କନକ ବ୍ୟୁରୋ : ଯାତ୍ରା ମଂଚରୁ ଶୁଭିବନି ଆବେଗ ଭରା ସଂଳାପ । ଖଳନାୟକର ଚିତ୍କାରରେ ଆଉ ପ୍ରକମ୍ପିତ ହେବନି ଯାତ୍ରା ପେଣ୍ଡାଲ । ଦେଖିବାକୁ ମିଳିବନି ରେକର୍ଡ ଡ୍ୟାନ୍ସର ରୋମାଂଚ । କାହିଁକି ନା’ ଆସନ୍ତା ଜୁଲାଇ ମାସରୁ ବନ୍ଦ ହେବାକୁ ଯାଉଛି ରାଜ୍ୟର ୨୩ଟି ପ୍ରମୁଖ ଯାତ୍ରାପାର୍ଟି । ଗାଁଠୁ ସହର ସବୁଠି ଲୋକାଦୃତ ହୋଇଥିବା ଏହି ମଂଚ ଅଭିନୟର ପୁରୁଣା ପରମ୍ପରାରେ ଏଥର ପୂର୍ଣ୍ଣଚ୍ଛେଦ ପଡ଼ିବ । ସାମ୍ବାଦିକ ସମ୍ମିଳନୀରେ ଯାତ୍ରା ପାର୍ଟି ବନ୍ଦ କରାଯିବ ନେଇ ଘୋଷଣା କରିଛି ଯାତ୍ରାପାର୍ଟି ମାଲିକ ସଂଘ ।
Kanak News is now on WhatsApp
Join and get latest news updates delivered to you via WhatsApp
ଆୟ ତୁଳନାରେ ବ୍ୟୟ ଅଧିକ ଏବଂ ବିଭିନ୍ନ ସରକାରୀ କଟକଣା, ଯାତ୍ରାପାର୍ଟି ମାଲିକ ସଂଘକୁ ଏଭଳି କଠୋର ନିଷ୍ପତ୍ତି ନେବା ପାଇଁ ବାଧ୍ୟ କରିଛି । ରାଜ୍ୟର ପ୍ରମୁଖ ୨୩ଟି ଯାତ୍ରାପାର୍ଟି ବନ୍ଦ ହେବା ଫଳରେ ଯାତ୍ରା ଜଗତ ସହ ଜଡ଼ିତ ଥିବା ପ୍ରାୟ ୫ ହଜାର କଳାକାର ଏବଂ କର୍ମଚାରୀ କର୍ମ ସଂସ୍ଥାନ ହରାଇବେ । ଯଲିଉଡ ସହ ସଂପର୍କିତ ପ୍ରାୟ ୭ ହଜାର ଲେଖକ, ନିର୍ଦ୍ଦେଶକ ଏବଂ ଆନୁଷ୍ଠିକ କ୍ଷେତ୍ରରେ ନିୟୋଜିତ ବ୍ୟକ୍ତି ପ୍ରଭାବିତ ହେବେ । ଯାତ୍ରା ବନ୍ଦ ହେବା ନିଷ୍ପତ୍ତିି ପରୋକ୍ଷରେ ଲକ୍ଷ ଲକ୍ଷ ଲୋକଙ୍କୁ ପ୍ରଭାବିତ କରିବ । ଏହା ବ୍ୟତୀତ ବିଭିନ୍ନ ସରକାରୀ କଟକଣା, ଯାତ୍ରାକୁ ବଂଚି ରହିବାରେ ବାଧକ ସୃଷ୍ଟି ହୋଇଛି । ଗାଁରୁ ସହର ଯାତ୍ରା ପରିବେଷଣ ଉପରେ ରହିଛି ଅନେକ କଟକଣା ।
କେତେବେଳେ ଅନୁମତିକୁ ନେଇ, ତ ଆଉ କେତେବେଳେ ସ୍ଥାନକୁ ନେଇ । ସେହିପରି ପିଲାଙ୍କ ପାଠପଢ଼ା ପାଇଁ କଟକଣା, ଯାତ୍ରା ପରିବେଷଣର ନିର୍ଦ୍ଧିଷ୍ଟ ସମୟସୀମା ନିର୍ଦ୍ଦାରଣ ଆଦି ସମସ୍ୟା ଯାତ୍ରା ଉପରେ ବେଶ ପ୍ରଭାବ ପକାଇଛି । ଏମିତିକି ପୁରୀ, କଟକ, ବରଗଡ଼ ଆଦି ସହରରେ ଯାତ୍ରା ପରିବେଶଷ ବିଭିନ୍ନ କାରଣରୁ ବନ୍ଦ ରହିଛି । ଯାତ୍ରପାର୍ଟି ମାଲିକ ସଂଘର ଏହି ନିଷ୍ପତ୍ତିକୁ ସ୍ୱାଗତ କରିଛନ୍ତି ଅନେକ କଳାକାର । ଯାତ୍ରା ପରମ୍ପରାକୁ ବଂଚାଇ ରଖିବାକୁ ହେଲେ ସରକାରଙ୍କୁ ଆଗେଇ ଆସିବା ଦରକାର ବୋଲି କଳାକାରଙ୍କ ମତ । କଳାକାର ନବଂଚିଲେ, କଳା ବଂଚିବନି ବୋଲି କହିଛନ୍ତି ଯାତ୍ରା ଅଭିନେତା ଲରେନ୍ସ ।