ଯାତ୍ରୀଙ୍କର ପ୍ରଥମ ପସନ୍ଦ ପାଲଟିଲା ‘ମୋ ବସ୍’ ସେବା । ଜାଣନ୍ତୁ ଅନ୍ୟ ବସ୍ ଠାରୁ କିଭଳି ଅଲଗା ‘ମୋ ବସ୍’ ସେବା ।
ରାଜଧାନୀରେ ଆରମ୍ଭ ହେଲା ମୋ ବସ୍ ସେବା । ୯ଟି ରୁଟରେ ଗଡିବ ଶହେଟି ନୂଆ ବସ୍
କନକ ବ୍ୟୁରୋ : ‘ମୋ ବସ୍’ । ଦୀପାବଳି ପୂର୍ବରୁ ରାଜଧାନୀବାସୀଙ୍କୁ ରାଜ୍ୟ ସରକାରଙ୍କ ସବୁଠୁ ବଡ ଭେଟି । ସ୍ମାର୍ଟସିଟିରେ ଗଡିଛି ସ୍ମାର୍ଟ ବସ୍ । ମୁଖ୍ୟମନ୍ତ୍ରୀ ନିଜେ ଏହି ବସରେ ବସି ଯାତ୍ରା କରିଛନ୍ତି । ତେବେ ଟ୍ୱିନ୍ ସିଟିରେ ଚାଲୁଥିବା ସିଟି ବସ ଓ ମୋ ବସ୍ ମଧ୍ୟରେ ଏମିତି କଣ ଭିନ୍ନତା ରହିଛି ଯାହା ଯାତ୍ରୀ ମାନଙ୍କୁ ଏହି ବସରେ ଯାତ୍ରା କରିବାକୁ ଆକୃଷ୍ଟ କରୁଛି । କାରଣ ଏହି ସ୍ମାର୍ଟ ବସରେ ଏଭଳି କିଛି ବ୍ୟବସ୍ଥା ରହିଛି ଯେଉଁଥିପାଇଁ ଯାତ୍ରୀଙ୍କର ଏହା ଯାତ୍ରା ପାଇଁ ପ୍ରଥମ ପସନ୍ଦ ପାଲଟିଛି ।
Kanak News is now on WhatsApp
Join and get latest news updates delivered to you via WhatsApp
ସୁରକ୍ଷା ପାଇଁ ସିସିଟିଭି, ଗରମରୁ ରକ୍ଷା ପାଇବା ପାଇଁ ଏସି, ମନୋରଞ୍ଜନ ପାଇଁ ଇଣ୍ଟରନେଟ ଏଭଳି ସୁବିଧା ପ୍ରାୟତଃ ଘରେ କିମ୍ବା ବିମାନବନ୍ଦରରେ ପାଇଥାନ୍ତି ଲୋକେ । କିନ୍ତୁ ଏବେ ବସ୍ରେ ମିଳିବ ଏଭଳି ସୁବିଧା । ତାହା ବି ପୁଣି ଭୁବନେଶ୍ୱରରେ । ଆରାମଦାୟକ ଯାତ୍ରା ପାଇଁ ଯାତ୍ରୀଙ୍କୁ ଏଭଳି ସୁବିଧା ଯୋଗାଇ ଦେବାକୁ ରାଜ୍ୟ ସରକାର ରାଜଧାନୀ ଭୁବନେଶ୍ୱରରେ ଏଭଳି ୧୦୦ଟି ଅତ୍ୟାଧୁନିକ ବସ୍ ଚଳାଇବା ଆରମ୍ଭ କରିଛନ୍ତି ।
ଯେଉଁଥିରେ ଯାତ୍ରୀଙ୍କ ସୁରକ୍ଷା ପାଇଁ ସିସିଟିଭି ଲଗାଯାଇଥିବା ବେଳେ ଯାତ୍ରା ସମୟରେ ୱାଇଫାଇର ମଧ୍ୟ ସୁବିଧା ମିଳିବ । ଏହାଛଡା ଗରମରୁ ରକ୍ଷା ପାଇବା ପାଇଁ ବସରେ ଏସି ମଧ୍ୟ ଲଗାଯାଇଛି । ଏସବୁ ବାଦ୍ ବସ୍ ଟିକେଟ ପାଇଁ ଯେଉଁଭଳି ଲାଇନ ଲଗାଇବାକୁ ପଡୁଥିଲା ତାହା ମଧ୍ୟ ଦେଖିବାକୁ ମିଳିବ ନାହିଁ । କାରଣ ଯାତ୍ରୀ ମାନେ ଘରେ ବସି ‘ମୋ ବସ’ ଆପ ମାଧ୍ୟମରେ ଅନଲାଇନ ଟିକେଟ ବୁକ୍ କରିପାରିବେ । ଏପରିକି ବସକୁ ଟ୍ରାକ କରିବାକୁ ଏଥିରେ ଜିପିଏସ ମଧ୍ୟ ଲାଗିଛି । ଯାହା ଗ୍ରାହକଙ୍କୁ ଯାତ୍ରା ସମୟରେ ଏକ ଭିନ୍ନ ଅନୁଭୂତି ଦେବ ।
ସବୁଠୁ ବଡ କଥା ହେଲା, ଯାତ୍ରୀ ମାନଙ୍କୁ ଯେଉଁଭଳି ଭାବେ ପୂର୍ବରୁ ସିଟି ବସକୁ ଅପେକ୍ଷା କରି ରହିବାକୁ ପଡୁଥିଲା ତାହା ମଧ୍ୟ ଆଉ ଦେଖିବାକୁ ମିଳିବ ନାହିଁ । କାରଣ ପ୍ରତି ୧୦ ମିନିଟରେ ବସ ଷ୍ଟପରେ ହାଜର ହେବ ମୋ ବସ୍ । ଏହି ବସରେ ମହିଳା ମାନଙ୍କ ସୁରକ୍ଷାକୁ ମଧ୍ୟ ଗୁରୁତ୍ୱ ଦିଆଯାଇଛି । ଚାଲିବାକୁ ଥିବା ସମସ୍ତ ବସରେ ୫୦ ପ୍ରତିଶତ ମହିଳାଙ୍କୁ ମଧ୍ୟ ନିଯୁକ୍ତି ଦିଆଯାଇଛି । ଏହାଛଡା ଯାତ୍ରୀ ମାନଙ୍କୁ ବସରେ ଯାତ୍ରା ସମୟରେ ଭବ୍ୟ ସ୍ୱାଗତ ମଧ୍ୟ କରାଯିବ । ଏସବୁ ବାଦ୍ ବସ ବାବଦରେ ଟିକିନିକି ସୂଚନା ଅନଲାଇନ ମାଧ୍ୟମରେ ପାଇପାରିବେ ଯାତ୍ରୀ ।
ହକି ବିଶ୍ୱକପ୍ ପୂର୍ବରୁ ଭୁବନେଶ୍ୱରରେ ଆରମ୍ଭ ହୋଇଛି ସ୍ମାର୍ଟ ଯାତାୟତ ବ୍ୟବସ୍ଥା ମୋ ବସ୍ । ଯାହା ସହରରେ ଯାତାୟତ ଭିଡ କମାଇବା ସହ ଯାତ୍ରୀଙ୍କୁ ଅତ୍ୟାଧୁନିକ ସେବା ଯୋଗାଇଦେବ । ତେଣୁ ଅଟୋ ଓ ସିଟି ବସ ଅପେକ୍ଷା ଏବେ ଯାତ୍ରୀଙ୍କର ପ୍ରଥମ ପସନ୍ଦ ପାଲଟିଛି ‘ମୋ ବସ୍’ ସେବା ।