କନକ ବ୍ୟୁରୋ : ମୋଦି ଚୁପ ଥିଲେ, ଶାହା ବର୍ଷିଲେ । ସାଲେପୁର ସଭାରେ ଉଭୟ ନବୀନ ଓ ରାହୁଲ ଗାନ୍ଧିଙ୍କୁ ଟାର୍ଗେଟ କରି ବିଜେପି ଶିବିରରେ ଜୋଶ ଭରି ଦେଇଛନ୍ତି ଦଳୀୟ ସେନାପତି ଅମିତ ଶାହା । ବିଜେପି ଚାଣକ୍ୟଙ୍କ ଆଟାକିଙ୍ଗ ଅନ୍ଦାଜ ମଧ୍ୟ ମିଶନ-୧୨୦କୁ ବଳ ଯୋଗାଇବ ବୋଲି ଚର୍ଚ୍ଚା ଆରମ୍ଭ ହୋଇଛି । ପୂର୍ବରୁ ପ୍ରଧାନମନ୍ତ୍ରୀ ମୋଦି ରାଜ୍ୟ ସରକାରଙ୍କ ବିରୋଧରେ ମୁହଁ ଖୋଲୁ ନଥିବା ବେଳେ ସାଲେପୁର ସଭାରେ ଶାହା କଣ କହିବେ ତାହା ଉପରେ ସମସ୍ତଙ୍କର ନଜର ରହିଥିଲା । ଆଉ ଏଭଳି ସମୟରେ ବିଜେପି ସେନାପତି ଉଭୟ ବିଜେଡି ଓ କଂଗ୍ରେସ ବିରୋଧରେ ଯୁଦ୍ଧଂ ଦେହି ଡାକରା ଦେଇ ଗେରୁଆ କ୍ୟାମ୍ପକୁ ତତାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୨୦୧୯ ନିର୍ବାଚନକୁ ଆଉ ମାତ୍ର ଦିନ କେଇଟା ବାକି ଥିବା ବେଳେ ଶାହା ଚିରାଚରିତ ଢଙ୍ଗରେ ସିଧାସଳଖ କଂଗ୍ରେସ ଓ ବିଜେଡି ଉପରେ ହମଲା କରିଛନ୍ତି । ଅମିତ ଶାହା ପୁରୁଣା ପାଠର ପୁନରାବୃତ୍ତି କରିବା ସହ ୨୦୧୯ରେ ୧୯ ବର୍ଷର ସରକାରକୁ ସମାପ୍ତ କରିବାକୁ କର୍ମୀ ମାନଙ୍କୁ ଆହ୍ୱାନ ଦେଇଛନ୍ତି । ଏହାସହ ଆଗାମୀ ନିର୍ବାଚନରେ ଓଡିଆ କହି ପାରୁଥିବା ମୁଖ୍ୟମନ୍ତ୍ରୀ ନିର୍ବାଚିତ କରିବା ପାଇଁ ସଂକଳ୍ପ କରିବାକୁ ଆହ୍ୱାନ ଦେଇଛନ୍ତି ଅମିତ୍ । ରାଜ୍ୟ ସରକାରଙ୍କ ବିରୋଧରେ ଗୋଟିଏ ପରେ ଗୋଟିଏ ଅଭିଯୋଗଫର୍ଦ୍ଦ କାଢି କର୍ମୀଙ୍କ ସାମ୍ନାରେ ରଖିଛନ୍ତି ବିଜେପି ଚାଣକ୍ୟ । ବିଜେପିକୁ କ୍ଷମତାକୁ ଆଣିଲେ ଓଡିଶାକୁ ଏକ ନମ୍ବର ରାଜ୍ୟରେ ପରିଣତ କରିବାକୁ ଶାହା କହିଥିବା ବେଳେ ଏଥିପାଇଁ ଭୋଟ ଗଣତି ଶେଷ ନ ହେବା ପର୍ଯ୍ୟନ୍ତ କର୍ମୀ ମାନଙ୍କୁ ଆରାମ ନ କରିବାକୁ ଆହ୍ୱାନ ଦେଇଛନ୍ତି ।
ଆଉ ଓଡିଶା ପାଇଁ ଅମିତ ଶାହାଙ୍କ ଏଭଳି ଷ୍ଟ୍ରାଟେଜି ଦେଖି ବିଜେପି ଶିବିର ମଧ୍ୟ ବେଶ ଉତ୍ସାହିତ । ତେବେ ରାଜ୍ୟ ସରକାରଙ୍କୁ ନେଇ ଶାହାଙ୍କ ଡାଇରେକ୍ଟ ଆଟାକ ପରେ ଓଡିଶାରେ ବିଜେପିର ଭାଗ୍ୟ ବଦଳିବ କି । ଏକଥା ଏଥିପାଇଁ କୁହାଯାଉଛି, କାରଣ ଗତ ମାସରେ ୩ ଥର ବିଜେପିର ଶୀର୍ଷ ନେତୃତ୍ୱ ତଥା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡିଶା ଗସ୍ତରେ ଆସିଥିବା ବେଳେ ରାଜ୍ୟ ସରକାରଙ୍କୁ ଡାଇରେକ୍ଟ ଆଟାକ କରିବାକୁ ଯେମିତି ସାହସ ଜୁଟାଇ ପାରିନଥିଲେ । ଯାହାକୁ ତୃଣମୂଳ ସ୍ତରରେ କର୍ମୀ ମାନେ ନାପସନ୍ଦ କରିଥିବା ବେଳେ ଏହା ଗେରୁଆ କ୍ୟାମ୍ପର କର୍ମୀ ମାନଙ୍କ ମନୋବଳ ଭାଙ୍ଗି ଦେଇଥିଲା ।
ଆଉ ଶୀର୍ଷ ନେତୃତ୍ୱଙ୍କ ଏଭଳି ଷ୍ଟ୍ରାଟେଜି ଦେଖି ବିଜେପିର ମିଶନ-୧୨୦ ଉପରେ ମଧ୍ୟ ପ୍ରଶ୍ନ ଉଠିଥିଲା । କେବଳ ପୋଷ୍ଟରରେ ମିଶନ-୧୨୦ ନାରାର ଝଲକ ଦେଖିବାକୁ ମିଳୁଥିବା ବେଳେ କର୍ମୀ ମାନେ ଯେପରି ଏହାକୁ ମନରୁ ପାଶୋରି ଦେଇଥିଲେ । ଲାଗୁଥିଲା ସତେଯେମିତି ବିଜେପିର ମିଶନ-୧୨୦ ଶୀତଳ ଭଣ୍ଡାରକୁ ଚାଲି ଯାଇଛି । ଏଭଳି ସମୟରେ ଅମିତ ଶାହାଙ୍କ ବୟାନ ପୁଣିଥରେ ମିଶନ-୧୨୦କୁ ବଳ ଯୋଗାଇଛି । ଆଉ ଓଡିଶା ପାଇଁ ଅମିତ ଶାହାଙ୍କ ଏଭଳି ଷ୍ଟ୍ରାଟେଜି ଦେଖି ବିଜେପିର ସ୍ଲିପର ସେଲ ସୈନିକ ମାନେ ଏବେ ଆକ୍ଟିଭ ମୋଡକୁ ଚାଲି ଆସିଛନ୍ତି ।
ସବୁଠୁ ବଡ କଥା ହେଲା, ନିଜ ଭାଷଣରେ ପଞ୍ଚାୟତ ନିର୍ବାଚନ କଥା କର୍ମୀ ମାନଙ୍କୁ ମନେ ପକାଇ ଦେଇଛନ୍ତି ଶାହା । ପଞ୍ଚାୟତ ନିର୍ବାଚନରେ ଦଳ ଯେଉଁଭଳି ଭାବେ ସଫଳତା ପାଇଥିଲା ତାହାର ରିପଟି କରିବାକୁ କର୍ମୀ ମାନଙ୍କୁ ଆହ୍ୱାନ ଦେଇଛନ୍ତି । ଏହାଛଡା ହିନ୍ଦୀଭାଷା ରାଜ୍ୟରେ ବିଜେପି ଯେଉଁ କ୍ଷତି ସହିଛି ତାହାର ଭରଣା ପୂର୍ବ ଭାରତରେ କରିବାକୁ ଯୋଜନାରେ ରହିଛନ୍ତି ବିଜେପି ଚାଣକ୍ୟ । ଆଉ ଏହି କ୍ରମରେ ବିଜେପି କମାଣ୍ଡରଙ୍କ ଫୋକସରେ ଏବେ ରହିଛି ଓଡିଶା । ଆଉ ଏହାର ଝଲକ ଅମିତ ଶାହାଙ୍କ ଭାଷଣରେ ଦେଖିବାକୁ ମିଳିଛି । ଶାହାଙ୍କ ଭାଷଣ କେବଳ ବିଜେପି ଶିବିରକୁ ଉତ୍ସାହିତ କରିନି ବରଂ କର୍ମୀ ମାନଙ୍କ ମନରେ ଯୁଦ୍ଧ ଜିତିବା ପାଇଁ ଜୋଶ ଭରି ଦେଇଛି । ତେଣୁ ଆଗାମୀ ଦିନରେ ଶାହାଙ୍କ ଏହି ଗୁରୁମନ୍ତ୍ର ବିଜେପିକୁ ନିର୍ବାଚନୀ ଯୁଦ୍ଧରେ କେତେ ଫାଇଦା ଦେଉଛି ତାହା ଦେଖିବା ବାକି ରହିଲା ।