କ୍ଷେପଣାସ୍ତ୍ର ‘ବ୍ରହ୍ମୋସ୍’ର ରପ୍ତାନୀ କରିବ ଭାରତ । ଫିଲିଫାଇନ୍ସ ସହ ହେଲା ଚୁକ୍ତି ସ୍ୱାକ୍ଷର
କନକ ବ୍ୟୁରୋ: ଫିଲିଫାଇନ୍ସକୁ ୩୭୫ ମିଲିୟନ ଡଲାର ଅର୍ଥାତ୍ ୨ ହଜାର ୭୭୦ କୋଟି ଟଙ୍କାରେ ବ୍ରହ୍ମୋସ ସୁପରସୋନିକ ମିଶାଇଲ ବିକ୍ରି କରିବା ନେଇ ଚୁକ୍ତି ସ୍ୱାକ୍ଷର କରିଛି ଭାରତ । ଦକ୍ଷିଣ ଚୀନ ସାଗରରେ ସୀମାକୁ ନେଇ ଚୀନ ସହ ଫିଲିଫାଇନ୍ସର ବିବାଦ ଲାଗିରହିଥିବା ବେଳେ ଭାରତ ଠାରୁ ଶକ୍ତିଶାଳୀ ବ୍ରହ୍ମୋସ କ୍ଷେପଣାସ୍ତ୍ର କିଣିବାକୁ ଚୁକ୍ତି କରିଛି ଫିଲିଫାଇନ୍ସ । ବହ୍ମୋସ ମିଶାଇଲ ପ୍ରଦାନ ପାଇଁ ଭାରତର ବ୍ରହ୍ମୋସ ଏରୋସ୍ପେସ କମ୍ପାନୀ ସହ ଫିଲିଫାଇନ୍ସର ନ୍ୟାସନାଲ ଡିଫେନ୍ସ ବିଭାଗ ସହ ଶୁକ୍ରବାର ଚୁକ୍ତି ସ୍ୱାକ୍ଷର ହୋଇଛି । ଏନେଇ ରକ୍ଷା ମନ୍ତ୍ରଣାଳୟ ପକ୍ଷରୁ ସୂୂଚନା ଦିଆଯାଇଛି । ଭାରତ ସରକାରଙ୍କ ଏହି ଚୁକ୍ତି ଡିଫେନ୍ସ ସାମ୍ରଗୀ ରପ୍ତାନି ନୀତିକୁ ପ୍ରତ୍ସୋହିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇବ ବୋଲି ରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମ ଥର ପାଇଁ ୨୯୦ କିମି ପର୍ଯ୍ୟନ୍ତ ଲକ୍ଷଭେଦୀ ପାରୁଥିବା ବ୍ରହ୍ମୋସ୍ ମିଶାଇଲ ବିକ୍ରି ପାଇଁ ଭାରତ ଚୁକ୍ତି କରିଛିି । ଭାରତ ଏବଂ ଋଷିଆ ସହ ମିଶି ମିଳିତ ଭାବେ ଏହି ମିଶାଇଲର ବିକାଶ କରିଛି । ଫିଲିଫାଇନ୍ସର ଉପକୂଳ ସୁରକ୍ଷା ଦିଗରେ ଏହି କ୍ଷେପଣାସ୍ତ୍ର ଗୁରୁତ୍ୱପୂର୍ଣ୍ଣ ଭୂମିକା ତୁଲାଇବ ବୋଲି ପ୍ରତିରକ୍ଷା ବିଶେଷଜ୍ଞମାନେ କହିଛନ୍ତି । ଏହି ଚୁକ୍ତି ସମୟରେ ବ୍ରହ୍ମୋସ୍ ସିଇଓ ଅତୁଲ ଡି ରାଣେ, ଡେପୁଟି ସିଇଓ ସଞ୍ଜୀବ ଜୋଶୀ, ଲେଫ୍ଟେଣ୍ଟାଣ୍ଟ କର୍ଣ୍ଣେଲ ଆର ନେଗୀ ଏବଂ ପ୍ରବୀଣ ପାଠକ ଉପସ୍ଥିତ ଥିଲେ । ଏଥିସହ ଭାରତ ଇଣ୍ଡୋନେସିଆ ଓ ଭିଏତନାମ କୁ ମଧ୍ୟ ଏହି ମିଶାଇଲ ବିକ୍ରି ପାଇଁ ଆଲୋଚନା ଚଲାଇଛି ।
ଫିଲିଫାଇନ୍ସ ସହ ଏହି ଚୁକ୍ତି ପଡୋଶୀ ଦେଶଙ୍କ ସହ ଚୀନର ବିସ୍ତାରବାଦୀ ନୀତି ଉପରେ ଅଙ୍କୁଶ ଲଗାଇବ ବୋଲି ଆଶା କରାଯାଉଛି । ଆଗାମୀ ଦିନରେ ଅନ୍ୟ ପଡୋଶୀ ଦେଶମାନେ ଭାରତ ଠାରୁ ଡିଫେନ୍ସ ସାମଗ୍ରୀ କିଣିବେ ବୋଲି ଭାରତ ଆଶାବାଦୀ ଅଛି ।