କନକ ବ୍ୟୁରୋ : ବିଜେପୁର ପାଇଁ କଂଗ୍ରେସରେ କନଫ୍ୟୁଜନ । କିଏ ହେବ ବିଜେପୁରରେ କଂଗ୍ରେସର ପ୍ରାର୍ଥୀ । ଏହାକୁ ନେଇ ଏବେ ଆରମ୍ଭ ହୋଇଛି ଚର୍ଚ୍ଚା । ଉପନିର୍ବାଚନ ପାଇଁ ବିଜ୍ଞପ୍ତି ପ୍ରକାଶ ପାଇବା ସହ ନାମାଙ୍କନ ପତ୍ର ଦାଖଲର ଶେଷ ତାରିଖ ଫେବୃଆରୀ ୬ ହୋଇଥିଲେ ସୁଦ୍ଧା ଏପଯ୍ୟନ୍ତ କଂଗ୍ରେସର ପ୍ରାର୍ଥୀ ଘୋଷଣା ହୋଇନାହିଁ । ଏପରିକି ବିଜେପୁର ପାଇଁ କାହାକୁ ପ୍ରାର୍ଥୀ କରାଯିବ ସେ ନେଇ ହରଡଘଣାରେ ପଡିଛନ୍ତି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି । କାରଣ ବିଜେପୁର ପାଇଁ ରାହୁଲଙ୍କ ପାଖରେ ଦୁଇଟି ନାଁ ପହଞ୍ଚଛି । ଆଉ ଏହା ଭିତରୁ କେଉଁ ନାଁରେ ମୋହର ମରାଯିବ ତାକୁ ନେଇ ଚିନ୍ତାରେ ପଡିଯାଇଛନ୍ତି ରାହୁଲ । ବିଜେପୁର ଉପନିର୍ବାଚନ ପାଇଁ ପ୍ରାର୍ଥୀ ଚୟନ କରିବାକୁ ପୂର୍ବତନ ମୁଖ୍ୟମନ୍ତ୍ରୀ ହେମାନନ୍ଦ ବିଶ୍ୱାଳଙ୍କୁ ଦାୟିତ୍ୱ ଦିଆଯାଇଥିଲା । ତେବେ ହେମାନନ୍ଦ ଯେଉଁ ରିପୋର୍ଟ ଦେଇଥିଲେ ସେଥିରେ ଦୁଇଜଣଙ୍କ ନାଁ ସର୍ବାଗ୍ରେ ରହିଛି । ଜଣେ ହେଉଛନ୍ତି ବିଜେପୁରର ଟାଣୁଆ ସଂଗଠକ ପ୍ରଣୟ ସାହୁ ଓ ଅନ୍ୟଜଣେ ହେଉଛନ୍ତି ବିଜେପୁରର ପୂର୍ବତନ କଂଗ୍ରେସ ବିଧାୟକ ରିପୁନାଥ ସେଠ ।
Kanak News is now on WhatsApp
Join and get latest news updates delivered to you via WhatsApp
ତେବେ ଏହି ଦୁଇଜଣଙ୍କ ଭିତରୁ କାହା ନାଁରେ ମୋହର ବାଜିବ ତାକୁ ନେଇ ଏବେ ମଧ୍ୟ ସସପେନ୍ସ ଜାରି ରହିଛି । ପ୍ରଶ୍ନ ଉଠୁଛି ରାହୁଲ ଗାନ୍ଧି ବିଜେପୁର ପାଇଁ ବାଛିବେ କାହାକୁ ? କାରଣ ରାଜ୍ୟ କଂଗ୍ରେସର କିଛି ନେତା ପ୍ରଣୟ ସାହୁଙ୍କ ସପକ୍ଷରେ ଲବି କରୁଥିବା ବେଳେ ଅନ୍ୟ ଗୋଷ୍ଠି ରିପୁନାଥଙ୍କୁ ଟିକେଟ ଦେବାକୁ ହାଇକମାଣ୍ଡଙ୍କ ପାଖରେ ଯୁକ୍ତି କରୁଛନ୍ତି । ତେବେ କଂଗ୍ରେସ ପ୍ରାର୍ଥୀ ଖୋଜୁ ଖୋଜୁ ଉଭୟ ବିଜେଡି ଓ ବିଜେପି ଅନେକ ପାଦ ଆଗକୁ ଯାଇ ସାରିଲେଣି । ନାମାଙ୍କନ ଦାଖଲ କରିବା ପାଇଁ ଆଉ ମାତ୍ର ହାତରେ ୩ଟି ଦିନ ରହିଥିବା ବେଳେ ଏବେ ମଧ୍ୟ କଂଗ୍ରେସ କୁମ୍ଭକର୍ଣ୍ଣ ନିଦରେ ଶୋଇଥିବା ଭଳି ଲାଗୁଛି । ଦେଶର ସବୁଠାରୁ ପୁରାତନ ଦଳ ବିଜେପୁର ପାଇଁ ଏପର୍ଯ୍ୟନ୍ତ ପ୍ରାର୍ଥୀ ଘୋଷଣା କରି ନ ପାରିବା କଂଗ୍ରେସର ସାଂଗଠନିକ ଦୁର୍ବଳତାକୁ ପଦାରେ ପକାଇଛି ।
ତେବେ ଏସବୁ ଭିତରେ ଆଜି ବିଜେପୁର ପାଇଁ ପ୍ରାର୍ଥୀ ଘୋଷଣା କରିପାରେ କଂଗ୍ରେସ । ଯଦି ଦଳ ପୂର୍ବତନ ବିଧାୟକ ରିପୁନାଥ ସେଠଙ୍କୁ ପ୍ରାର୍ଥୀ ଭାବେ ଘୋଷଣା କରେ ତେବେ ପ୍ରଣୟ ସାହୂୁଙ୍କ ଆଭିମୁଖ୍ୟ କଣ ରହିବ ତାହା ଉପରେ ଏବେ ସମସ୍ତଙ୍କ ନଜର । କାରଣ ପ୍ରଣୟଙ୍କର ବିଜେପୁର ରାଜନିତିରେ ବେଶ କାଟତି ରହିଛି । ଏପରିକି ଜଣେ ଦକ୍ଷ ସଂଗଠକ ଭାବେ ମଧ୍ୟ ପ୍ରଣୟଙ୍କର ନାଁ ରହିଛି । ଏପରିକି ଗାଈସିଲଟ ବ୍ଲକରେ ପ୍ରଣୟ ହିଁ କଂଗ୍ରେସର ମୁଖ୍ୟପୁରୋଧା । ତେଣୁ ରିପୁନାଥଙ୍କୁ ପ୍ରାର୍ଥୀ କରାଗଲେ ପ୍ରଣୟ ଦଳ କଥା ମାନି ଚୁପ ରହିବେ ନା ଭିତିରିଆ ଅନ୍ୟ କୌଣସି ଦଳକୁ ସାହାଯ୍ୟ କରିବେ ତାହା ଏବେ ଚର୍ଚ୍ଚାର ବିଷୟ ପାଲଟିଛି । କାରଣ ପ୍ରଣୟଙ୍କର ଗାଇସିଲଟ ବ୍ଲକରେ ଏକ ବଡ ସଂଗଠନ ରହିଛି ତେଣୁ ଏହାକୁ ମଧ୍ୟ ଅଣଦେଖା କରି ନ ପାରନ୍ତି ରାହୁଲ । ଯଦି ରିପୁଙ୍କୁ ପ୍ରାର୍ଥୀ କରି ପ୍ରଣୟଙ୍କୁ ସେହିଭଳି ଆଶ୍ୱସନା ଦିଆ ନଯାଏ ତେବେ ଗାଈସିଲଟରେ ଥିବା କଂଗ୍ରେସର ଭୋଟ ହରାଇପାରେ ଦଳ ।
ଅନ୍ୟପଟରେ ଯଦି ରାଜ୍ୟ କଂଗ୍ରେସର ଅନ୍ୟ ଗୋଷ୍ଠୀର କଥାରେ ପ୍ରଣୟ ସାହୁଙ୍କୁ ପ୍ରାର୍ଥୀ କରାଯାଏ ତେବେ ରିପୁନାଥ ବିଦ୍ରୋହୀ ସାଜିବେନି ତ । ଏହା ଦଳ ଭିତରେ ପୁଣିଥରେ ଗୋଷ୍ଠି କନ୍ଦଳ ସୃଷ୍ଟି କରିବନି ତ? ଯଦି ଏଭଳି ହୁଏ ତେବେ କଂଗ୍ରେସର ଶୀର୍ଷ ନେତାଙ୍କ ଭି୍ତରେ ଲାଗି ରହିଥିବା ଗୋଷ୍ଠୀ କନ୍ଦଳ ପୁଣିଥରେ ବିଜେପୁର ଉପନିର୍ବାଚନରେ ଦେଖିବାକୁ ମିଳିବ । ଆଉ ଏହାର ପ୍ରଭାବ ସିଧାସଳଖ ବିଜେପୁର ଉପନିର୍ବାଚନର ଫଳାଫଳ ଉପରେ ପଡିବ । କାରଣ ରିପୁନାଥ ମଧ୍ୟ କଂଗ୍ରେସରୁ ବିଧାୟକ ହୋଇସାରିଛନ୍ତି । ତେଣୁ ତାଙ୍କୁ ବଏକଟ କରି ପ୍ରଣୟଙ୍କୁ ଟିକେଟ ଦେବା କଂଗ୍ରେସକୁ କିଛି ମାତ୍ରାରେ ଅଡୁଆରେ ପକାଇବ । ତେବେ ଯଦି ଉଭୟଙ୍କୁ କିପରି ସନ୍ତୁଷ୍ଟ କରାଯିବ ସେ ନେଇ ବିଚାର କରୁଛନ୍ତି କଂଗ୍ରେସ ଅଧ୍ୟକ୍ଷ । ଯଦି ଉଭୟଙ୍କ ଭିତରେ ସମନ୍ୱୟ ରଖାଯାଇ ପାରିବ ତେବେ କଂଗ୍ରେସର ଗୋଷ୍ଠି କନ୍ଦଳ ପ୍ରଶମିତ ହୋଇପାରେ । ତେବେ ଉଭୟଙ୍କ ଭିତରେ ସମନ୍ୱୟ ରକ୍ଷା କରିବା ପାଇଁ କଂଗ୍ରେସ କେଉ ଫର୍ମୂଲା ଆପଣାଉଛି ତାହା ଦେଖିବା ବାକି ରହିଲା । ଏସବୁ ଭିତରେ ଯଦି ଆଜି ବିଜେପୁର ପାଇଁ ପ୍ରାର୍ଥୀଙ୍କ ନାମ ଘୋଷଣା ହୁଏ ତେବେ ଆସନ୍ତା ୬ ତାରିଖ ଅଥାର୍ତ ଶେଷ ଦିନରେ କେଂଗ୍ରେସ ପ୍ରାର୍ଥୀ ନାମାଙ୍କନ ପତ୍ର ଦାଖଲ କରିବେ ବୋଲି ସୂଚନା ମିଳିଛି ।
ଅନ୍ୟପଟରେ କଂଗ୍ରେସର ବିଜେପୁର ପାଇଁ ପ୍ରାର୍ଥୀ ଚୟନକୁ ନେଇ ସୋସିଆଲ ମିଡିଆରେ ଜୋରଦାର ଆଲୋଚନା ହେଉଛି । ବିଜେପୁର ପାଇଁ ପ୍ରାର୍ଥୀ ଚୟନ ନେଇ କଂଗ୍ରେସ ନେତାଙ୍କ ମଧ୍ୟରେ ବିବାଦୀୟ ବୟାନବାଜି ଜାରି ରହିଥିବା ବେଳେ ପ୍ରାର୍ଥୀ ଚୟନକୁ ନେଇ କଂଗ୍ରେସ ନେତାଙ୍କ ନିରପେକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ତେବେ ଏସବୁ ଭିତରେ କଂଗ୍ରେସରେ ପ୍ରାର୍ଥୀକୁ ନେଇ ଲାଗି ରହିଥିବା ଛକାପଞ୍ଝାରୁ ଫାଇଦା ନେବାକୁ ଅଣ୍ଟା ଭିଡିଛନ୍ତି ଉଭୟ ବିଜେଡି-ବିଜେପି ।ଗୋଟିଏ ପଟେ ବିଜେପି ଓ ବିଜେଡି ପ୍ରାର୍ଥୀ ଘୋଷଣା କରି ବିଜେପୁର ଅଭିଯାନ ଆରମ୍ଭ କରିସାରିଥିବା ବେଳେ, କଂଗ୍ରେସର ଗୋଷ୍ଠୀ କନ୍ଦଳର ପ୍ରଭାବ ପ୍ରାର୍ଥୀ ଚୟନରେ ମଧ୍ୟ ବାରିହେଉଛି ।