କନକ ବ୍ୟୁରୋ : ଓଡିଶାରେ ଏବେ ହକି ଫିଭର । କ୍ରିକେଟକୁ ପଛରେ ପକାଇ ଦବଦବା ଜାହିର କରିଛି ହକି । ଆଜି ରାଜଧାନୀର କଳିଙ୍ଗ ଷ୍ଟାଡିୟମରେ ଉଦଘାଟିତ ହୋଇଛି ବିଶ୍ୱ ହକି ଲିଗ୍ । ଭାରତର ଏହି ସର୍ବଶ୍ରେଷ୍ଠ ଷ୍ଟାଡିୟମରେ ବିଶ୍ୱର ଶ୍ରେଷ୍ଠ ୮ଟି ଦଳ ମଧ୍ୟରେ ଲଢେଇ ହେବ । ଏଥିରୁ ବିଶ୍ୱକପ୍ ହକି ପାଇଁ ବି ଯୋଗ୍ୟତା ଅର୍ଜନ କରିବେ ଦଳ । ହକି ମହାକୁମ୍ଭର ଆରମ୍ଭ । ହକିର ହବ୍ ପାଲଟିଯାଇଛି ଓଡିଶା । ରଙ୍ଗାରଙ୍ଗ ଉଦଘାଟନୀ ସମାରୋହ ଭିତରେ ଆରମ୍ଭ ହୋଇଛି ବିଶ୍ୱକପ ହକି ଲିଗ୍ । ଦେଶର ସବୁଠାରୁ ଭଲ ହକି ଷ୍ଟାଡିୟମ ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ଆୟୋଜିତ ହୋଇଛି ବିଶ୍ୱ ହକି ଲିଗ୍ । ମଂଚ ସଜା ସରିଛି । ପ୍ରସ୍ତୁତ ହୋଇସାରିଛନ୍ତି ଯୋଦ୍ଧା । ଆଉ ପଡିଆକୁ ଓହ୍ଲାଇବେ ବିଶ୍ୱର ଭେଟରାନ ହକି ତାରକା ।
Kanak News is now on WhatsApp
Join and get latest news updates delivered to you via WhatsApp
କ୍ରିକେଟର କ୍ରେଜକୁ ପଛରେ ପକାଇ ଭାରତର ଜାତୀୟ ଖେଳ ହକି ପ୍ରତି ଓଡିଶାର ଦର୍ଶକ ଯେଉଁ ଆଗ୍ରହ ଦେଖାଇଛନ୍ତି ତାହା ଏତେବଡ ବିଶ୍ୱସ୍ତରୀୟ ଆୟୋଜନକୁ ସଫଳତା ଆଡକୁ ମୁହାଁଇ ନେଇଛି । ଆଗାମୀ ୧୦ ତାରିଖ ପର୍ଯ୍ୟନ୍ତ କଳିଙ୍ଗ ଷ୍ଟାଡିୟମରେ ସାମ୍ନାସାମ୍ନି ହେବେ ବିଶ୍ୱର ୮ଟି ବଛାବଛା ହକି ଟିମ୍ । ଆଉ ଓଡିଶା ଦର୍ଶକ ଦେଖିବେ ଅନ୍ତର୍ଜାତୀୟ ଖେଳାଳିଙ୍କ ପଡିଆରେ ସଂଘର୍ଷ ।
ସାରା ଦେଶରେ କ୍ରିକେଟକୁ ନେଇ କ୍ରେଜ ଭିତରେ ଓଡିଶାରେ ହକି ଖେଳ ଦେଖିବା ପାଇଁ ଦର୍ଶକଙ୍କ ଉତ୍ସାହ ପୁଣି ଜାତୀୟ ଖେଳର ଚାହିଦାକୁ ଦର୍ଶାଉଛି । ୧୦ ଦିନ ଧରି ଚାଲିବ ବିଶ୍ୱ ହକି ଲିଗ । ମୋଟ ୮ଟି ଦେଶର ହକି ଟିମ୍ ପରସ୍ପର ସହ ମୁହାଁମୁହିଁ ହେବେ । ପୁଲ ଏରେ- ଆର୍ଜେଂଟିନା, ନେଦରଲ୍ୟାଣ୍ଡସ, ବେଲଜିୟମ ଓ ସ୍ପେନ ଥିବାବେଳେ ପୁଲ ବିରେ ଅଛନ୍ତି- ଭାରତ ସହ ଅଷ୍ଟ୍ରେଲିଆ, ଜର୍ମାନୀ ଓ ଇଂଲଣ୍ଡ ଅଛନ୍ତି । ପ୍ରଥମ ଦିନରେ ଜର୍ମାନୀ ଓ ଇଂଲଣ୍ଡ ମଧ୍ୟରେ ଲଢେଇ ହୋଇଥିବାବେଳେ ଦ୍ୱିତୀୟ ମ୍ୟାଚରେ ମୁହାଁମୁହିଁ ହେଉଛନ୍ତି ଭାରତ ଓ ଅଷ୍ଟ୍ରେଲିଆ । ଏସବୁ ଭିତରେ ମ୍ୟାଚ ପାଇଁ ସଜେଇ ହୋଇଛି କଳିଙ୍ଗ ଷ୍ଟାଡିୟମ । ବ୍ଲୁ ଟ୍ରଫରେ ୮ଟି ଶ୍ରେଷ୍ଠ ଦଳ ଦେଖାଇବେ ଜଲୱା ।
ଓଡିଶା ମାଟିରେ ଘରୋଇ ଖେଳାଳିଙ୍କ ଗେମ୍ ଦେଖିବାକୁ ଦର୍ଶକଙ୍କ ଭିତରେ ରହିଛି ଅଧିକ ଉତ୍ସାହ । କାରଣ ଭାରତୀୟ ଟିମରେ ଖେଳୁଛନ୍ତି ତିନିଜଣ ଓଡିଆ ଖେଳାଳୀ । ଦୀପସାନ ତିର୍କୀ, ବାରେନ୍ଦ୍ର ଲାକ୍ରା ଓ ଅମିତ ରୋହିଦାସଙ୍କ ପ୍ରଦର୍ଶନ ଉପରେ ସମସ୍ତଙ୍କ ନଜର ରହିଛି ।
ଗୋଟିଏ ପଟେ ୮ଟି ଦଳ ମଧ୍ୟରେ ବିଶ୍ୱ କପ୍ ଯୋଗ୍ୟତା ପାଇଁ ଲଢେଇ ଚାଲିଛି, ଆଉ ଅନ୍ୟପଟେ କଳିଙ୍ଗ ଷ୍ଟାଡିଅମ୍ ବାହାରେ ରାଜନୈତିକ ପ୍ରଚାରର ଯୁଦ୍ଧ ଚାଲିଛି । ଛାଇଯାଇଛି ଦଳୀୟ ପୋଷ୍ଟର । ଗୋଟିଏ ପଟେ ମୋଦି, ଆଉ ଅନ୍ୟପଟେ ନବୀନ ।ହକିରେ ନବୀନଙ୍କ ମାଇଲେଜକୁ ରୋକ ଲଗାଇବା ପାଇଁ ବିଜେପି ଆଜି ମାରିଛି ମୋଦିଙ୍କ ବ୍ୟାନର । ବାହାରେ ଗୋଟିଏ ବ୍ୟାନରରେ ନବୀନ ପଟ୍ଟନାୟକ ଆଉ ଗୋଟିଏ ବ୍ୟାନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କଳିଙ୍ଗ ଷ୍ଟାଡିୟମ ବାହାରେ ନବୀନ- ମୋଦିଙ୍କ ବ୍ୟାନର ଛାଇ ହୋଇଯାଇଛି । ଓଏନଜିସି ପକ୍ଷରୁ ମୋଦିଙ୍କ ବ୍ୟାନର ଲଗାଯାଇଛି । ଯେଉଁଥିରେ ମୋଦି ହକି ଖେଳାଳିଙ୍କୁ ସ୍ୱାଗତ କରିଛନ୍ତି । ବିଶ୍ୱ ହକି ଲିଗ ଆୟୋଜନର ସଂପୂଣ୍ଣ ଶ୍ରେୟ ନବୀନ ପଟ୍ଟନାୟଙ୍କୁ ଯାଉଥିବାରୁ ବିଜେପି ଚେକ ଦେବା ପାଇଁ ବ୍ୟାନର ଯୁଦ୍ଧ ଆରମ୍ଭ କରିଛି ।