କନକ ବ୍ୟୁରୋ : ଟିମ୍ ଇଣ୍ଡିଆକୁ ମିଳିବ ନୂଆ କୋଚ୍ । ଖୁବଶୀଘ୍ର ଏନେଇ ଘୋଷଣା କରାଯିବ । ଆଉ ଏହା ଭିତରେ ସବୁଠୁ ବଡ ଖବର ହେଲା, ମୁଖ୍ୟ କୋଚ୍ ପଦ ପାଇଁ ଆବେଦନ କରିଛନ୍ତି ପୂର୍ବତନ ଭାରତୀୟ କ୍ରିକେଟର ତଥା ଦ ୱାଲ ରାହୁଲ ଦ୍ରାବିଡ । ବିସିସିଆଇ ଏକ ଅଧିକାରୀଙ୍କ ଠାରୁ ମିଳିଥିବା ବିଶ୍ୱସ୍ତ ସୂତ୍ର ଅନୁଯାୟୀ, ମଙ୍ଗଳବାର ରାହୁଲ ଦ୍ରାବିଡ ଟିମ୍ ଇଣ୍ଡିଆ ମୁଖ୍ୟ କୋଚ୍ ପଦ ପାଇଁ ଆବେଦନ କରିଛନ୍ତି । ଆଜି ହିଁ ମୁଖ୍ୟ କୋଚ୍ ଆବେଦନ ପାଇଁ ଶେଷ ତାରିଖ ଥିଲା । ଆଉ ଏହି ସମୟ ଶେଷ ହେବା ପୂର୍ବରୁ ରାହୁଲ ମୁଖ୍ୟ କୋଚ୍ ପଦ ପାଇଁ ଆବେଦନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରାହୁଲ ଦ୍ରାବିଡ ମୁଖ୍ୟ କୋଚ୍ ପଦ ପାଇଁ ଆବେଦନ କରିବା ପୂର୍ବରୁ ବିସିସିଆଇ ଶୀର୍ଷ ଅଧିକାରୀଙ୍କ ସହ ଆଲୋଚନା କରିଥିଲେ । ୟୁଏଇରେ ଆଇପିଏଲ ଖେଳାଯାଉଥିବା ବେଳେ ବିସିସିଆଇର ସଭାପତି ସୌରଭ ଗାଙ୍ଗୁଲି ଓ ସମ୍ପାଦକ ଜୟ ଶାହା ଭାରତୀୟ ମୁଖ୍ୟ କୋଚ୍ ପଦ ପାଇଁ ଦ୍ରାବିଡଙ୍କ ସହ ଆଲୋଚନା କରିଥିଲେ । ଆଉ ଏହାପରେ ରାହୁଲ ହିଁ ଟିମ୍ ଇଣ୍ଡିଆର ମୁଖ୍ୟ କୋଚ୍ ହେବେ ବୋଲି ଚର୍ଚ୍ଚା ଆରମ୍ଭ ହୋଇଥିଲା ।
ବିସିସିଆଇ ପକ୍ଷରୁ ରାହୁଲଙ୍କୁ ଯେତେବେଳେ ଏହି ଅଫର ମିଳିଥିଲା ପ୍ରଥମେ ସେ ଏହାକୁ ମନା କରିଥିଲେ । କାରଣ ରାହୁଲ ସେତେବେଳେ ଏନସିଏର ନିର୍ଦ୍ଦେଶକ ଭାବେ କାର୍ଯ୍ୟ କରୁଥିଲେ ଏବଂ ଏହି ଦାୟିତ୍ୱ ତୁଲାଇବେ ବୋଲି କହି ଆସୁଥିଲେ । କିନ୍ତୁ ଟି-୨୦ ବିଶ୍ୱକପ ପରେ ମୁଖ୍ୟ କୋଚ୍ ପଦରୁ ରବି ଶାସ୍ତ୍ରୀ ବିଦାୟ ନେବେ । ତେଣୁ ଶାସ୍ତ୍ରୀଙ୍କ ସ୍ଥାନରେ ନୂଆ କୋଚ୍ ସନ୍ଧାନରେ ଥିଲା ବିସିସିଆଇ । କିନ୍ତୁ ସେଭଳି ବଡ ଚେହେରା ବିସିସିଆଇ ନଜରରେ ନଥିଲା ।
ଅନ୍ୟପଟେ ଅନେକ ତର୍ଜମା ପରେ ରାହୁଲଙ୍କ ନାଁକୁ ନେଇ ବିସିସିଆଇ ଅଧିକାରୀଙ୍କ ମଧ୍ୟରେ ଆଲୋଚନା ହୋଇଥିଲା । ଯେହେତୁ ଆଗକୁ ବିଶ୍ୱକପ ରହିଛି ତେଣୁ ରାହୁଲ ହିଁ ଟିମ୍ ଇଣ୍ଡିଆକୁ ଆଗକୁ ନେଇପାରିବେ । ଏହାଛଡା ଏବେ ଟିମ୍ ଇଣ୍ଡିଆରେ ଖେଳୁଥିବା ଅଧିକାଂଶ ଖେଳାଳୀ ଏନସିଏରେ ରାହୁଲ ପ୍ରଶିକ୍ଷଣରେ କ୍ରିକେଟ ଖେଳିଛନ୍ତି । ତେଣୁ ମୁଖ୍ୟ କୋଚ୍ ଭାବେ ଦଳ ଭିତରେ ଉତ୍ତମ ସମନ୍ୱୟ ରଖିପାରିବେ ରାହୁଲ । ତେଣୁ ରାହୁଲଙ୍କୁ କୋଚ୍ କରିବା ଉପରେ ଜୋର ଦେଇଥିଲା ବିସିସିଆଇ । ସେହିଭଳି ଫିଲ୍ଡିଂ କୋଚ୍ ଭାବେ ଅଜୟ ରାତ୍ରା ଓ ଅଭୟ ଶର୍ମା ଆବେଦନ କରିଛନ୍ତି । ତେଣୁ ରାହୁଲ ଦ୍ରାବିଡ ମୁଖ୍ୟ କୋଚ୍ ହେଲେ କାହାକୁ ଫିଲ୍ଡିଂ କୋଚ୍ ଭାବେ ଦାୟିତ୍ୱ ମିଳିବ ତାହା ଉପରେ ସମସ୍ତଙ୍କର ନଜର ରହିବ ।