ସମୟ ଗଡୁଛି, ବିବାଦ ବଢୁଛି ! ଅଯୋଧ୍ୟାରେ ରାମ ମନ୍ଦିର ନିର୍ମାଣ ନେଇ କେନ୍ଦ୍ର ଉପରେ ବଢୁଛି ଚାପ ।
କନକ ବ୍ୟୁରୋ : ଅଯୋଧ୍ୟାକୁ ନେଇ ବିଜେପିର ବଡ ବୟାନ । ସୁପ୍ରିମକୋର୍ଟରେ ଅଯୋଧ୍ୟା ମାମଲାର ଶୁଣାଣି ୩ମାସ ଘୁଂଚାଇ ଦିଆଯାଇଥିବା ବେଳେ ମନ୍ଦିର ନିର୍ମାଣ ନେଇ ବିଜେପି ଉପରେ ଚାପ ବଢିବାରେ ଲାଗିଛି । ଏପରି ସ୍ଥିତିରେ ଅଯୋଧ୍ୟା ବାସୀ ଅପେକ୍ଷା କରନ୍ତୁ, ଦୀପାବଳି ଅବସରରେ ତାଙ୍କ ପାଇଁ ଖୁସି ଖବର ଅଛି ବୋଲି କହିଛନ୍ତି ଉତ୍ତରପ୍ରଦେଶ ବିଜେପି ଅଧ୍ୟକ୍ଷ । ସେପଟେ ରାମ ମନ୍ଦିର ନିର୍ମାଣ ପୂର୍ବରୁ ଅଯୋଧ୍ୟାରେ ଭଗବାନ ରାମଙ୍କ ବିରାଟ ମୂର୍ତି ନିର୍ମାଣ ନେଇ ଅଯୋଧ୍ୟାବାସୀଙ୍କୁ ଯୋଗୀ ସରକାର ଭେଟି ଦେଇପାରନ୍ତି ବୋଲି ଚର୍ଚ୍ଚା ଜୋର ଧରିଛି ।
Kanak News is now on WhatsApp
Join and get latest news updates delivered to you via WhatsApp
ବିବାଦୀୟ ଅଯୋଧ୍ୟା ପ୍ରସଙ୍ଗରେ ସୁପ୍ରିମକୋର୍ଟ ୩ମାସ ପର୍ଯ୍ୟନ୍ତ ଶୁଣାଣି ଘୁଂଚାଇ ଦେଇଥିବା ବେଳେ ଏହି ପ୍ରସଙ୍ଗ ଚର୍ଚ୍ଚାରେ ରହିଛି । ସମୟ ଯେତିକି ଗଡୁଛି ରାମ ମନ୍ଦିର ନିର୍ମାଣର ପ୍ରତିଶୃତି ଦେଇ ଶାସନକୁ ଆସିଥିବା ବିଜେପି ଉପରେ ଚାପ ସେତିକି ବଢୁଛି । ଏପରି ସ୍ଥିତିରେ ଅଯୋଧ୍ୟା ପ୍ରସଙ୍ଗରେ ବଡ ବୟାନ ଦେଇଛନ୍ତି ଉତ୍ତରପ୍ରଦେଶ ବିଜେପି ଅଧ୍ୟକ୍ଷ ମହେନ୍ଦ୍ରନାଥ ପାଣ୍ଡେ । ଦୀପାବଳିରେ କିଛି ଖୁସି ଖବର ଆସିପାରେ ବୋଲି ସେ କହିଛନ୍ତି । ମୁଖ୍ୟମନ୍ତ୍ରୀ ଯୋଗୀ ଏଥିପାଇଁ ଯୋଜନା ପ୍ରସ୍ତୁତ କରିଛନ୍ତି ଏବଂ ଦୀପାବଳି ପର୍ଯ୍ୟନ୍ତ ଅପେକ୍ଷା କରନ୍ତୁ ବୋଲି ବିଜେପି ନେତା କହିଛନ୍ତି ।
ଅଯୋଧ୍ୟାରେ ରାମ ମନ୍ଦିର ନିର୍ମାଣ ପ୍ରସଙ୍ଗରେ ବଡ ବୟାନ ଦେଇଥିଲା ଆରଏସଏସ । ଆବଶ୍ୟକ ପଡିଲେ ୧୯୯୨ପରି ଆନ୍ଦୋଳନ କରିବାକୁ ପଡିପାରେ ବୋଲି ସଙ୍କେତ ଦେଇଛି । ଆରଏସଏସ ମୁଖ୍ୟ ମୋହନ ଭାଗବତ ଓ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହଙ୍କ ମଧ୍ୟରେ ଏକ ସାକ୍ଷାତ ପରେ ଆରଏସଏସ ମହାସଚିବ ଭୈୟାଜୀ ଯୋଶୀ କହିଛନ୍ତି ଯେ, ଆବଶ୍ୟକ ପଡିଲେ ୧୯୯୨ପରି ଆନ୍ଦୋଳନ କରାଯିବ । କୋଟି କୋଟି ଜନତାଙ୍କ ସହ ଯଡିତ ରାମ ମନ୍ଦିର ପ୍ରସଙ୍ଗ ଯଦି ସୁପ୍ରିମକୋର୍ଟଙ୍କ ଅଗ୍ରାଧିକାର ତାଲିକାରେ ନାହିଁ, ତାହା ହେଲେ କଣ ଅଛି ବୋଲି ସେ ପ୍ରଶ୍ନ କରିଛନ୍ତି । ସେପଟେ ଅଯୋଧ୍ୟାରେ ରାମ ମନ୍ଦିର ଦଳର ପ୍ରସଙ୍ଗ ନୁହେଁ ବୋଲି କହିଛି କଂଗ୍ରେସ ।
ଅଯୋଧ୍ୟାରେ ରାମ ମନ୍ଦିର ନିର୍ମାଣରେ ବିଳମ୍ବ ହେଉଥିବା ବେଳେ ଦୀପାବଳି ଅବସରରେ ଅଯୋଧ୍ୟାବାସୀଙ୍କୁ ଏକ ବଡ ଉପହାର ଦେବେ ଯୋଗୀ ସରକାର । ଦୀପାବଳିରେ ମର୍ଯ୍ୟାଦା ପୁରୁଷୋତମ ରାମଙ୍କ ଏକ ବିଶାଳ ମୂର୍ତି ସ୍ଥାପନ ନେଇ ଘୋଷଣା କରିବା ପାଇଁ ପ୍ରସ୍ତୁତି କରିଛନ୍ତି ସରକାର । ସର୍ଯ୍ୟୁ ନଦୀ ତଟରେ ୧୦୮ମିଟର ଉଚ୍ଚର ରାମ ମୂର୍ତି ନିମାଣ ହେବାର ଯୋଜନା ରହିଥିବା ସୂଚନା ମିଳିଛି । ଏହାର ୪ଫୁଟ ଉଚ୍ଚତାର ଏକ ମଡେଲ ମଧ୍ୟ ମୁଖ୍ୟମନ୍ତ୍ରୀ ଯୋଗୀଙ୍କୁ ଦେଖା ଯାଇଥିବା ସୂଚନା ରହିଛି । ତେବେ ଏହି ଦୀପାବଳିରେ ଭେଟି ଦେବା ପାଇଁ ୩୦ଫୁଟର ରାମଙ୍କ ମୂର୍ତି ଓ ୧୬ଫୁଟର ହନୁମାନଙ୍କ ମୂର୍ତି ନିର୍ମାଣ ହେଉଛି ।