ସେହି ସମୟରେ କଟାଯାଉଥିଲା । ବାଇକ ଗଛ ତଳେ ଅତିକ୍ରମ କରୁଥିବା ବେଳେ ବାଇକ ଉପରେ ଗଛ ଖସିପଡିଥିଲା । ଦୁର୍ଘଟଣାରେ ଜଣେ ୭ ବର୍ଷ ନାବାଳକର ମୃତ୍ୟୁ ହୋଇଥିବା ବେଳେ ବାପା, ମାଆ ଓ ସାନ ଭଉଣୀ ଗୁରୁତର ଆହତ ହୋଇଛନ୍ତି । ଏହାକୁ ନେଇ ଯୋଡିକୁଅ ଛକରେ ଉତେଜନା ସୃଷ୍ଟି ହୋଇଛି । ଉତ୍ୟକ୍ତ ଲୋକେ ନିଆଁ ଜାଳି ରାସ୍ତାରୋକ କରିଛନ୍ତି । ଅନ୍ୟପଟେ ରାସ୍ତା ଉପର ଗଛକୁ ବେଆଇନ ଭାବେ ବିନା ଅନୁମତିରେ କଟାଯାଉଥିବା ବେଳେ ଏହି ଅଘଟଣ ଘଟିଥିବା ସୂଚନା ମିଳିଛି ।