ବିଶ୍ୱକପ କ୍ରିକେଟର ସୁପର ସନଡେର ସୁପର ମୁକାବିଲା : ଆଜି ଓଭାଲରେ ଅଷ୍ଟ୍ରେଲିଆକୁ ଟକ୍କର ଦେବ ଭାରତ, କଙ୍ଗାରୁ ଦଳକୁ ମାତ ଦେବା ପାଇଁ ଟିମ ଇଣ୍ଡିଆର ସ୍ୱତନ୍ତ୍ର ରଣନୀତି
କନକ ବ୍ୟୁରୋ : ଆଜି ବିଶ୍ୱକପ ଟୁର୍ଣ୍ଣାମେଂଟରେ ଭାରତ ତାର ଦ୍ୱିତୀୟ ମ୍ୟାଚରେ ଅଷ୍ଟ୍ରେଲିଆ ଟିମକୁ ଭେଟିବ । ଓଭାଲରେ ଖେଳାଯିବାକୁ ଥିବା ଏହି ମ୍ୟାଚ ଉପରେ ଏବେ ସମସ୍ତଙ୍କ ନଜର ରହିଛି । ଦକ୍ଷିଣ ଆଫ୍ରିକା ବିରୋଧରେ ପ୍ରଥମ ମ୍ୟାଚ ଜିତିବା ପରେ ଏବେ ଅଷ୍ଟ୍ରେଲିଆ ବିପକ୍ଷ ମ୍ୟାଚ ପାଇଁ ପ୍ରସ୍ତୁତ ଟିମ ଇଣ୍ଡିଆ । କଙ୍ଗାରୁ ଦଳକୁ ମାତ ଦେବା ପାଇଁ କୋହଲି ବାହିନୀ ପ୍ରସ୍ତୁତ କରିଛି ରଣନୀତି । ବୋଲିଂରେ କିଏ ସମ୍ଭାଳିବ ଭାର ଏବଂ କେମିତି ହେବ ଜୋରଦାର ରନ ସଂଗ୍ରହ ସେଥିପାଇଁ ରଣକୌଶଳ ତିଆରି କରିଛି ଟିମ ଇଣ୍ଡିଆ । ଏପରିକି ସମ୍ଭାବ୍ୟ ୧୧ ଜଣିଆ ଦଳକୁ ନେଇ ମଧ୍ୟ ଆରମ୍ଭ ହୋଇଯାଇଛି ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ଓଭାଲ ମ୍ୟାଚ ପୂର୍ବରୁ ସାମ୍ବାଦିକ ସମ୍ମିଳନୀରେ ହିଟ ମ୍ୟାନ ରୋହିତ ଶର୍ମା କହିଛନ୍ତି କଣ ରହିବ ଅଷ୍ଟ୍ରେଲିଆ ବିପକ୍ଷରେ ଟିମ ଇଣ୍ଡିଆର ରଣନୀତି । ବୋଲିଂରେ କାହା ଉପରେ ନିର୍ଭର କରିବ ଦଳ । କଣ ରହିବ ବ୍ୟାଟିଂର ରଣନୀତି ଏନେଇ ରୋହିତ ତାଙ୍କ ମତ ରଖିଛନ୍ତି । ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚରେ ୧୨୨ରନର ଅପରାଜିତ ଇନିଂସ ଖେଳିଥିବା ରୋହିତ କହିଛନ୍ତି, ଅଷ୍ଟ୍ରେଲିଆ ବିପକ୍ଷ ମାଚରେ ଫୋକସରେ ରହିବ ତାଙ୍କ ବ୍ୟାଟିଂ । ସେ ତାଙ୍କ ନାଚୁରାଲ ଗେମ ଖେଳିବେ । ପୂର୍ବରୁ ଯଦିଓ ଅଷ୍ଟ୍ରଲିଆ ଓ ଇଣ୍ଡିଆ ପରସ୍ପର ବିପକ୍ଷରେ ପ୍ରତିଯୋଗିତପୂର୍ଣ୍ଣ ମ୍ୟାଚ ଖେଳିଛନ୍ତି କିନ୍ତୁ ମ୍ୟାଚ ଦିନର ଗୁରୁତ୍ୱ ରହିଛି । ମ୍ୟାଚ ଦିନ କିଏ କିପରି ଖେଳ ପ୍ରଦର୍ଶନ କରୁଛନ୍ତି ତାଉପରେ ନିର୍ଭର କରୁଛି ଜିତିବା କିମ୍ବା ହାରିବା ବୋଲି କହିଛନ୍ତି ରୋହିତ ଶର୍ମା ।
ସେପଟେ ଅଷ୍ଟ୍ରେଲିଆ ଦଳକୁ ଫେରୁଛନ୍ତି ଷ୍ଟିଭ ସ୍ମିଥ ଏବଂ ଡାଭିଡ ୱାର୍ଣ୍ଣର । ତେଣୁ ଏହି ମ୍ୟାଚରେ ମଧ୍ୟ ରୋଚକ ଲଢେଇ ଦେଖିବାକୁ ମିଳିବ । କିନ୍ତୁ ଗୁରୁତ୍ୱପୂର୍ଣ୍ଣ କଥା ହେଉଛି ଓଭାଲର କଣ୍ଡିସନ କଣ ରହିବ । କାହିଁକି ନା ଏହାରି ଉପରେ ନିର୍ଭର କରିବ ଟିମ ଇଣ୍ଡିଆର ରଣନୀତି । ସେହି ଅନୁସାରେ ଦଳରେ ଖେଳାଳିମାନଙ୍କୁ ନିଆଯିବାକୁ ଯୋଜନା ହେଉଛି । ଆଉ ଖେଳ ନିର୍ଭର କରୁଛି ଓଭାଲ କଣ୍ଡିସନ କିପରି ସୁହାଉଛି ।
ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚରେ ଦଳରେ ସାମିଲ ହୋଇନଥିଲେ ମହମ୍ମଦ ସମ୍ମି । ଦୁଇ ରିଷ୍ଟ ସ୍ପିନର କୁଲଦୀପ ଯାଦବ ଏବଂ ୟୁଜବେନ୍ଦ୍ର ଚହଲଙ୍କୁ ନେଇ ପଡିଆକୁ ଓହ୍ଲାଇଥିଲା ଟିମ ଇଣ୍ଡିଆ । କିନ୍ତୁ ଓଭାଲ କଣ୍ଡିସନ ଅନୁସାରେ କୁଲଦୀପଙ୍କ ସ୍ଥାନରେ ମହମ୍ମଦ ସମ୍ମି ଖେଳିବାର ସମ୍ଭାବନା ଅଛି ।