କନକ ବ୍ୟୁରୋ : କେହି ଭୋକିଲା ଶୋଇବେନି । ସଭିଙ୍କ ମୁହଁରେ ଆହାର ପହଞ୍ଚିବ । ଏଭଳି ସବୁ ନାରାଦେଇ ଉଭୟ କେନ୍ଦ୍ର ଓ ରାଜ୍ୟ ସରକାର ଅନେକ ଯୋଜନା କରିଛନ୍ତି । ହେଲେ ଆଜି ବି ଲୋକ ଆମ୍ବ ଟାକୁଅ ଖାଉଛନ୍ତି । ଆଉ ଏହି ଆମ୍ବ ଟାକୁଆ ନବରଙ୍ଗପୁର ଜିଲ୍ଲାରେ ୩ଜଣଙ୍କ ଜୀବନ ନେଇଛି । ଏବେ ବି ଜଣେ ଜୀବନ ସହ ସଂଗ୍ରାମ କରୁଛନ୍ତି । କାହିଁକି ଏବଂ କେଉଁ ପରିସ୍ଥିତିରେ ମଇନାପୁରର ସାନ୍ତା ପରିବାର ଆମ୍ବ ଟାକୁଆ ଖାଇଲେ, ତାହା ପରଖିଥିଲା କନକ ନ୍ୟୁଜ ଟିମ୍ ।
Kanak News is now on WhatsApp
Join and get latest news updates delivered to you via WhatsApp
ଝରିଗାଁ ବ୍ଲକର ମଇନାପୁର ଗାଁରେ ପହଂଚିବା ପୂର୍ବରୁ ଗାଁକୁ ସଂଯୋଗ କରୁଥିବା ରାସ୍ତା ହିଁ କହି ଦେଉଥିଲା ଉପାନ୍ତ ଇଲାକାର ବିକାଶର ଚିତ୍ର । ରାସ୍ତା କହିଲେ ପାଦ ଚଲା ବାଟ । ମଝିରେ ମଝିରେ ଛୋଟିଆ ଛୋଟିଆ ନାଳ । ବହୁ କଷ୍ଟରେ ଗାଁରେ ପହଂଚିଥିଲା ଆମ ଟିମ୍ । ଗାଁରେ ଥିଲା ଦୁଃଖରେ ମାହୋଲ । ସାନ୍ତା ପରିବାରଙ୍କ ଘର ଅଗଣାରେ ପଡ଼ି ରହିଥିଲା ମୃତ- ଦେହ । ଆଉ କାନ୍ଦ ବୋବାଳିରେ ଫାଟି ପଡୁଥିଲା ପୁରା ପରିବେଶ । ଏଭଳି ପରିସ୍ଥିତିରେ ମୃତକଙ୍କ ପରିବାର ଲୋକଙ୍କୁ ଘଟଣା ସଂପର୍କରେ ପଚାରି ବୁଝିବା ଯେମିତି କଷ୍ଟ ଥିଲା, ସେମାନେ ଉତର ଦେବା ଆହୁରି ଅସାଧ୍ୟ ଥିଲା । ବହୁ କଷ୍ଟରେ ଘଟଣା ସଂପର୍କରେ କହିଥିଲେ ଅର୍ଜୁନ୍ ।
ଘରେ ମୁଖିଆ ନଥିଲେ, ବଡ ଭାଇ ଚାଷ ପାଇଁ ବିଲକୁ ଯାଇଥିଲେ । ଆଉ ମହିଳାମାନେ ରୋଷେଇ କରିବା ସମୟରେ ନଜର ପଡ଼ିଥିଲା, ଘରେ ଥିବା ଆମ୍ବ ଟାକୁଅର କୋଇଲିରୁ ପ୍ରସ୍ତୁତ ହୋଇଥିବା ଚୁନା ଉପରେ । ସେହି ଚୁନାରୁ ପିଠା ପ୍ରସ୍ତୁତ କରି ଖାଇବାର, କେଇଘଂଟା ଭିତରେ ପରିବାର ୪ ଜଣ ଅସୁସ୍ଥ ହୋଇପଡ଼ିଥିଲେ । ଆଉ ଚାହୁଁ ଚାହୁଁ ନମିତା ସାନ୍ତାଙ୍କ ଜୀବନ ଚାଲିଗଲା । ଏଭଳି ସ୍ଥିତିରେ ଆମ୍ବୁଲାନ୍ସ ନଆସିବାରୁ ଘରେ ଥିବା ଟ୍ରାକ୍ଟରରେ ଅନ୍ୟ ସମସ୍ତଙ୍କୁ ଝରିଗାଁ ହସ୍ପିଟାଲ ନିଆଯାଇଥିଲା । ଝରିଆଁରୁ ନବରଙ୍ଗପୁର ହସ୍ପିଟାଲ ନିଆଯାଇଥିଲା, ସେଠି ସଦାମଣୀ ସାନ୍ତା ଏବଂ କୋରାପୁଟ ମେଡ଼ିକାଲରେ ପ୍ରମିଳା ସାନ୍ତାଙ୍କ ମୃତ୍ୟୁ ହୋଇଥିଲା । ଆଉ ଏବେ ଜୀବନ ମୃତ୍ୟୁ ସହ ସଂଗ୍ରାମ କରୁଛନ୍ତି କୁନି ପୁଅ ।
ମଇନାପୁରରେ ସ୍ଥାନୀୟ ବିଡିଓ ପହଂଚି ପ୍ରାଥମିକ ସରକାରୀ ସହାୟତା ଯୋଗାଇ ଦେଇଥିବା ବେଳେ ଖାଦ୍ୟ ସୁରକ୍ଷା ଆଇନ୍ ଅନୁସାରେ ସାନ୍ତା ପରିବାରକୁ ଖାଦ୍ୟ ସମାଗ୍ରୀ ମିଳୁଥିବା କହିଛନ୍ତି ।ଏବେ ପ୍ରଶ୍ନ ହେଉଛି- ଏମାନେ ଆମ୍ବ ଟାକୁଆ ଖାଇଲେ କାହିଁକି ? ଏହାର ସତ ବୁଝୁ ବୁୂଝୁ ଖାଦ୍ୟାଭ୍ୟାସ ଯୋଗୁଁ ପାରମ୍ପରିକ ଆମ୍ବ ଟାକୁଆ ଖାଉଥିବା କହିଥିଲେ ଗାଁ ଲୋକେ । ତେବେ ପ୍ରଶ୍ନ ଉଠୁଛି ଏହା ଭୋକ ନା’ ପାରମ୍ପରିକ ଅଭ୍ୟାସ ? ସାନ୍ତା ପରିବାର ଭୋକ ଉପାସରେ ରହୁନଥିଲେ । ଏମିତି କି ସରକାରୀ ଯୋଜନାରେ ତାଙ୍କୁ ଖାଦ୍ୟ ସାମଗ୍ରୀ ମଧ୍ୟ ଯୋଗାଇ ଦିଆଯାଉଥିଲା ।କିନ୍ତୁ ଏହାପରେ ମଧ୍ୟ ଆମ୍ବ ଟାକୁଆ ଖାଇ ୩ ଜୀବନ ନିରିହ ଜୀବନ ଚାଲିଯାଇଛି । ତେଣୁ ପ୍ରଶାସନ ଏନେଇ ଲୋକମାନଙ୍କୁ ସଚେତନ କଲେ ହୁଏତ ଆମ୍ବ ଟାକୁଆ ଯୋଗୁଁ ଅନ୍ୟ କାହାର ଜୀବନ ଯିବ ନାହିଁ ।