ବାସ୍ତବ ଜୀବନର ସୁପରହିରୋ : ସିରିୟାବାସୀଙ୍କ ପାଇଁ ଦେବଦୂତ ଠାରୁ କମ ନୁହଁନ୍ତି ହ୍ୱାଇଟ ହେଲମେଟ ଟିମ, ଦୁଃସ୍ଥ ଲୋକଙ୍କ ସେବା ପାଇଁ ସର୍ବଦା ଥାଆନ୍ତି ପ୍ରସ୍ତୁତ
ଦୁନିଆର ସବୁଠାରୁ ବିପଦସଙ୍କୁଳ ସ୍ଥାନମାନଙ୍କ ମଧ୍ୟରେ ସିରିୟାର ନାମ ସର୍ବାଗ୍ରେ ରହିଛି । ପ୍ରତି ମିନିଟରେ ଏଠାରେ ବୋମା ବିସ୍ଫୋରଣ ହୋଇଥାଏ । ଘରର କୌଣସି ସଦସ୍ୟ ବାହାରକୁ ଗଲେ ପୁନଶ୍ଚ ଘରକୁ ଫେରିବେ କି ନାହିଁ ଏହାର ଆଶଙ୍କା ଲାଗିରହିବା ଭଳି ଘରକୁ ଫେରିବା ପରେ ପରିବାର ଲୋକ ଜିବୀତ ଥିବେ କି ନାହିଁ ଏହାର ଦ୍ୱନ୍ଦ ମଧ୍ୟ ଲାଗିରହିଥାଏ । ଏହି ସ୍ଥାନରେ ପ୍ରତିଦିନ ୫୦ରୁ ଅଧିକ ବୋମା ବିସ୍ଫୋରଣ ହୋଇଥାଏ । କେହି ଜ୍ଞାତିକୁଟୁମ୍ବକୁ ହରାଇ କୋହଭରା କାନ୍ଦ କାନ୍ଦେ ତ ଆଉ କିଏ ସବୁ ସମ୍ପତ୍ତିକୁ ହରାଇ ସର୍ବସ୍ୱାନ୍ତ ହୋଇଯାଏ । ବିସ୍ଫୋରଣର ଶବ୍ଦ ପରେ ବିକଟାଳ ଚତ୍କାର ଏବଂ ଚାରିଆଡେ କ୍ଲାମଟାଙ୍କୁରା ନୀରବତା ଭିତରେ ପ୍ରତିଦିନ ସିରିୟାବାସୀଙ୍କ ଜୀବନ ଦୟନୀୟ ଅବସ୍ଥାରେ ଥିବାବେଳେ ହ୍ୱାଇଟ ହେଲମେଟ ଟିମଙ୍କ ନିସ୍ୱାର୍ଥପର ସହାୟତା ସେମାନଙ୍କୁ ପୁର୍ନଜୀବନ ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ସିନେମାରେ ସୁପର ହିରୋ ଲୋକଙ୍କ ଜୀବନ ବଞ୍ଚାଇବା ଭଳି ଏହି ହ୍ୱାଇଟ ହେଲମେଟ ଟିମ ମଧ୍ୟ ନିଜ ଜୀବନକୁ ଖାତିର ନକରି ସିରିୟାବାସୀଙ୍କୁ ସାହାଯ୍ୟର ହାତ ବଢ଼ାଇବା ପାଇଁ ଆଗକୁ ଆସିଛନ୍ତି । ଅନ୍ୟପକ୍ଷରେ ସିରିୟାବାସୀଙ୍କ ପାଇଁ ଏହି ଟିମ କୌଣସି ଦେବଦୂତଙ୍କଠାରୁ କମ ନୁହଁନ୍ତି । ଏଯାବତ ୧ ଲକ୍ଷରୁ ଅଧିକ ସିରିୟାବାସୀଙ୍କୁ ଏହି ଟିମ ଉଦ୍ଧାର କରି ନୂତନ ଜୀବନ ଦେଇଛନ୍ତି । ଲୋକଙ୍କୁ ବଞ୍ଚାଇବାକୁ ଯାଇ ଟିମର ୨୦୦ ଜଣ ସଦସ୍ୟ ନିଜ ଜୀବନକୁ ମଧ୍ୟ ହରାଇଛନ୍ତି । ଏହି ରିୟଲ ହିରୋଙ୍କ ଯେତେ ପ୍ରଶଂସା କଲେ ମଧ୍ୟ କମ ପଡିବ । ଯେଉଁଠାରୁ ବୋମା ବିସ୍ଫୋରଣର ଶବ୍ଦ ଶୁଣିବାକୁ ମିଳେ ଏହି ଟିମ ବିଳମ୍ବ ନକରି ବାହାରିପଡେ ଉଦ୍ଧାର କରିବା ପାଇଁ । ଧ୍ୱସଂବିଧ୍ୱସ କୋଠାରୁ ଜୀବନ ଖୋଜିବା ଏମାନଙ୍କ ନିତିଦିନିଆ କାମ ।
ଖାଲିଦ ଫରାହ ମଧ୍ୟ ଏହି ଟିମର ଜଣେ ସଦସ୍ୟ । ଥରେ ଏକ ବୋମା ବିସ୍ଫୋରଣରେ କୋଠା ତଳେ ଦୁଇ ପରିବାର ଚାପି ହେବା ଖବର ଜାଣିବାକୁ ପାଇ ଟିମ ବାହାରିପଡିଲା ସେମାନଙ୍କୁ ବଞ୍ଚାଇବା ପାଇଁ ଏବଂ ଏଥିରେ ସେମାନେ ସଫଳ ମଧ୍ୟ ହେଲେ । କିନ୍ତୁ ଜଣେ ମହିଳାଙ୍କ ୨ ସପ୍ତାହର ଛୁଆକୁ ବଞ୍ଚାଇବା ସେମାନଙ୍କ ପକ୍ଷରେ କାଠିକର ପାଠ ହୋଇ ଯାଇ୍ଥିଲା । ଛୋଟ ଛୁଆଟି ଭୁଷୁଡି ପଡିଥିବା କାନ୍ଥତଳେ ଚାପି ହୋଇ ରହିଥିଲା । ଖାଲିଦ ଛୁଆଟିକୁ ବଞ୍ଚାଇବା ପାଇଁ ଭୁଷୁଡି ଯାଇଥିବା କାନ୍ଥ ତଳକୁ ଯାଇ ଛୁଆଟିକୁ ବହୁ କଷ୍ଟରେ ଉଦ୍ଧାର କରିବାରେ ସଫଳ ହୋଇଥିଲେ । କେବଳ ଏହି ପରିବାର ନୁହଁ ଖାଲିଦ ଭଳି ଅନେକ ସୁପର ହିରୋ ପ୍ରତିଦିନ ହଜାର ହଜାର ପରିବାରକୁ ପୁର୍ନଜନ୍ମ ଦେବାରେ ସଫଳ ହେଉଛନ୍ତି ।
ଏହି ଟିମର ଅନ୍ୟ ଜଣେ ସଦସ୍ୟ ହେଲେ ଅବ୍ୱୁ ହସନ୍ ଯିଏ ଦୁଇବର୍ଷ ପୂର୍ବରୁ ନିଜ ପୁଅର ଶବକୁ ଏକ ବିଧ୍ୱସଂ କୋଠାତଳୁ ପାଇଥିଲେ । ପ୍ରାୟ ୧ ଘଣ୍ଟା ସେ ମୃତ ପୁଅକୁ କୋଳରେ ଜାବୁଡି ଧରି ବସି ରହିଥିଲେ । ଆଖିରେ ଆଖିଏ ଲୁହ ଥାଇ ବି ପାଟି ତାଙ୍କର ଚୁପ ଥିଲା । ସେହି ଦିନଠାରୁ ସେ ପ୍ରତ୍ୟେକଟି ଛୁଆ ମଧ୍ୟରେ ନିଜ ଛୁଆକୁ ଦେଖିବାକୁ ପାଆନ୍ତି ଏବଂ ଉଦ୍ଧାର କରିବା ପାଇଁ ଆଗେଇ ଯାଆନ୍ତି ।