ମୋଦି ଆସିବେ, କଣ କହିବେ ? ନବୀନଙ୍କ ଉପରେ ବର୍ଷିବେ ନା ସଙ୍କଟର ସାଥୀ ଭାବି ଚୁପ୍ ରହିବେ
କନକ ବ୍ୟୁରୋ : ଆସନ୍ତା ୨୨ ତାରିଖରେ ମୋଦିଙ୍କ ଓଡିଶା ଗସ୍ତ ଉପରେ ଏବେ ସମସ୍ତଙ୍କ ନଜର । ଓଡିଶାରେ ରାଜନୈତିକ ଉଷ୍ମତା ବଢ଼ିଯାଇଥିବାବେଳେ ମୋଦି କଣ ଆଭିମୁଖ୍ୟ ଗ୍ରହଣ କରୁଛନ୍ତି ଏବେ ତାଉପରେ ନଜର । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମୋଦି ଟାର୍ଗେଟ କରିବେ ନାଁ ନାହିଁ ତାହା ରାଜନୈତିକ ଚର୍ଚ୍ଚା ପାଇଁ ଖୋରାକ୍ ଯୋଗାଇଛି । ଅନାସ୍ଥା ପ୍ରସ୍ତାବ ସମୟରେ ବିଜେଡିର ଆଭିମୁଖ୍ୟ ଓ ରାଜ୍ୟସଭା ଉପାଧକ୍ଷ ପ୍ରସଙ୍ଗରେ ଏନଡିଏ ପ୍ରାର୍ଥୀଙ୍କୁ ନବୀନଙ୍କ ସମର୍ଥନ ପରେ ଓଡିଶାକୁ ମୋଦିଙ୍କର ଏହା ପ୍ରଥମ ଗସ୍ତ । ତେଣୁ ଏହି ଗସ୍ତ ସମୟରେ ନବୀନଙ୍କ ପ୍ରତି କଣ ରହିବ ପ୍ରଧାନମନ୍ତ୍ରୀଙ୍କ ଆଭିମୁଖ୍ୟ, ଏହା ଉପରେ ସମସ୍ତଙ୍କ ନଜର ରହିଛି ।
Kanak News is now on WhatsApp
Join and get latest news updates delivered to you via WhatsApp
ଦୁର୍ନୀତି ପ୍ରସଙ୍ଗକୁ ନେଇ ଯେତେବେଳେ ରାଜ୍ୟ ରାଜନୀତି ସରଗରମ୍ ରହିଛି, ଠିକ୍ ସେତିକି ବେଳେ ଓଡ଼ିଶା ଆସୁଛନ୍ତି ପ୍ରଧାନମନ୍ତ୍ରୀ । ଦିନିକିଆ ଗସ୍ତରେ ମୋଦି, ଝାରସୁଗୁଡ଼ା ଏୟାରପୋର୍ଟ ଏବଂ ୨ଟି କୋଇଲା ଖଣିର ଲୋକାର୍ପଣ ଭିତରେ, ତାଳଚେର ଏବଂ ଝାରସୁଗୁଡ଼ାରେ ଜନସଭା କାର୍ଯ୍ୟକ୍ରମ, ଓଡ଼ିଶାରେ ରାଜନୀତିର କାର୍ଡ ଖେଳିବାର ଏକ ଭରପୁର ସୁଯୋଗ ସୃଷ୍ଟି କରିଛି । ଦାମଙ୍କ ତୀରରେ ଦୁର୍ନୀତିର ବାଣ ମାରି ସରକାରକୁ ଘାଇଲା କରିବାକୁ ଉଦ୍ୟମ କରୁଥିବା ବିଜେପି ଘନଘନ ସାମ୍ବାଦିକ ସମ୍ମିଳନୀ କରୁଛି । ଏସବୁ ଭିତରେ ମୋଦିଙ୍କ ଓଡ଼ିଶା ଗସ୍ତ ସାଧାରଣରେ ଗୋଟିଏ ପ୍ରଶ୍ନ ଛିଡ଼ା କରିଛି । କ’ଣ ରହିବ ମୋଦିଙ୍କ ଆଭିମୁଖ୍ୟ ?
ଏହି ପ୍ରଶ୍ନ ଏଇଥିପାଇଁ ଗୁରୁତ୍ୱ ରଖୁଛି-କାରଣ ସଂକଟ ସମୟରେ ପରୋକ୍ଷରେ ହେଉ ବା ପ୍ରତ୍ୟକ୍ଷ ହେଉ, ବିଜେପିକୁ ବିଜେଡି ହିଁ ସହାୟକ ହୋଇଛି । ମୋଦି ସରକାରଙ୍କ ବିରୋଧରେ ଯେତେବେଳେ ମିଳିତ ବିରୋଧୀ ଅନାସ୍ଥା ପ୍ରସ୍ତାବ ଆଣିଲେ, ୱାକ୍ ଆଉଟ୍୍ କରିଥିଲା ବିଜେଡି । ଯାହା ଏନଡିଏକୁ ବଡ ବ୍ୟବଧାନରେ ଆସ୍ଥା ଭୋଟ୍ ଜିତିବାରେ ସହାୟକ ହୋଇଥିଲା । ଆଉ ଯେତେବେଳେ ରାଜ୍ୟସଭା ଉପାଧ୍ୟକ୍ଷ ନିର୍ବାଚନ ପାଇଁ ନିର୍ବାଚନ ହେଲା, ବିଜେଡି, ହରିପ୍ରସାଦଙ୍କ ବଦଳରେ ହରିବଂଶକୁ ବାଛିବାର ନିଷ୍ପତି ନେଇଥିଲା ।
ଏଭଳି ସ୍ଥିତିରେ ବିଜେଡି ବିରୋଧରେ ମୋଦି ମୁହଁଖୋଲିବାକୁ ଇଚ୍ଛା ପ୍ରକାଶ କରି ପାରିବେ ତ? ଅନ୍ୟପଟେ ମିଳିତ ବିରୋଧୀ ମେଂଟ ଯେତେବେଳେ ବାରମ୍ବାର ମୋଦି ସରକାରକୁ ଆହ୍ୱାନ ଦେଉଛି । ଏହି ମେଂଟଠୁ ଦୂରେଇ ରହୁଛନ୍ତି ନବୀନ ପଟ୍ଟନାୟକ । ରାଜନୀତିର ବୟାନବାଜୀ ଭିତରେ ବଡ କଥା ହେଉଛି ମୋଦିଙ୍କ ଗସ୍ତର ଠିକ୍ ଗୋଟିଏ ଦିନ ପରେ ଓଡ଼ିଶା ଗସ୍ତରେ ଆସିବେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ । ପୁରୀରେ ହେବାକୁ ଥିବା ମହିଳା ସମାବେଶରେ ଦଳୀୟ କର୍ମୀଙ୍କୁ ଗୁରୁମନ୍ତ୍ର ଦେବେ ଅମିତ ଶାହା । ବିଜେପିର ତୁଙ୍ଗ ନେତାଙ୍କ ଏହି ଘନଘନ ଗସ୍ତ ପରୋକ୍ଷରେ ଦଳର ରଣନୀତି ସ୍ପଷ୍ଟ କରୁଥିବା ବେଳେ ଖୋଲାଖୋଲି ନବୀନ ସରକାରଙ୍କୁ ଆକ୍ରମଣ କରିବେ ନା ନାହିଁ ତାହା ଆଗାମୀ ୨୨ ତାରିଖରେ ସ୍ପଷ୍ଟ ହେବ ।