ଅବସର ପରେ ବରିଷ୍ଠ ବିଚାରପତି କୁରିୟନ ଜୋସେଫଙ୍କ ଖୁଲାସା ! କହିଲେ, ଆମକୁ ଲାଗିଥିଲା ତତ୍କାଳୀନ ମୁଖ୍ୟ ବିଚାରପତି ଦୀପକ ମିଶ୍ରଙ୍କୁ କେହି ନିୟନ୍ତ୍ରଣ କରୁଛି
କନକ ବ୍ୟୁରୋ : ସୁପ୍ରିମକୋର୍ଟରୁ ଅବସର ଗ୍ରହଣ କରିଥିବା ବରିଷ୍ଠ ବିଚାରପତି କୁରିୟନ୍ ଜୋସେଫ ଗତ ୧୨ ଜାନୁୟାରୀରେ କରାଯାଇଥିବା ପ୍ରେସ କନଫରେନ୍ସ ପ୍ରସଙ୍ଗରେ ବଡ଼ ଖୁଲାସା କରିଛନ୍ତି । ଅବସର ଗ୍ରହଣ କଲା ପରେ ସେ ଏକ ଚମକାଇଲା ଭଳି ବୟାନ ଦେଇଛନ୍ତି । ସେ ସମୟରେ ତତ୍କାଳୀନ ମୁଖ୍ୟ ବିଚାରପତି ଦୀପକ ମିଶଙ୍କୁ ଅନ୍ୟ କେହି ନିୟନ୍ତ୍ରଣ କରୁଛି ବୋଲି ଲାଗିବାରୁ ସେମାନେ ଏହି ସାମ୍ବାଦିିକ ସମ୍ମିଳନୀ ଡକାଇଥିଲେ ବୋଲି ସେ କହିଛନ୍ତି । ତେବେ ଏନେଇ ତାଙ୍କ ମନରେ ତିଳେମାତ୍ର ଦୁଃଖ ନାହିଁ ବୋଲି ମଧ୍ୟ ପ୍ରକାଶ କରିଛନ୍ତି । ଏହା ବ୍ୟତୀତ ସେସମୟରେ କେସ୍ ଆବଣ୍ଟନ ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି । ଦୀପକ ମିଶ୍ର ସୁପ୍ରିମକୋର୍ଟର ମୁଖ୍ୟବିଚାରପତି ହେବା ପରେ ତାଙ୍କ ଉପରେ ବାହାର ପ୍ରଭାବ ପଡ଼ୁଥିବାର ଅନେକ ଉଦାହରଣ ଥିଲା । ଯେଉଁଠି ଜଜଙ୍କ ନିଯୁକ୍ତି ଠାରୁ ଆରମ୍ଭ କରି ବେଂଚ ମାମଲା ମଧ୍ୟ ସାମିଲ ଥିଲା । ଅବସର ପରେ ଏକ ସାକ୍ଷାତକାରରେ ସେ ଅନେକ ମାମଲା ଉପରେ ଆଲୋଚନା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ୧୨ ଜାନୁୟାରୀ ୨୦୧୮ରେ ସୁପ୍ରିମକୋର୍ଟର ଚାରିଜଣ ବରିଷ୍ଠ ବିଚାରପତି ଏକ ସାମ୍ବାଦିକ ସମ୍ମିଳନୀ ଡ଼କାଇ ଦେଶର ପ୍ରଧାନ ବିଚାରପତିଙ୍କ ବିରୋଧରେ ବିଷୋଦଗାର କରିଥିଲେ । ସର୍ବୋଚ୍ଚ ଅଦାଲତର ବିଚାରପତିମାନେ ନିଜର ପୁଞ୍ଜିଭୂତ ଅସନ୍ତୋଷକୁ ସାମ୍ବାଦିକ ସମ୍ମିଳନୀ ଡକାଇ ବ୍ୟକ୍ତ କରିଥିଲେ । ସୁପ୍ରିମକୋର୍ଟର ଚାରି ବରିଷ୍ଠ ବିଚାରପତି ଜଷ୍ଟିସ୍ ଜେ.ଚେଲମେଶ୍ୱର,ରଞ୍ଜନ ଗୋଗୋଇ,ଏମ୍.ବି.ଲୋକୁର ଏବଂ କୁରିଅନ ଜୋଶେଫ୍ ସାମ୍ବାଦିକ ସମ୍ମିଳନୀ ଡ଼କାଇ ସୁପ୍ରିମକୋର୍ଟରେ ବିଚାରପତିଙ୍କୁ ମାମଲା ଆବଣ୍ଟନରେ ବ୍ୟାପକ ଅନିୟମିତତା ହେଉଛି ବୋଲି ଅଭିଯୋଗ କରିଥିଲେ । ସେମାନେ ସିଧାସଳଖ ଏ ନେଇ ପ୍ରଧାନବିଚାରପତି ଜଷ୍ଟିସ୍ ଦୀପକ ମିଶ୍ରଙ୍କ ଉପରେ ଦୋଷାରୋପ କରିଥିଲେ । ସୁପ୍ରିମକୋର୍ଟ ର ପ୍ରଶାସନ ଓ ବିଧିବ୍ୟବସ୍ଥା ଉଚିତ୍ ଶୈଳୀରେ ପରିଚାଳିତ ହେଉନାହିଁ ବୋଲି ଅଭିଯୋଗ ବାଢ଼ିଥିଲେ ଚାରି ବରିଷ୍ଠ ବିଚାରପତି । ତେବେ ପରେ ସୁପ୍ରିମକୋର୍ଟ ପ୍ରଧାନ ବିଚାରପତିଙ୍କ ବିରୋଧରେ ଆସିଥିବା ମହାଭିଯୋଗ ପ୍ରସ୍ତାବ ଖାରଜ ହୋଇଥିଲା ।
ସୁପ୍ରିମକୋର୍ଟର ତତ୍କାଳୀନ ମୁଖ୍ୟ ବିଚାରପତିଙ୍କୁ କେହି ନିୟନ୍ତ୍ରଣ କରୁଥିବା ସନ୍ଦେହ କରି ସେମାନେ ଏହି ସାମ୍ବାଦିକ ସମ୍ମିଳନୀ ଡଳାଇଥିଲେ ବୋଲି ସ୍ପଷ୍ଟ କରିଛନ୍ତି ଅବସର ଗ୍ରହଣ କରିଥିବା ବରିଷ୍ଠ ବିଚାରପତି କୁରିୟନ ଜୋସେଫ । ସାମ୍ବାଦିକ ସମ୍ମିଳନୀର ଆଇଡ଼ିଆ ଜଷ୍ଟିସ ଚେଲେମେଶ୍ୱରଙ୍କର ଥିଲା । ତେବେ ଏଥିରେ ଅନ୍ୟ ତିନି ଜଣ ବିଚାରପତି ସମ୍ପୂର୍ଣ୍ଣ ସମମତ ଥିଲେ ।
ସୂଚନାଯୋଗ୍ୟ ବରିଷ୍ଠ ବିଚାରପତି କୁରିୟନ୍ ଜୋସେଫ୍ ଗତ ଗୁରୁବାର ଦିନ ଅବସର ଗ୍ରହଣ କରିଛନ୍ତି । ସେ ସୁପ୍ରିମକୋର୍ଟର ତୃତୀୟ ବରିଷ୍ଠତମ ବିଚାରପତି ଥିଲେ । ୮ ମାର୍ଚ୍ଚ ୨୦୧୩ରେ ତାଙ୍କୁ ସୁପ୍ରମିକୋର୍ଟର ବିଚାରପତି ନିଯୁକ୍ତ କରାଯାଇଥିଲା । ଦେଶର ଉଚ୍ଚତମ ନ୍ୟାୟାଳୟରେ ବିଗତ ୫ ବର୍ଷ ସମୟରେ ବରିଷ୍ଠ ବିଚାରପତି ଜୋସେଫ୍ ଅନେକ ମାମଲାରେ ନଷ୍ପତି ଶୁଣାଇଛନ୍ତି । ଏଥିରେ ତିନି ତଲାକ୍, ରାଷ୍ଟ୍ରିୟ ନାୟିକ ଉତ୍ତରଦାୟିତ୍ୱ ଆୟୋଗ ଆଦି ନଷ୍ପତି ପ୍ରମୁଖ ରହିଛି ।