ଦୁଇ ଦଶନ୍ଧି ପରେ ବି ଯାଇନି ଦୁଃଖ, ଭରିନି କ୍ଷତିଗ୍ରସ୍ତ ଅଞ୍ଚଳର କ୍ଷତ । ନା ଅଛି ରାସ୍ତା, ନା ମିଳିଛି ଘର । ବିପଦପୂର୍ଣ୍ଣ ଅବସ୍ଥାରେ ଆଶ୍ରୟସ୍ଥଳୀ । ମହାବାତ୍ୟାଠୁ ବଳି ଯାଉଛି ୨୧ ବର୍ଷର ଅବହେଳାର ଯନ୍ତ୍ରଣା ।
କନକ ବ୍ୟୁରୋ: ମହାବାତ୍ୟାର ୨୧ ବର୍ଷ ପରେ କେମିତି ଅଛି ପ୍ରଭାବିତ ଅଞ୍ଚଳ ? କେମିତି ଅଛି ସୁପର ସାଇକ୍ଲୋନର ନାଲି ଆଖି ଦେଖିଥିବା ଜଗତସିଂହପୁର ଜିଲ୍ଲାର ଏରସମା ଅଞ୍ଚଳ ? ୧୯୯୯ ମହାବାତ୍ୟାକୁ ୨୧ ବର୍ଷ ବିତି ଯାଇଥିବା ବେଳେ କ୍ଷତିଗ୍ରସ୍ତ ଅଞ୍ଚଳରେ କିଛି ବଦଳିଛି ନା ସ୍ଥିତି ସେମିତି ରହିଛି । ପ୍ରକୃତ ସତ ପରିଖିବାକୁ ଆମେ ଚାଲିଥିଲୁ ଗ୍ରାଉଣ୍ଡ ଜିରୋକୁ…
Kanak News is now on WhatsApp
Join and get latest news updates delivered to you via WhatsApp
ବାତ୍ୟା ଯିବାର ଦୁଇ ଦଶନ୍ଧି ପରେ ବି ପ୍ରଭାବିତ ଅଞ୍ଚଳରେ କିଛି ବଦଳିନି । ସେମିତି କିଛି ଆଖି ଦୃଶିଆ କାମ ବି ହୋଇନି । ବିପଦ ଟଳିବା ପରେ ଆଗାମୀ ବିପଦର ସଫଳ ମୁକାବିଲା କରିବାକୁ ଯେଉଁ ବାତ୍ୟା ଆଶ୍ରୟସ୍ଥଳୀ ନିର୍ମାଣ କରାଯାଇଥିଲା ତାହା ଏବେ ଜରାଜୀର୍ଣ୍ଣ ଅବସ୍ଥାରେ, ଭୁଶୁଡିବା ଉପରେ । ଆଉ ଇଏ ହେଉଛି ତାର ଅସଲ ଚିତ୍ର ।
ବାତ୍ୟାରେ ଭାସିଯାଇଥିବା ଚାଳଘର ଭାଙ୍ଗିଯାଇଥିବା କୁଡିଆ ଏଯାଏଁ ପକ୍କା ହୋଇପାରିନି । ୨୧ ବର୍ଷ ତଳେ ଯାହା ୨୧ ବର୍ଷ ପରେ ବି ତାହା । ବିକାଶର ବୀଜ ସବୁଠି ବୁଣା ଚାଲିଛି ହେଲେ ବାତ୍ୟା ପ୍ରଭାବିତ ଅଞ୍ଚଳରେ ତାହା ପଡୁନି କି ବିକାଶର ଗଛ ବି ଉଠୁନି । ଖାଲି ଘର ନୁହେଁ ଏବେବି ଅନେକ ଗାଁକୁ ରାସ୍ତା ଖଣ୍ଡେ ନାହିଁ । ସମୁଦ୍ର ସୀମାରେ ଗାଁ ହୋଇଥିବାରୁ ସରକାରଙ୍କ ଆଖି ଏଠାରେ ପଡୁନି ।
ସେପଟେ ନଦୀବନ୍ଧ ସୁଦୃଢ ହେଉନଥିବାରୁ ଲୋକେ ଭୟ ଓ ଆତଙ୍କିତ ଅବସ୍ଥାରେ ଅଛନ୍ତି । କେତେବେଳେ କଣ ହେବ କିଛି କହି ହେବନି । ବାତ୍ୟା ଖବର ହେଉ କି ବାତ୍ୟାର ପୂର୍ବାନୁମାନ, ଯେତେବେଳେ ବି ଏମାନଙ୍କ କାନରେ ପଡେ ମନରେ ଅଜଣା ଭୟ ସଂଚାର ହୁଏ । କାରଣ ୧୯୯୯ କଥା ମନେ ପଡିଯାଏ ।
ତେବେ ମହାବାତ୍ୟାର ସମୟ ଆସିଲେ ପ୍ରଭାବିତ ଅଞ୍ଚଳର ଦୁଃଖ ଦୁର୍ଦ୍ଦଶାର କଥା ଦେଖାଏ ଗଣମାଧ୍ୟମ । ଭୋଟ ବେଳେ ବି ଏ ଅଞ୍ଚଳରେ ପଡେ ନେତାଙ୍କ ପାଦ । ହେଲେ ଭୋଟ ପରେ ସବୁ କିଛି ଭୁଲି ଯାଆନ୍ତି । ମହାବାତ୍ୟାକୁ ଯେତେ ବର୍ଷ ନବୀନ ସରକାରକୁ ମଧ୍ୟ ସେତେ ବର୍ଷ । ଯଦି ୨୧ ବର୍ଷ ପରେ ବି ବାତ୍ୟା ପ୍ରଭାବିତ ଅଞ୍ଚଳର ଦୁର୍ଦ୍ଦଶା କିଛି ବଦଳିପାରୁନି ତେବେ କେବେ ବଦଳିବ ?