ବଢ଼ିଚାଲିଛି କରୋନା ସଂକ୍ରମଣ, କୋହଳ ହେଉଛି କଟକଣା । ଅର୍ଥନୀତି ଗାଡ଼ିକୁ ପୁଣି ଟ୍ରାକକୁ ଫେରାଇବା ପାଇଁ କିଛି ଅଙ୍କୁଶ କାଢ଼ିଛନ୍ତି ସରକାର, କିନ୍ତୁ ସଂକ୍ରମଣ ରୋକିବାକୁ ହେଲେ ନିଜ ହାତରେ ନିଜ ସୁରକ୍ଷା ।
କନକ ବ୍ୟୁରୋ: ଗୋଟିଏ ପଟେ କରୋନା ଭୟ, ଅନ୍ୟପଟେ ଅର୍ଥନୀତି ଚିନ୍ତା । ଏହାରି ଭିତରେ ଫସି ଯାଇଛି ପୂରା ବ୍ୟବସ୍ଥା । ବର୍ତମାନ ପରିସ୍ଥିତି ଏପରି ହୋଇଛି ଯେ ବ୍ୟକ୍ତିଗତ ସ୍ତରରେ କିପରି ସଂକ୍ରମିତ ନହେବେ, ସେଥିପାଇଁ ଅଧିକ ଯତ୍ନବାନ ହେବାକୁ ପଡ଼ିବ । କରୋନା ସଂକ୍ରମଣ ରୋକିବା ପାଇଁ ସାରା ଦେଶରେ ଜାରି ରହିଛି ଲକଡାଉନ୍ । ତେବେ ଲକଡାଉନ୍ କଟକଣା ଧୀରେ ଧୀରେ କୋହଳ ହେବାରେ ଲାଗିଛି, ଆଉ ସେହି ଅନୁପାତରେ ବଢ଼ିଚାଲିଛି କରୋନା ସଂକ୍ରମଣ । ସଂକ୍ରମଣ ବଢ଼ୁଥିଲେ ବି ଦେଶବାସୀଙ୍କୁ ଆଉ କଡ଼ା କଟକଣା ଭିତରେ ରଖିବାକୁ ଚାହୁଁନାହାନ୍ତି ସରକାର ।
Kanak News is now on WhatsApp
Join and get latest news updates delivered to you via WhatsApp
ଏହାର କାରଣ ହେଉଛି ଶିଥିଳ ହୋଇ ପଡ଼ିଥିବା ଅର୍ଥନୀତିକୁ ପୁଣି ଥରେ ଟ୍ରାକ୍କୁ ଫେରାଇ ଆଣିବା ପାଇଁ ପ୍ରୟାସ ଆରମ୍ଭ ହୋଇଛି । ଦେଶରେ ଘରୋଇ ବିମାନ ସେବା ଆରମ୍ଭ ହେଉଛି । ରାଜ୍ୟରେ ବସ୍ ଓ ଅଟୋ ରିକ୍ସା ଚଳାଚଳ ସ୍ୱାଭାବିକ ଦେବାକୁ ଯାଉଛି । ରାଜ୍ୟ ଭିତରେ ଟ୍ରେନ୍ ଚଳାଚଳ ସହ ଲୋକଙ୍କ ଯିବାଆସିବା ପାଇଁ ଥିବା ଅଙ୍କୁଶ ଧିରେ ଧିରେ ହଟିବାକୁ ଯାଉଛି । ଫଳରେ କରୋନା ଆକ୍ରାନ୍ତଙ୍କ ସଂଖ୍ୟାରେ ଦ୍ରୁତ ବୃଦ୍ଧି ଘଟବା ଆଶଙ୍କା ମଧ୍ୟ ବଢ଼ି ଚାଲିଛି ।
ନଜର ପକାନ୍ତୁ ଦେଶରେ କିପରି ବଢୁଛି ସଂକ୍ରମଣ –
ମେ’ ୫ – ଗୋଟିଏ ଦିନରେ ୨,୯୬୩ ନୂଆ କରୋନା ଆକ୍ରାନ୍ତ ଚିହ୍ନଟ
ମେ’ ୧୫ – ଗୋଟିଏ ଦିନରେ ୩,୭୮୭ ନୂଆ କରୋନା ଆକ୍ରାନ୍ତ
ମେ’ ୨୫ – ଦିନକରେ ଆସିଲା ୬,୯୭୭ ନୂଆ କରୋନା ମାମଲା
ଅର୍ଥାତ୍ ୧୦ ଦିନ ପୂର୍ବରୁ ଦୈନିକ ଯେତିକି ନୂଆ ମାମଲା ଆସୁଥିଲା, ୧୦ ଦିନ ପରେ ସେଥିରେ ପ୍ରାୟ ୪୫ ପ୍ରତିଶତ ବୃଦ୍ଧି ଘଟିଛି । ହଠାତ୍ ଦୈନିକ ହାରରେ ଏପରି ବୃଦ୍ଧି ହେବାର କାରଣ ହେଉଛି ଲାଗିଥିବା କଟକଣାରେ କୋହଳ । ଦୋକାନ ଖୋଲିଛି, ଲକ୍ଷ ଲକ୍ଷ ପ୍ରବାସୀ ନିଜ ନିଜ ରାଜ୍ୟକୁ ଫେରୁଛନ୍ତି । ଯାହା ସଂକ୍ରମଣକୁ ବଢ଼ାଇବାରେ ସାହାଯ୍ୟ କରୁଛି । ଆମ ରାଜ୍ୟରେ ମଧ୍ୟ ଏକାବସ୍ଥା । ଦୁଇ ସପ୍ତାହ ପୂର୍ବରୁ ପୂରା ଆୟତ ଭିତରେ ଥିଲା କରୋନା ସ୍ଥିତି । ଏବେ କିନ୍ତୁ ଧୀରେ ଧୀରେ ବଦଳିବାରେ ଲାଗିଛି ସ୍ଥିତି । ଗତ ଦଶ ଦିନ ଭିତରେ ଦୁଇ ଗୁଣ ହୋଇ ଯାଇଛି ଆକ୍ରାନ୍ତଙ୍କ ସଂଖ୍ୟା ।
ନଜର ପକାନ୍ତୁ ରାଜ୍ୟର କରୋନା ସ୍ଥିତି ଉପରେ –
ମେ’ ୫ – ଆକ୍ରାନ୍ତଙ୍କ ସଂଖ୍ୟା ଥିଲା ୧୭୭
ମେ’ ୧୫ – ୭୩୭ରେ ପହଁଚିଲା ଆକ୍ରାନ୍ତଙ୍କ ସଂଖ୍ୟା
ମେ’ ୨୫ – କରୋନା ପଜିଟିଭ୍ ସଂଖ୍ୟା ୧୪୩୮
ଗତ ୧୦ ଦିନ ଭିତରେ ରାଜ୍ୟରେ ପାଖାପାଖି ଦୁଇ ଗୁଣ ହୋଇଯାଇଛି କରୋନା ଆକ୍ରାନ୍ତଙ୍କ ସଂଖ୍ୟା । ସଂଖ୍ୟା ବଢ଼ୁଥିଲେ ବି ଅର୍ଥନୀତିକୁ ଆଉ ଅଧିକ ଦିନ ଅଟକାଇ ରଖିହେବ ନାହିଁ ବୋଲି ସମ୍ଭବତଃ ହୃଦବୋଧ କରିଛନ୍ତି ସରକାର । ଗୋଟିଏ ପଟେ କଟକଣା କୋହଳ ହେଉଛି, ଅନ୍ୟପଟେ କରୋନା ସଂକ୍ରମଣ ବଢିବାରେ ଲାଗିଛି । ତେଣୁ ବ୍ୟକ୍ତିଗତ ସଚେତନତା ଏବେ ପୂର୍ବାପେକ୍ଷା ଅଧିକ ଜରୁରୀ ହୋଇ ପଡ଼ିଛି ।
ଏହି ସ୍ଥିତିରେ ନିଜର ଦାୟିତ୍ୱ ନିଜେ ନେବାକୁ ପଡ଼ିବ । କିପରି ସଂକ୍ରମଣରୁ ଦୂରେଇ ରହିବେ, ଏ ନେଇ ଅଧିକ ସଚେତନ ରହିବାକୁ ପଡ଼ିବ । ସାମାଜିକ ଦୂରତା ରଖିବା, ମାସ୍କ ପିନ୍ଧିବା, ଗହଳି ଠାରୁ ଦୂରେଇ ରହିବା ଭଳି ନିୟମକୁ କଡ଼ାକଡ଼ି ଅନୁସରଣ କରିବାକୁ ପଡିବ । ବର୍ତମାନର ପରିସ୍ଥିତିରେ ପରିବାରର ବୟସ୍କ ବ୍ୟକ୍ତି, ରୋଗୀ, ଛୋଟ ପିଲା, ଗର୍ଭବତୀ ମହିଳାଙ୍କ ପ୍ରତି ବିଶେଷ ଯତ୍ନବାନ ହେବା ଜରୁରୀ ହୋଇ ପଡିଛି । ଏପଟେ ହର୍ଡ ଇମ୍ୟୁନିଟି ଅର୍ଥାତ୍ ସମୂହ ରୋଗ ପ୍ରତିରୋଧକ ଶକ୍ତି ବୃଦ୍ଧି ନେଇ ଯେଉଁ ଚର୍ଚ୍ଚା ଚାଲିଛି, ତାହା କେତେଦୂର ବାସ୍ତବ ରୂପ ନେବ, ସେ ନେଇ ମଧ୍ୟ ସଂଦେହ ରହିଛି ।