ମୋଟର ଯାନ ଆଇନ କଡାକଡି ହେବା ପରେ ବି ପଡୁନି ଫରକ । ୪ ମାସରେ ଧରାପଡିଛନ୍ତି ୧୦ ହଜାର ମଦୁଆ ଡ୍ରାଇଭର, ଏଣିକି ରାଜପଥରେ ଲାଗିବ ସିସିଟିଭି
କନକ ବ୍ୟୁରୋ : ନିୟମ ଖିଲାପକାରୀଙ୍କୁ ଧରିବ ସିସିଟିଭି । ନିର୍ଦ୍ଧାରିତ ବେଗରୁ ଅଧିକ ବେଗରେ ଗାଡି ଚଲାଉଥିବା, ବିନା ହେଲମେଟରେ ଗାଡି ଚଳାଉଥିବା ବା ଟ୍ରାଫିକ ନିୟମ ଉଲ୍ଲଂଘନ କରୁଥିବା ବ୍ୟକ୍ତିଙ୍କ ଉପରେ ରୋକ୍ ଲଗାଇବା ପାଇଁ ନୂଆ ବ୍ୟବସ୍ଥାର ଆରମ୍ଭ କରିବାକୁ ଯାଉଛି ପରିବହନ ବିଭାଗ । ଖୋର୍ଦ୍ଧା ରାମେଶ୍ୱର ଠାରୁ ଚଣ୍ଡିଖୋଲ ପର୍ଯ୍ୟନ୍ତ ବିଭିନ୍ନ ଗୁରୁତ୍ୱପୂର୍ଣ୍ଣ ସ୍ଥାନରେ ସିସିଟିଭି ଲଗାଯିବ । ଏଠାରେ ଇଂଟିଗ୍ରେଟେଡ୍ ହାଇୱେ ମେନେଜମେଂଟ ସିଷ୍ଟମ ଲାଗୁ ହେବ । ଏହା ମାଧ୍ୟମରେ କମ୍ପ୍ୟୁଟର ଜରିଆରେ ନିୟମ ଖିଲାପକାରୀଙ୍କ ବିରୋଧରେ ଚାଲାଣ କରାଯିବ ବୋଲି କହିଛନ୍ତି ପରିବହନ କମିଶନର ସଂଜୀବ ପଣ୍ଡା ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମେ ଏହାକୁ ପାଇଲଟ୍ ପ୍ରକଳ୍ପ ଭାବେ କରାଯାଉଥିବା ବେଳେ ଆଗାମୀ ଦିନରେ ଏହା ରାଜ୍ୟର ବିଭିନ୍ନ ସ୍ଥାନରେ କାର୍ଯ୍ୟକାରୀ କରିବା ପାଇଁ ବିଭାଗ ନିଷ୍ପତି ନେଇଛି । ନୂଆ ପରିବହନ ନିୟମ ଆସିବା ପରଠୁ ସାବାଡ ହେଉଛନ୍ତି ମଦୁଆ । ମଦ ପିଇ ଗାଡି ଚଲାଇଲେ ତା ଉପରେ କଠୋର ନିୟମ ରହିଥିବା ବେଳେ ଗତ ୪ ମାସରେ ରାଜ୍ୟରେ ମୋଟ ୧୦ ହଜାର ମଦୁଆଙ୍କୁ ଗିରଫ କରାଯାଇଛି । ପରିବହନ ବିଭାଗ ବିଭିନ୍ନ ସ୍ଥାନରେ ଯାଂଚ ବେଳେ ଏସବୁ ମଦୁଆ ଧରାପଡିଛନ୍ତି ଏବଂ ତାଙ୍କ ବିରୋଧରେ ମାମଲା ରୁଜୁ ହୋଇଥିବା ସୂଚନା ଦେଇଛନ୍ତି ପରିବହନ କମିଶନର । ଅନ୍ୟପଟେ ପିଲାଙ୍କୁ ସଡକ ସୁରକ୍ଷା ନେଇ ସଚେତନ କରିବା ପାଇଁ ଆସନ୍ତା ଶିକ୍ଷା ବର୍ଷଠାରୁ ଦଶମ ପାଠ୍ୟକ୍ରମରେ ଏନେଇ ବିଷୟବସ୍ତୁ ରହିବ ବୋଲି କମିଶନର ସୂଚନା ଦେଇଛନ୍ତି ।