କନକ ବ୍ୟୁରୋ : ଜେଲରୁ ବାହାରିବେ ସାରଥୀ । ଜାମିନ ମିଳିଲେ ଶେଷ ହେବ ସାରଥୀ ବାବାଙ୍କ ଜେଲ ସଜା । ଓଡ଼ିଶା ହାଇକୋର୍ଟରେ କେନ୍ଦ୍ରାପଡ଼ା ବାରିମୂଳ ଆଶ୍ରମର ସାରଥୀ ବାବା ଓରଫ ସନ୍ତୋଷ ରାଉଳ ବିରୋଧରେ ହୋଇଥିବା ୩ୟ ମାମଲାର ଶୁଣାଣି ବୁଧବାର ଶେଷ ହୋଇଛି। ଜଷ୍ଟିସ ସଙ୍ଗମ କୁମାର ସାହୁଙ୍କ ଦ୍ୱାରା ଗଠିତ ଖଣ୍ଡପୀଠ ଏହି ଶୁଣାଣି କରିଛନ୍ତି।
Kanak News is now on WhatsApp
Join and get latest news updates delivered to you via WhatsApp
ଶୁଣାଣି ଶେଷ ହୋଇଥିଲେ ବି ଆଜି ରାୟକୁ ସଂରକ୍ଷିତ ରଖାଯାଇଛି ବୋଲି ସାରଥୀ ବାବାଙ୍କ ଓକିଲ ମାନସ ଚାନ୍ଦ ସୂଚନା ଦେଇଛନ୍ତି। ଆଇନଜୀବୀ ଚାନ୍ଦ କହିଛନ୍ତି, ୩ୟ ମାମଲାରେ ସାରଥୀ ବାବାଙ୍କୁ ଜାମିନ ମିଳିଲେ, ସେ ଜେଲରୁ ବାହାରି ପାରିବେ। ଆଶ୍ରମ ଅନ୍ତେବାସିନୀ ମା’-ଝିଅଙ୍କ ପକ୍ଷରୁ ୩ୟ ମାମଲା ଦାୟର ହୋଇଥିଲା। ପୂର୍ବରୁ ୨ଟି ମାମଲାରେ ସାରଥୀଙ୍କୁ ଜାମିନ ମିଳିଥିଲା।
ପୂର୍ବରୁ ଆତ୍ମଘୋଷିତ ଧର୍ମଗୁରୁ ସାରଥୀ ବାବାଙ୍କ ଜାମିନ ଆବେଦନକୁ ସୁପ୍ରିମକୋର୍ଟ ଖାରଜ କରି ଦେଇଥିଲେ। ମହିଳାଙ୍କୁ ଯୌନ ନିର୍ୟାତନା ସହିତ ଲୋକଙ୍କୁ ଠକିବା ନେଇ ସାରଥୀ ବାବାଙ୍କୁ କ୍ରାଇମବ୍ରାଞ୍ଚ ଗିରଫ କରିଥିଲା। ଏହି ଘଟଣା ଚର୍ଚ୍ଚାକୁ ଆସିବା ପରେ ମାଆ ଝିଅ ସାରଥୀଙ୍କ ବାରିମୂଳ ଆଶ୍ରମରେ ସେମାନଙ୍କୁ ନିର୍ୟାତନା ଦିଆଯାଇଥିବା ନେଇ ଅଭିଯୋଗ କରିଥିଲେ। ସୁପ୍ରିମ କୋର୍ଟର ବିଚାରପତି ଜଷ୍ଟିସ ରଞ୍ଜନ ଗୋଗେଇଙ୍କୁ ନେଇ ଗଠିତ ଦୁଇଜଣିଆ ବେଞ୍ଚ ସାରଥୀଙ୍କ ଜାମିନ ଆବେଦନକୁ ଖାରଜ କରି ଦେଇଥିଲେ।