ଜଣାଶୁଣା ଭାରତୀୟ ଲେଖକ ଚେତନ୍ ଭଗତଙ୍କ ଏକ କାରନାମାକୁ ନେଇ ଏବେ ଦେଶବ୍ୟାପି ଚର୍ଚ୍ଚା ଓ ଆଲୋଡ଼ନ ସୃଷ୍ଟି ହୋଇଛି। ଜନୈକା ମହିଳାଙ୍କ ସହ ଲେଖକ ଚେତନ ଭଗତ ସୋସିଆଲ ମିଡିଆରେ ଅଶାଳୀନ ଚାଟିଂ କରିବା ସହିତ ନିର୍ଯ୍ୟାତନା ଦେବା ଘଟଣା ଏବେ ତାଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇଛି।

ହସ୍ତଗତ ହୋଇଥିବା ଘଟଣାର ବିବରଣୀରୁ ଜାଣିବାକୁ ମିଳିଛି ଯେ ଲେଖକ ଚେତନ ଭଗତ ଗତ କିଛି ମାସ ଧରି ଜନୈକା ମହିଳାଙ୍କ ସହ ସୋସିଆଲ ମିଡିଆରେ ଚାଟିଂ ଜରିଆରେ ତାଙ୍କ ସହ ଅଶାଳୀନ ଚାଟିଂ କରିବା ଆରମ୍ଭ କରିଥିଲେ। ତେବେ, ଚେତନଙ୍କ ଚାଟିଂ ଯେତେବେଳେ ସବୁ ସୀମା ସରହଦ ଟପି ନିର୍ଯ୍ୟାତନା ଆଡ଼କୁ ଗତି କଲା ସେତେବେଳେ ପୀଡ଼ିତା ମହିଳା ଜଣକ ଚେତନ କରିଥିବା ଚାଟିଂର ସ୍କ୍ରିନ୍ସର୍ଟ ନେଇ ତାକୁ ସୋସିଆଲ ମିଡିଆରେ ଛାଡ଼ି ଦେଇଥିଲେ। ପରେ ଏହା ଭାଇରାଲ ହୋଇଯିବା ସହ ଦେଶବ୍ୟାପି ଚର୍ଚ୍ଚା ଓ ଆଲୋଡ଼ନ ସୃଷ୍ଟି କରିଥିଲା।

ଏହି ଘଟଣା ପରେ ଚେତନ ଶନିବାର ତାଙ୍କ ଫେସ୍ବୁକ୍ ପେଜରେ ଏକ ଦୀର୍ଘ ପୋଷ୍ଟିଂ ଲେଖି ନିଜ ଦୋଷ ସ୍ୱୀକାର କରିବା ସହ ତାଙ୍କର ଏହି କାର୍ଯ୍ୟ ପାଇଁ ସଂପୃକ୍ତା ମହିଳାଙ୍କୁ ସର୍ବସାଧାରଣରେ କ୍ଷମା ମାଗିଛନ୍ତି। ଏଥିସହ ନିଜର ଏହି ଅପକର୍ମ ପାଇଁ ସେ ତାଙ୍କ ପତ୍ନୀ ଅନୁଶାଙ୍କୁ ମଧ୍ୟ କ୍ଷମା ମାଗିବା ସହ ନିଜର ଏହି କାର୍ଯ୍ୟ ପାଇଁ ଦୁଃଖିତ ବୋଲି କହିଛନ୍ତି।