ଦେଶ ପାଇଁ ବଳିଦାନ ଦେଇଥିବା ସହିଦ ଯବାନଙ୍କ ପରିବାରକୁ ଆର୍ଥିକ ସହାୟତା କରିବାକୁ ଚାହୁଁଛନ୍ତି କି? ୱେବସାଇଟ ଓ ଆପ ମାଧ୍ୟମରେ କରିପାରିବେ ସହାୟତା
ପୁଲୱାମା ଆତଙ୍କବାଦୀ ଆକ୍ରମଣରେ ନିଜର ବୀର ଯବାନଙ୍କୁ ହରାଇଛି ଭାରତ । ଆତ୍ମଘାତୀ ଆକ୍ରମଣରେ ସହିଦ ହୋଇଛନ୍ତି ଭାରତର ୪୦ ଯବାନ । ଆଉ ଏହି ଘଟଣା ପରେ ସହିଦ ଯବାନଙ୍କ ପରିବାର ଆଖିରୁ ଲୁହ ଶୁଖୁନି । କିଏ ନିଜ ପୁଅକୁ ହରାଇଛି ତ ପୁଣି କିଏ ନିଜ ବାପାଙ୍କୁ । ଆଉ ଏସବୁ ଭିତରେ କିଛି ପତ୍ନୀଙ୍କ ମୁଣ୍ଡରୁ ସିନ୍ଦୁର ମଧ୍ୟ ଲିଭାଇ ଦେଇଛି ଏହି ଆତଙ୍କବାଦୀ ଆକ୍ରମଣ । ଏହି ଆକ୍ରମଣ ପରେ ରାଜ୍ୟ ସରକାରଙ୍କ ପକ୍ଷରୁ ଅନୁକମ୍ପାମୂଳକ ସହାୟତା ରାଶି ପ୍ରଦାନ କରିବାକୁ ଘୋଷଣା କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଦେଶ ପାଇଁ ବଳିଦାନ ଦେଇଥିବା ଯବାନ ମାନଙ୍କ ପରିବାରକୁ ଯଦି ଆପଣ ମଧ୍ୟ ଆର୍ଥିକ ସହାୟତା ପ୍ରଦାନ କରିବାକୁ ଚାହୁଁଥାନ୍ତି ତେବେ ନିଜ ଫୋନରେ ଏକ ଆପ୍ ଇନଷ୍ଟଲ କରି ସହାୟତା ପ୍ରଦାନ କରିପାରିବେ । ସରକାର ୨୦୧୭ରେ ଏଭଳି ଏକ ଆପ୍ ଓ ପୋର୍ଟାଲର ଆରମ୍ଭ କରିଛନ୍ତି । ଯାହା ସାହାଯ୍ୟରେ ଦେଶ ପାଇଁ ପ୍ରାଣବଳି ଦେଇଥିବା ସହିଦ ଯବାନଙ୍କ ପରିବାରକୁ ଆର୍ଥିକ ସହାୟତା ପ୍ରଦାନ କରିପାରିବେ ସାଧାରଣ ଲୋକ ।
ବଲିଉଡ ଅଭିନେତା ଅକ୍ଷୟ କୁମାରଙ୍କ ପରାମର୍ଶ କ୍ରମେ ଗୃହ ମନ୍ତ୍ରାଳୟ ଏହି ଆପ୍ ଓ ୱେବସାଇଟ ପ୍ରସ୍ତୁତ କରିଛି । ଅକ୍ଷୟ କୁମାର କହିଥିଲେ, ଦେଶ ପାଇଁ ସହିଦ ହୋଇଥିବା ଯବାନଙ୍କ ବାବଦରେ ଅନଲାଇନ ୱେବସାଇଟରେ ସମସ୍ତ ତଥ୍ୟ ରହିବା ଆବଶ୍ୟକ । ଯାହାଦ୍ୱାରା ଦେଶର ଯେ କୌଣସି ବ୍ୟକ୍ତି ଚାହିଁଲେ ଉକ୍ତ ସହିଦ ଯବାନଙ୍କ ପରିବାରକୁ ଆର୍ଥିକ ସହାୟତା ପ୍ରଦାନ କରିପାରିବେ ।
ଭାରତ କେ ବୀର ଆପ୍ ଓ ୱେବସାଇଟ :
ଭାରତ କେ ବୀର ୱେବପୋର୍ଟାଲ ଓ ମୋବାଇଲ ଆପରେ ସହିଦ ଯବାନଙ୍କ ବାବଦରେ ପୂରା ତଥ୍ୟ ରହିବା ସହ ତାଙ୍କ ପରିବାରବର୍ଗଙ୍କ ସହ ସର୍ମ୍ପକ କରିବାକୁ ମଧ୍ୟ ଆବଶ୍ୟକୀୟ ତଥ୍ୟ ରହିଛି । ଏଥିରେ ସହିଦ ଯବାନଙ୍କ ସର୍ମ୍ପକୀୟଙ୍କ ବ୍ୟାଙ୍କ୍ ଖାତା ନମ୍ବର ଦିଆଯାଇଛି ଯାହାଦ୍ୱାରା ଆର୍ଥିକ ସହାୟତା କରିବାକୁ ଚାହୁଁଥିବା ବ୍ୟକ୍ତି ଏହି ଆକାଉଣ୍ଟକୁ ଟଙ୍କା ପଠାଇ ପାରିବେ । ଏପରିକି ସହିଦ ଯବାନ କେଉଁ ଅଭିଯାନ ସହ ଜଡିତ ଥିବା ବେଳେ ପ୍ରାଣ ହରାଇଛନ୍ତି ସେ ବାବଦରେ ବିସ୍ତୃତ ତଥ୍ୟ ମଧ୍ୟ ରହିବ ।
ଯଦି ଆପଣ ଆପ୍ ଜରିଆରେ ସହାୟତା କରିବାକୁ ଚାହୁଁଥାନ୍ତି ତେବେ ପ୍ରଥମେ ଆପଣଙ୍କୁ ଭାରତ କେ ବୀର ଆପ ଇନଷ୍ଟଲ କରିବାକୁ ପଡିବ । ଏହାପରେ ଆପକୁ ଖୋଲିଲେ ସହିଦ ଯବାନଙ୍କ ଫଟୋ ସହ ପୂରା ତାଲିକା ଦେଖାଇବ । ସେଥିମଧ୍ୟରୁ ଆପଣ ଯେଉଁ ସହିଦ ଯବାନଙ୍କୁ ଆର୍ଥିକ ସହାୟତା କରିବାକୁ ଚାହୁଁଥିବେ ସେମାନଙ୍କ ଫଟୋ ଉପରେ କ୍ଲିକ କରିବା ପରେ ପୂରା ତଥ୍ୟ ପାଇପାରିବେ ଓ ସହାୟତା ମଧ୍ୟ କରିପାରିବେ । ଯଦି ଆପଣ ୱେବପୋର୍ଟାଲ ଜରିଆରେ ସହାୟତା କରିବାକୁ ଚାହୁଁଥାନ୍ତି ତେବେ https://bharatkeveer.gov.in/ ଲିଙ୍କକୁ ଯାଇ ହୋମ ପେଜରେ ଗାଇଡଲାଇନ ସହ Click here to contribute ବିକଳ୍ପ ଦେଖିବାକୁ ମିଳିବ । ଏହାକୁ କ୍ଲିକ କରିବା ପରେ ସହିଦ ଯବାନଙ୍କ ଫଟୋ ସହ ପୂରା ତଥ୍ୟ ମିଳିପାରିବ । ଆଉ ଉକ୍ତ ତାଲିକା ମଧ୍ୟରୁ ଯେଉଁ ଯବାନଙ୍କୁ ସହାୟତା କରିବାକୁ ଚାହୁଁଥିବ ସେମାନଙ୍କ ଫଟୋ ଉପରେ କ୍ଲିକ୍ କରି ସହାୟତା ପ୍ରଦାନ କରିପାରିବେ ।
ଏହି ୱେବସାଇଟ ଓ ମୋବାଇଲ ଆପରେ ସହିଦଙ୍କ ବାବଦରେ ସମସ୍ତ ତଥ୍ୟ ରହିଥିବା ବେଳେ କେଉଁ ତାରିଖରେ ସହିଦ ହୋଇଥିଲେ, ସେମାନଙ୍କର ର୍ୟାଙ୍କ ମଧ୍ୟ ଉଲ୍ଲେଖ ଥିବ । ଏପରିକି ସହିଦ ଯବାନଙ୍କୁ କେତେ ଟଙ୍କାର ସହାୟତା ମିଳିଛି ତାହା ମଧ୍ୟ ଉଲ୍ଲେଖ ରହିବ । ତାହକୁ ଦୃଷ୍ଟିରେ ରଖି ଆପଣ ସହାୟତା କରିପାରିବେ । ପ୍ରତି ସହିଦ ଯବାନଙ୍କ ପରିଜନଙ୍କ ବ୍ୟାଙ୍କ ଆକାଉଣ୍ଟରେ ୧୫ ଲକ୍ଷ ଟଙ୍କା ସହାୟତା ରାଶି ଜମା କରାଯାଇପାରିବ । ୧୫ ଲକ୍ଷ ଟଙ୍କା ଜମା ହେବା ପରେ ଉକ୍ତ ସହିଦ ଯବାନଙ୍କ ଫଟୋ ଓ ପରିବାରବର୍ଗଙ୍କ ବାବଦରେ ଥିବା ତଥ୍ୟ ଆପଣାଛାଏଁ ୱେବସାଇଟରୁ ହଟିଯିବ ।