କନକ ବ୍ୟୁରୋ: ମାଆ ଛାଡିଗଲା ଯାଆଁଳା ଛୁଆ । ଏଭଳି ଏକ ଅଭାବନୀୟ ଘଟଣା ସାମ୍ନାକୁ ଆସିଛି ବଲାଙ୍ଗୀର ଷ୍ଟେସନରୁ । ଷ୍ଟେସନର ଶୌଚାଳୟରୁ ଦୁଇ ଶିଶୁ କନ୍ୟାଙ୍କୁ ଚାଇଲ୍ଡ ଲାଇନ ସହାୟତାରେ ଉଦ୍ଧାର କରାଯାଇଛି । ତାପରେ ଦୁଇ ଶିଶୁ କନ୍ୟାଙ୍କୁ ବଲାଙ୍ଗୀର ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ଆଜି ସକାଳେ ବଲାଙ୍ଗୀର ରେଳ ଷ୍ଟେସନ୍ ପରିସରରେ ଥିବା ଏକ ଶୌଚାଳୟରୁ ଦୁଇଜଣ ପରିତ୍ୟକ୍ତ ଶିଶୁକନ୍ୟାଙ୍କୁ ଉଦ୍ଧାର କରାଯାଇଛି । ଦୁଇଟି ପଲିଥିନ୍ କ୍ୟାରି ବ୍ୟାଗରେ ପୂରାଇ କେହି ପ୍ରାୟ ମାସକର ଏ ଦୁଇ କଅଁଳା ପିଲାଙ୍କୁ ଶୌଚାଳୟ ଭିତରେ ରଖି ପଳାଇଥିବା ଅନୁମାନ କରାଯାଉଛି। ସକାଳ ପ୍ରାୟ ଛଅଟା ବେଳେ ଶୌଚାଳୟ କର୍ମଚାରୀମାନେ ଭିତରୁ କଅଁଳା ପିଲାଙ୍କ କାନ୍ଦ ଶୁଣି ଚାଇଲ୍ଡ ଲାଇନ ସହାୟତାରେ ଦୁଇ ଶିଶୁଙ୍କୁ ଉଦ୍ଧାର କରାଯାଇଛି ।
ତୁରନ୍ତ ସେ ଦୁଇ ପିଲାଙ୍କୁ ବଲାଙ୍ଗୀର ମେଡିକାଲ୍ କଲେଜ୍ ଆଣ୍ଡ୍ ହସ୍ପିଟାଲର ‘ଏମସିଏଚ୍’ ବିଲଡିଙ୍ଗକୁ ନିଆଯାଇଥିଲା। ସେଠାରେ ଡାକ୍ତରମାନେ ତାଙ୍କୁ ‘ଏସଏନସିୟୁ’ରେ ରଖିଛନ୍ତି। ସେ ଦୁଇ ଜଣଙ୍କ ଓଜନ ଯଥାକ୍ରମେ ୨ କିଲୋ ୨୦୦ ଗ୍ରାମ୍ ଏବଂ ୧ କିଲୋ ୬୦୦ ଗ୍ରାମ୍ ବୋଲି ଡାକ୍ତରଖାନାରୁ ପ୍ରକାଶ। ଖବର ପାଇ ରେଳବାଇ ପୁଲିସ ଏବଂ ଚାଇଲ୍ଡ୍ ଲାଇନ୍ କର୍ମଚାରୀମାନେ ଡାକ୍ତରଖାନାରେ ପହଞ୍ଚିଛନ୍ତି। ଦୁହିଁଙ୍କର ସ୍ୱାସ୍ଥ୍ୟବସ୍ଥା ସ୍ୱାଭାବିକ ଅଛି ।