ଆଉ କିଛି ସମୟ ପରେ ମହାରାଷ୍ଟ୍ର ରାଜ୍ୟପାଳଙ୍କୁ ଭେଟିବେ ଶିବସେନା-ଏନସିପି ଓ କଂଗ୍ରେସ ନେତା । ରାଜ୍ୟରେ ଦେଖାଦେଇଥିବା ପ୍ରଶାସନିକ ଅଚଳାବସ୍ଥା ନେଇ କରିବେ ଆଲୋଚନା
କନକ ବ୍ୟୁରୋ : ଆଉ କିଛି ସମୟ ପରେ ତିନି ଦଳର ପ୍ରତିନିଧି ଦଳ ମିଳିତ ଭାବେ ମହାରାଷ୍ଟ୍ରର ରାଜ୍ୟପାଳଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ରାଜ୍ୟରେ ଦେଖାଦେଇଥିବା ପ୍ରଶାସନିକ ଅଚଳାବସ୍ଥା ନେଇ ରାଜ୍ୟପାଳଙ୍କ ସହ ତିନି ଦଳର ନେତା ଆଲୋଚନା କରିବେ ବୋଲି ଜଣାପଡିଛି । ସେହି କୃଷି ଓ କୃଷକଙ୍କ ଆତ୍ମହତ୍ୟା ପ୍ରସଙ୍ଗରେ ମଧ୍ୟ ଆଲୋଚନା କରିବେ । ସେପଟେ ଆସନ୍ତାକାଲି ଦିଲ୍ଲୀରେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧିଙ୍କୁ ଶରଦ ପାୱାର ଭେଟି ପରବର୍ତୀ କାର୍ଯ୍ୟପନ୍ଥା ଚୂଡାନ୍ତ କରିବା ନେଇ ଆଲୋଚନା କରିବେ ବୋଲି ଜଣାପଡିଛି । ଆଲୋଚନା ପରେ ସରକାର ଗଠନ ନେଇ ସ୍ପଷ୍ଟ ଘୋଷଣା କରିପାରନ୍ତି ତିନି ଦଳ । ସୋନିଆ- ଶରଦଙ୍କ ଭେଟ ପୂର୍ବରୁ ତିନି ଦଳର ପ୍ରମୁଖ ନେତା ଶୁକ୍ରବାର ଏକାଠି ବସି ସର୍ବନିମ୍ନ ସାଧାରଣ କାର୍ଯ୍ୟକ୍ରମର ସୂଚୀ ପ୍ରସ୍ତୁତ କରିଛନ୍ତି । ସହମତି ଭିତିରେ ସିଏମପି – କମନ ମିନିମମ୍ ପ୍ରୋଗ୍ରାମ ସ୍ଥିର କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ତେଣୁ ମହାରାଷ୍ଟ୍ର ମହା ନାଟକରେ ଏକ ନାଟକିୟ ଅନ୍ତ ହେବାର ସମ୍ଭାବନା ସୃଷ୍ଟି ହୋଇଛି ଶିବସେନା ସହ ଏନସିପି ଓ କଂଗ୍ରେସ ମିଳିତ ଭାବେ ସରକାର ଗଠନ କରିବେ । ଭିନ୍ନ ଭିନ୍ନ ବିଚାରଧାରର ଦଳ ମିଳିତ ଭାବେ ସରକାର ଗଢ଼ି ଏକ ନୂଆ ଇତିହାସ ସୃଷ୍ଟି କରିବ ବୋଲି ବିଶେଷଜ୍ଞ ମତ ଦେଇଛନ୍ତି । ଏହି ମେଂଟ ସରକାର ରାଜ୍ୟରେ ୫ ବର୍ଷ ସ୍ଥିର ସରକାର ଦେବ ବୋଲି ଏନସିପି ମୁଖ୍ୟ ଶରଦ ପାୱାର କହିଛନ୍ତି । ଶିବସେନାକୁ ମୁଖ୍ୟମନ୍ତ୍ରୀ ପଦ ମିଳିବା ସହ ଅନ୍ୟ ଦୁଇ ଦଳରୁ ଉପମୁଖ୍ୟମନ୍ତ୍ରୀ ପଦ ମିଳିବ ବୋଲି କୁହାଯାଉଛି । ଆସନ୍ତାକାଲି ବାଲାସାହେବ ଠାକରେଙ୍କ ଶ୍ରାଦ୍ଧ ଅବସରରେ ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାଁ ଶିବସେନା ଘୋଷଣା କରିବ ବୋଲି ସୂଚନା ମିଳିଛି । ତେବେ ଆଜି ଦିଲ୍ଲୀରେ ବସିଥିବା କଂଗ୍ରେସ ବୈଠକରେ ସରକାର ଗଠନ ନେଇ ଚୂଡାନ୍ତ ନିଷ୍ପତି ନିଆଯିବ ବୋଲି ମହାରାଷ୍ଟ୍ରର କଂଗ୍ରେସ ନେତା କହିଛନ୍ତି ।